MURU OFUNJEDHA 43
NYUMBO 90 Tizilimbikitsana
N’nga ninaire a-vi ira ni-iye kaikela?
“Musakenga vyongo vyothene nosikimizela.”—1 AT. 5:21.
VINOFUNA I-YO FUNJEDHA
Muyofunjedha yei ninotapanyani moda unamali-edhe i-yo kaikela weo unakuze urumiwi-u na Yohova.
1-2. (a) N’nga arumiwi enango a Yohova takaikela vyongo vivi? (b) N’nga ninotapanya n’ni muyofunjedha yei?
MUTU uliwethene hora dhinango unokaikelechaa vyongo vinango. Mofwanafwani-a, zombwe wa mboni unooda kaikelanga akala Yohova unom’dhiveliwana. Ee-no unooda kaikelanga thitho vyoi abadiziwe. Ifwanafwani-o inango inooda kala ya baba wenuo asakunle ira am’labelenga Yohova malo mofwanya basa yam’va-enga kobiri dhinjinji. Vasogolo vogumanana nyarwa dha fuma, unooda roma kaikelanga akala atoosakula pama. Kathuulelani thitho vya rongola wenuo a-ana kopolo dhokwakwanela. Liye unooda sukwalanga namwasa oi kanaode irana vyongo vinjinji ninga voromavene. N’nga nyo mwatooroma dhifukavo ira: ‘N’nga Yohova unondidhiveliwana? N’nga ndatooira pama sakula ira ndim’labelenga? N’nga Yohova unoona ira ndili ofuneya?’
2 Akala kanifwaidhe vyowakula vya vyofuka vyevi, ninooda i-ya m’roromela Yohova venango i-ya m’labela. Muyofunjedha yei ninotapanya moda makundo a Bibilyani munanikami-edhele aliwa akala ninokaikela vyoi (1) Yohova unonidhiveliwana (2) Natoosakula pama na (3) Akala Yohova unonionave ira nili ofuneya.
VYONGO VINAIRE I-YO IRA NI-IYE KAIKELA
3. N’nga chini inanikami-e akala ninokaikela vyongo vinango?
3 Yongo inango inanikami-e akala ninokaikela vyongo vinango, kuleri madhu a Nlungu ira nifwanye vyowakula vya vyofuka vi-u. Naira ee-no ninooda fwanya kopolo, ninodha kala vauxamwali wapama na Yohova thitho ninodha “kaana iroromelo yolimba.”—1 Ak. 16:13.
4. N’nga ninaire a-vi ira “nisakesake vyongo vyothene novisikimizela”? (1 Atezalonika 5:21)
4 Muleri 1 Atezalonika 5:21. Va lembali, Bibilya linonilimbi-a ira “nisakesake vyongo vyothene nosikimizela.” N’nga ninairena a-vi vyevi? Ninofwanela sikimizela ira vinororomela i-yo ndi vyongo vyaimbarimbari, vofwanafwani-edha na vinoonga Bibilya. mwaifwanafwani-o, nifwanafwani-edhe ira zombwe mwinango unokaikela vyoi Yohova unom’dhiveliwana. N’nga liye unofwanela roromelanga ira baa-i Yohova kanom’dhiveliwana? Kabe! Malomwee unofwanela sakasaka mathuulelo a Yohova vamwasuo ira asikimizele.
5. N’nga Yohova unanikami-e a-vi “fwanya vyowakula vya vyofuka vi-u”?
5 Naleringa madhu a Nlungu, vinokala ninga “ninom’vwa” Yohova aonganga na i-yo. Mbwenye ninofuneela kaana thindhi ira nifwanye mathuulelo a Yohova va yofuka ina i-yo. Naleringa, ninofwanela thuulela maningi vyongo vinonisukwali-a. Ninooda sakasaka vyongo vinjinji va mwasuo vo-indi-edha basa vyongo vyokami-a vofunjedha vyevyo gulu la Yohova viniva-idhe aliwa. (San. 2:3-6) Ninooda m’vepha Yohova ira anikami-e va hora inosakasaka i-yo ira niidhiwe mathuulelwee. Naira ee-no nisakesake makundo a Bibilyani enao ananikami-e va mwasi-uo. Ndi pama thuulela thitho myasa ya Bibilyani, yaatu enao tagumam’nena nyarwa ninga dhi-udho.
6. N’nga migumano inanikami-e a-vi ira ni-iye vikaikela?
6 Vamigumanwi-u ninokala thitho ninga “ninovwa” Yohova aonganga na i-yo. Akala hora dhothene ninofwanyeya vamigumanoni, ninooda uvwa likundo n’nangolee lolimbi-a va yowakula ya bali venango rongola yeniyo inanikami-e ira ni-iye kaikela. (San. 27:17) Va-eeni dhoweni nitapanyeni vyongo vinaire i-yo ira ni-iye kaikela vamakundo mararwala.
MWAKAIKELANGA IRA YOHOVA UNOUDHIVELIWANANI
7. N’nga atu enango anodhifuka yofuka ivi?
7 N’nga mwatooroma dhifukavo ira ‘N’nga Yohova unondidhiveliwana?’ Akala munodhiona ira muli o-ofuneya, munooda thuulelanga ira pyo-oodeya kala vauxamwali na Namapanducha wa vyopanduchiwa vyothene. Vinooneya ira Davide atokaana thitho mathuulelo enala. Liye atoodabwa na likundo loi Yohova utokaana ifunelo naatu, voi atoofuka ira: “Nyo Yohova, mutu mbaani ira mum’thuulelenga, n’nga mwana mutu mbaani ira mu’mbalenga?” (Sal. 144:3) N’nga ninafwanye wani yowakula ya yofuka yei?
8. Movwelana na lemba la 1 Samueli 16:6, 7, 10-12, n’nga Yohova unoona vyongo vivi mwaatu?
8 Bibilya linothonyi-edha ira Yohova unothuulela atu enao anooneya ninga mbo-ofuya waatu enango. Mofwanafwani-a, Yohova atom’ruma Samueli ira amazoze m’mbo-i mwaa-ima a Jesse ira akale mwene wa Aisraeli. Jesse atooitana a-imee 7 ira tamagumane na Samueli mbwenye kaam’mwitan’ne Davide wenuo ali mwanee wa ng’ono.b Mbwenye Davide, ngwenuo asakuliwile na Yohova. (Muleri 1 Samueli 16:6, 7, 10-12.) Yohova atoona vyali rimani mwa Davide thitho atoozindiyela ira ali mutu am’dhiveliwana Nlungu.
9. N’nga mwasiwa ngwan’ni kamunofwanela kaikelanga ira Yohova unouthuulelani? (Muone thitho iruthiruthi.)
9 Yohova utothonyi-edha wale ira unouthuulelani. Mwaifwanafwani-o, unouva-ani malangi-o ovwelana na vinofuneela nyo. (Sal. 32:8) Vyevi kavyaodeye aakale ira kanouwidhiwani pama. (Sal. 139:1) Mwaroma i-ndi-edha basa malangi-o a Yohova noona moda munoukami-edhelani aliwa, kamunokaikela ira Yohova unoudhiveliwanani. (1 Li. 28:9; May. 17:26, 27) Yohova unoona vyongo vyothene vinoira nyo ira mum’labelenga, unoona makalelo apama enao ana nyo thitho unofuna ira mukale fwee (Jer. 17:10) Liye unofuna ira murumele kala fwee.—1 Ju. 4:19.
“Mwam’sakasaka [Yohova], unodha rumela ira mum’fwanye.”—1 Li. 28:9 (Muone ndima 9)c
MWAKAIKELANGA VYONGO VYASAKUNLE NYO
10. N’nga hora dhinango ninooda kaikelangan’ni nathuulela vyongo vyasakunle i-yo?
10 Hora yaviranga, atu enango anoroma kaikela akala tatoosakula pama va vyongo vinango. Venango tatoosakula i-ya goswiwa venango basa yapama naifunelo yoi tairengana vyongo vinjinji vom’labela Yohova. Va-eeni venango vatovira vyawa vinjinji thitho anoona ira afwiwa enao tasakunle vyongo vinango katinogumana nyarwa dhafuma. Ee-no anooda dhifukanga ira: ‘N’nga ndatoosakula pama ira ndim’labelenga Yohova venango ndatooluza ngari?
11. N’nga mulimbo lemba Salimo 73 arucheya namathuulelo avi?
11 Akala nyo mwatoodhifukavo vyofuka ninga vyevi, ifwanafwani-o ya mulimbo lemba Masalimo 73 inooda ukami-ani. Liye aona ira atu enango taoneya ira vyongo vinoawendela pama thitho katasukwala. (Sal. 73:3-5, 12) Athuulela vyevyo, aona ira m’labela Yohova ndi tatila hora. Mathuulelo enala tanoom’muiri-a ira arucheyenga dambo nlilothene. (Sal. 73:13, 14) N’nga liye airile a-vi?
12. Movwelana na lemba la Salimo 73:16-18, n’nga chini yam’kami-idhe mulimbo lemba Salimoli ira a-iye dhikaikela?
12 Muleri Salimo 73:16-18. Mulimbo lemba Salimoli, atoodhowa wu limburo lopwaseya wu kachisini wa Yohova. Angafiile weo atooroma thuulela pama thitho atoozindiyela ira angalive atu enango taoneya ira vyongo vinoawendela pama, sogolo liwa kalali lapama. Angathuulele vyongo vyevi, rimee watokaatheya limburonimwee thitho atoona ira atoosakula pama ira am’labelenga Yohova. Vyevi vyatoom’va-a kopolo ira adhowenave m’labela Yohova.—Sal. 73:23-28.
13. N’nga munaire a-vi ira riminyu ukaatheye limburonimwee, akala munokaikela vyoi mwatoosakula pama? (Muone thitho iruthiruthi.)
13 N’nga madhu a Nlungu anaukami-eni a-vi ira riminyu ukale limburonimwee? Muthuulelenga vyongo vyapama vifwaidhe nyo. Mwaifwanafwani-o, mufwanafwani-edhe maraeli-o aulanyedhileni Yohova na vyongo vinauva-eni ilamboi va-eeni. Atu enango anooda nyindelanga vyongo viodile aliwa fwanya muilamboi namwasa oi katina idedi-edho iliyothene yasogolo. Mbwenye nyo, Yohova utoulanyedhani vyongo vyapama maningi kwaranya vyongo vinathuulele nyo. (Sal. 145:16) Kathuulelani yofuka ila: N’nga ninooda onga mosikimizela mwemo ingumii-u mwakalele aliwa aakale ira natoosakula vyongo vinango? Yongo imbo-i inofwanela nyo idhiwa choi, atu anosakula irana vyongo vinango namwasa odhiveliwana Nlungu naatu, hora dhothene anofwanya vyongo vyowakami-a kala osangalala.
Mudedi-edhelenga maraeli-o alanyedhile Yohova (Muone ndima 13)d
NAKAIKELANGA IRA YOHOVA KANONIONA IRA NILI OFUNEYA
14. Mwasiwa ngwan’ni atu enango anodhikaikela, n’nga chofuka ivi inowaruchi-a?
14 Arumiwi enango a Yohova anorucheya namwasa wa marenda, ulula venango nyarwa dhinango dhokuza manungwiwa. Vyevi vinooda airi-a ira takaikelenga akala Yohova unowaonave ira mbapereso yavadhulu. Anooda dhifukanga ira, ‘N’nga Yohova unondionave ira ndili ofuneya?’
15. N’nga mulimbo lemba Salimo 71 kaakaikela vyan’ni?
15 Mulimbo lemba Salimo 71 anookaikela akala Yohova anoom’mona ira ngofuneya. Liye atoolobela ira: “Kamundi-iye vahora ya-anokaana miyo kopolo.” (Sal. 71:9, 18) Mbwenye liye kaakaikela ira adhowanave m’lambela Nlungu mororomeleya, Yohova unodha m’sogolela thitho m’kami-a. Mulimbo lemba Salimula, atoozindiyela ira Yohova unosangalala naatu enao anodhowanave m’labela angalive ira katinooda irana vyongo vinjinji.—Sal. 37:23-25.
16. N’nga atu oulula mbofuneya wa Yohova mundhila dhivi? (Salimo 92:12-15)
16 Akala muli oulula, munofwanela thuulelanga mwemo Yohova munouonelani liye. Angalive ira kopolo dhinyu toyeva, liye unodha ukami-ani ira mukaena kopolo mwauzimu. (Muleri Salimo 92:12-15.) Malo mothuulelanga vyongo vya-anaode nyo irana, muthuulelanga vyongo vinaode nyo irana. Mwaifwanafwani-o, vyongo vinoira nyo thitho riminyu odhiveliwana atu, unooda limbi-a atu enango. Munooda wandela atu enango moda Yohova mukadhi liye aukami-angani wa vyawa vinjinji thitho vyolanyedha vya Bibilyani vyevyo vinodedi-edhela nyo maningi. Kamukaikelenga ira malobelwinyu okumela vathi varima, anooda kami-a atu enango. (1 Pe. 3:12) Akala vyongo vili a-vi vaingumii-u, i-yo othene ninooda velela yongo inangoyee wa Yohova thitho waatu enango.
17. Mwasiwa ngwan’ni kaninofwanela vifwanafwani-edhela naatu enango?
17 Akala munoona ira kamunoira vyongo vinjinji vom’lambela Yohova, idhiwani ira liye unosimba maningi vyongo vinooda nyo irana. Hora dhinango munooda roma fwanafwani-edhelanga vyongo vinoira nyo na vinoira atu enango. Mwasiwa ngwan’ni ninofwanela rambela vyevyo? Mwasiwa ngoi Yohova kanonifwanafwani-edhela naatu enango. (Agl. 6:4) Mwaifwanafwani-o, Mariya atoom’va-a Yesu yotuva ya makura apereso yavadhulu. (Ju. 12:3-5) Mbwenye i-yana mwinango wamakwele atoovelela vixikobiri vinli vyoyeva kopolo kachisini. (Luk. 21:1-4) Yesu atoonga ira a-iyana ambilene enala, tatoothonyi-edha iroromelo. Thitho Babee Yohova unosimba vyongo vyothene vinoira nyo namwasa oi mwatoodhivelela wa liye thitho munom’dhiveliwana, masiki vikale vyongo vyoyeva moi a-vi.
18. Chini inanikami-e ira ni-iye kaikela? (Muone kwadru yoi “madhu a Yohova anooda nikami-a ira ni-iye kaikela.”)
18 I-yo othene hora dhinango ninokaikelecha vyongo vinango. Mbwenye muyofunjedha yei, nitoona ira madhu a Nlungu anooda nikami-a ira ni-iye kaikela. Ee-no muirenga yongo iliyothene inaode nyo ira mu-iye kaikela thitho mwaira e-no riminyu unodha kala limburonimwee. Yohova unoona ira nyo va mwekene muli ofuneya maningi. Yohova unosimba vyongo vyothene vinoira nyo ira mum’labelenga thitho unodha uva-ani yotuva. Kamukaikelenga ira Yohova unoudhiveliwanani thitho thuulela arumiwee othene ororomeleya.
NYUMBO 111 Tili ndi Zifukwa Zambiri Zokhalira Osangalala
a THAPULELIWA WA MADHU ENANGO: Muyofunjedha yei, ninotapanya kaikela akala Yohova unonidhiveliwana venango akala natoosakula pama. Kaninotapanya kaikela weo Bibilya unothonyi-edha aliwa ira nguumboni oi kaninom’roromela Yohova venango vyolanyedha vyee.
b Bibilya kalinoniwandela vyawa vyana Davide vahora Yohova vyam’sakunle liye. Mbwenye vinooneya ira ali a-anakwakwani-e vyawa 20. Muone Nsanja ya Olonda ya 1 wa Setembro wa 2011 thakuru 29 ndima 2.
c MADHU AIRUTHIRUTHI YAVA: Zombwe mwinango wa mboni dha Yohova asakasakanga malemba ira aidhiwe mathuulelo a Yohova.
d Thakuru 27: Bali alabanga basa ira afwanyele banjalee vyongo vyofuneeleya, mbwenye athuulelanga thitho maningi vyongo vinaireye paradaizoni.