N’nga Yohova unonikami-a a-vi ira nivilele?

1. Mwasiwa ngwan’ni ninofwanela vilela, n’nga mbaani unanikami-e? (1 Pedru 5:10)

MALAMBO omari-ala, atu a Yohova anovilela nyarwa dho-iyana-iyana. Atu enango anobulela marenda malukulu, voi atu enango anovikumbanyedha namwasa oi mutu wam’dhiveliwana aliwa utokwa, voi atu enango anoruni-iwa naabaliwa venango magoverno. (Mat. 10:18, 36, 37) Akala nyo munogumanana nyarwa ninga dhedhi, kamukaikelenga ira Yohova unodha ukami-ani ira muvilele.—Muleri 1 Pedru 5:10.

2. Ninga Makristau n’nga chini inanikami-e ira nivilele?

² Vilela unothapulela kalave ororomeleya wa Yohova, nom’tumikelanga mosangalala angalive ira ninooni-iwa nyarwa, venango gumanana vyowesedha. I-yo makristau kaninaode vilela vaokene. Malomwee, Yohova ngwenuo unoniva-a “kopolo yokwaranya yobaliwana.” (2 Ak. 4:7) Muyofunjedha yei ninotapanyani vyongo 4 vyevyo vinoniva-a Yohova vonikami-a ira nivilele. Ninoona thitho moda munanikami-edhele vyongo vyevi.

LOBELO

3. Mwasiwa ngwan’ni ninooda onga ira lobelo chiyongo yodabwi-a?

³ Lobelo ndi yongo iniva-idhe Yohova vonikami-a ira niodenga vilela. Liye otoiri-a ira niodenga onga na liye angalive ira nili atu odawa. (Aeb. 4:16) Kathuulelani, ninooda lobela wa Yohova vahora iliyothene thitho vamwasa uliwothene. Liye unooda uvwa iongelo, iliyothene thitho uliothene weo uli i-yo, masiki nakala vanokene venango akala nili perezoni. (Yon. 2:1, 2; May. 16:25, 26) Akala vinonirucha m’mwandela Yohova vyongo vinonikumbanyi-a, liye unokala angaidhiwile wale vinofuna i-yo onga. (Aro. 8:26, 27) Onga mwaimbarimbari, lobelo ndi ndhila yodabwi-a yoongi-ana na Yohova.

4. Mwasiwa ngwan’ni malobelwi-u om’vepa Yohova ira anikami-e vilela anofwanela kala ovwelana na ifuneloyee?

⁴ Madhu a Yohova anonisikimizeli-a ira “iliyothene inavephe i-yo movwelana na ifuneloyee, unonivuruwana.” (1 Ju. 5:14) N’nga ninooda m’vepha Yohova ira anikami-e vilela? Eee, irana vyevi kovwelana na ifuneloyee. Ninoonga ee-no namwasa oi ninovilela vyowesedha vinogumanana i-yo thitho ninom’kami-a Yohova ira am’mwakule Satana namanami-a, wenuo uno’nyoza. (San. 27:11) Wenjedhela vevo, Bibilya linoonga ira Yohova ngofunechecha “thonyi-edha kopolodhee waatu odhivelela narima othene wa liye.” (2 Li. 16:9) Ee-no kanikaikelenga ira Yohova utokaana kopolo thitho unofunechecha nikami-a ira nivilele.—Esa. 30:18; 41:10; Luk. 11:13.

5. N’nga lobelo linanikami-e a-vi fwanya rendele warimani? (Esaya 26:3)

⁵ Bibilya linoonga ira mwalobelanga kumela vathi varima, “rendele wa Nlungu oi atu katinaode uvwechecha unodha barela miriminyu na mathuulelinyu.” (Afl. 4:7) N’nga vyevi vinothapulela n’ni? Atu enao ta-anom’tumikela Yohova naaliwene thitho anogumanana nyarwa, anodhilimbi-edha mundhila dho-iyana-iyana dhedho dhinaakami-e fwanya rendele warimani. Mwaifwanafwani-o, atu enango anodhilimbi-edha ira ta-athuulelenga nyarwa dhinogumanana aliwa thangani-avo vyongo vinowakumbanyi-a. Mbwenye irana vyevi koopi-a namwasa oi a-thuulela vyongo vinogumanana i-yo unooda iri-a ira viwanda vifwanyelevo ngari. (Mufwanafwani-edhe na Mateu 12:43-45.) Wenjedhela veva, rendele unoniva-a Yohova nam’vepha, unokwaranya rendele unofwanya atu mundhila dho-iyana-iyana. Nalobelanga wa Yohova nithonyi-edha ira ninom’nyindela maningi thitho liye unoniva-a “rendele o-omala.” (Muleri Esaya 26:3.) Ndhila imbo-i inoniva-edhelana liye rendele ndi nikami-a thuulela malemba odidili-a enao anoleri i-yo Bibilyani. Malemba enala anonikami-a namwasa oi ninoidhiwa ira Yohova unonisamalela thitho unofuna ira vyongo viniwendelenga pama.—Sal. 62:1, 2.

6. N’nga ninaire a-vi ira lobelo linikami-enga maningi? (Muone thitho iruthiruthi.)

⁶ Vyongo vinaire nyo. mwavilelanga vyowesedha vinango, “mu’rulelenga Yohova” vyokumbanyedha vinyu thitho munvepenga ira auva-eni rendele. (Sal. 55:22) Muvepenga thitho zelu dhedho dhinaukami-eni limbanana vyowesedhavyo. (San. 2:10, 11) Mwalobelanga wa Yohova ira aukhami-eni vilela, kamudiwale thitho msimba. (Afl. 4:6) Mukalenga opwaseya ira muone moda munaukami-edheleni Yohova vilela thitho mumsimbenga. Vyowesedha vinagumanena nyoovyo, kaviuimwanani-eni ona maraeli-o anouva-ani Yohova.—Sal. 16:5, 6.

MADHU A NLUNGU

7. N’nga funjedha Bibilya unanikami-e a-vi ira nivilelenga?

⁷ Yohova utoniva-a madhwee ira anikami-enga vilela, Bibilya mutokala malemba manjinji enao anonisikimizeli-a ira Yohova unonikami-a vilela. Ifwanafwani-o ndi lemba la Mateu 6:8 linoonga ira: “Babinyu unoidhiwa vyongo vinofuna nyo mwa-anam’vepe.” Yesu ngwenuo aonga madhwala thitho liye unomwidhiwa pama Yohova kwaranya mutu uliwethene. ee-no, kaninofwanela kaikelanga ira Yohova unonithuulela nagumanangana nyarwa. Bibilyani mutokala thitho malemba manjinji ananikami-e ira nidhowenave vilela.—Sal. 94:19.

8. N’nga ndi likhundo livi limbo-i lelo linanikami-e vilela, n’nga linanikami-e a-vi?

⁸ Makhundo a Bibilyani anonikami-a vilela nagumanangana nyarwa. Kwaranya vyongo vyothene Malangi-o anofwanya i-yo mumakhundo a Bibilyani anonikami-a ira niodenga sakula vyongo mwazelu. (San. 2:6, 7) Mwaifwanafwani-o, Bibilya linonilimbi-a ira kanikumbanyedhenga vyongo vinaireye sogolou, malomwee dambo nlilothene nim’nyindelenga Yohova. (Mat. 6:34) Naleringa madhu a Nlungu dambo nlilothene thitho athuulela modi-a, vinodha kala vyo-orucha thuulela makhundo enao ananikami-e vahora inafuneele i-yo.

9. N’nga myasa ya Bibilyani inanikami-e a-vi ira niroromelenga ira Yohova unodha nikami-a ira nivilelenga?

⁹ Bibilyani mutokala myasa dhaatu ninga i-yo, enao tam’nyindenle Yohova thitho liye atoakami-a. (Aeb. 11:32-34; Yak. 5:17) Thuulela myasa ninga dhedhi unooda nikami-a roromelanaga ira Yohova ndi “votawelavo vi-u thitho kopolo dhi-u na kami-o linofwanyeya mo-orucha vahora ya nyarwa.” (Sal. 46:1) Naonanga arumiwi ororomeleya awale moda mwathonyi-edhele aliwa iroromelo, vinonilimbi-a ira nisazi-edhele iroromelo iwa novilela wiwa.—Yak. 5:10, 11.

10. N’nga munaire a-vi ira madhu a Nlungu taukami-engani maningi?

¹⁰ Vyongo vinaire nyo. Muleringa Bibilya dambo nlilothene thitho mulokotenga malemba anoona nyo ira anooda ukami-ani. Atu enango anoona ira leri malemba dambo nlilothene namaibe-i unowakhami-a ira tathuulelenga vyongo vyolimbi-a dambo lothene. Rongola mwinango dhinale Mariaa vyatom’kami-a vahora yabulela anamabalee na urenda wa kansa. N’nga chini yam’kami-idhe vilela vahora yasamalela liye anamabalee wa malambwiwa omari-a a ingumiiwa? Liye aongile ira, “dambo nlilothene namaibe-i ndanooleri lemba ladambo thitho lithuulela.” “Vyevi vyatoondikami-a ira ndithuulelenga vyokhuza Yohova thitho Makhundo a malemba malo mothuulela nyarwa dhagumanana miyo.”—Sal. 61:2.

MAKRISTAU AFWI-U

11. N’nga idhiwa ira abali naarongoli-u anogumanana nyarwa unonilimbi-a a-vi?

¹¹ Yohova utoniva-a abali naarongola availambo yothene ira tanikami-enga vilela. Nolimbi-iwa “voidhiwa ira abali [naarongoli-u] vailambo yothene anogumanana thitho nyarwa.” (1 Pe. 5:9) Akala ninogumanana nyarwa dhoi a-vi, atu enango anogumanana nyarwa ninga dhedho novilela. Ee-no i-yo thitho ninooda vilela!—May. 14:22.

12. N’nga Makristau afwi-u ananikami-e a-vi n’nga i-yo ninaakami-e a-vi? (2 Akoritiyo 1:3, 4)

¹² Abali narongoli-u tanooda nilimbi-a nagumanana nyarwa. Vyevi vyatoomwirelavo rumiwi Paulo. Hora dhinjinji anoosimba atu enao tam’kami-echa vahora yali liye perezoni yo-okuma vandhe, voi hora dhinango anowaonga madhiniwa. Aliwa tanoonlimbi-a, m’didili-a thitho mva-a vyongo vyafuneela liye. (Afl. 2:25, 29, 30; Ako. 4:10, 11) Vyongo ninga vyevi vinooda ireya malamboano. Abali naarongoli-u anonikami-a ira nivilelenga nagumanangana nyarwa, naaliwene thitho tagumanangana nyarwa naakami-enga.—Muleri 2 Akoritiyo 1:3, 4.

13. N’nga chini yam’kami-idhe Maya ira avilele?

¹³ Abali naarongola awu Rusiya atoolimbi-a rongola mwinango dhinalee Maya. Mu yawa ya 2020, mapolisiya tatoodha nyumbaniwee nosakasaka m’mbamwee vasogolovee tatoomomba landu namwasa owandela atu enango vyongo vinororomela liye. Maya aongile ira: “Vahora yavikumbanyedha miyo maningi abali naarongola tanoondiligarela, thitho ndilembela mamesage namakarta ondisikimizeli-a ira anondidhiveliwana. Ndulimu ndanooidhiwa ira abali naarongola anondidhiveliwana thitho ali ninga atu abanja langa. Mbwenye kumela mu yawa ya 2020, ndivevo vasikimizele miyo maningi vya likhundo leli.”

14. N’nga ninaire a-vi ira niganyalinga na vyongo vinoira Makristau afwi-u vonikami-a? (Muone thitho iruthiruthi.)

¹⁴ Vyongo vinaire nyo. Mwagumanangana nyarwa mukalenga vaduzi naabali naarongolinyu. Kamuvwalavwali-enga vepha andimuwa avapingoni ira taukami-engani. Aliwa ali ninga “limburo lovithalavo vahora ya lipevo” thitho “limburo lotawelavo vahora yadhongwe ulukulu.” (Esa. 32:2) Muthuulelenga ira makristau afwinyu anogumanana nanyarwa. Mwaariyelanga rima abali naarongolinyu enao anorucheya munokala osangalala thitho vinoda ukami-ani ira muvilelenga nyarwa dhinyu.—May. 20:35.

IDEDI-EDHO

15. N’nga idedi-edho yam’kami-idhe a-vi Yesu, n’nga inokami-a a-vi arumiwi ororomeleya malamboano? (Aebere 12:2)

¹⁵ Yohova utoniva-a idedi-edho yosikimizeleya yeniyo inonikami-a vilela. (Aro. 15:13) Kathuulelani mwemo idedi-edho mwakami-edhele aliwa Yesu vilela vadambo lorucha vaingumiyee. (Muleri Aebere 12:2.) Yesu anooidhiwa ira roromeleyawee unodha iri-a ira dhina la Yohova licheni-iwe. Liye anoodedi-edhela thitho welela wa Babee, ira adhatonge vambo-i na abalee ozoziwa mu Umwene wa dhulu. Molandana na vyevi, idedi-edho yi-u yodhakaana ingumi yo-omala muilambo ipya inooda nikami-a vilela nyarwa dhinogumanana i-yo muilambo yasatanila.

16. N’nga idedi-edho yam’kami-idhe a-vi rongola mwinango vilela, n’nga ninofunjedhavo n’ni na vyaongile liye?

¹⁶ Kathuulelani mwemo idedi-edho ya Umwene mwakami-edhele aliwa rongola wau Rusiya dhinalee Ana, wenuo manee atoo-eliwa perezoni vodedi-edhela ombiwa landu. Vyevi vingaireile Ana aongile ira: “Lobela thitho thuulela vyaidedi-edho yi-u yasogolou unondikami-a ira nda-afooke. Ndinoidhiwa ira nyarwadhi dhinodha mala. Yohova unoda gonji-a amwidani thitho unoda niva-a yotuva.”

17. N’nga ninathonyi-edhe a-vi ira ninosimba idedi-edho yeniyo iniva-idhe Yohova? (Muone thitho iruthiruthi.)

¹⁷ Vyongo vinaire nyo. Mukaengana hora yothuulela vyongo vyosangalali-a vyevyo vinilanyedhile Yohova. Mufwanafwani-edhelenga modha munakalele ingumi muilambo ipya thitho maraeli-o enao anafwanye i-yo. Mwairanga vyevi, nyarwa dhinogumanana nyo dhinoda oneyanga “ira ndi dhavahora yoyeva.” (2 Ak. 4:17) Muwandelenga atu enango vyongo vinororomela nyo. Atu vailambwila anogumanana nyarwa thitho katinoidhiwa vyevyo vilanyedhile Nlungu sogolou, ee-no muthuulelenga moda munakalele aliwa vyorucha waaliwa vilela nyarwa dhedhi. Tapanya naaliwa makhundo oyeva unooda akami-a kaana vifunelo vyofuna idhiwa vyongo vinjinji vyokhuza Umwene wa Yohova na vyolanyedhavyee.

18. Mwasiwa ngwan’ni ninofwanela roromelanga vyongo vinilanyedhile Yohova?

¹⁸ Vasogolo vovilela mororomeleya nyarwa dhinjinji dhagumanana liye, Yobu atoom’mwandela Yohova ira: “Ee-no ndinoidhiwa ira munooda irana yongo iliyothene, thitho kavali yongo inaimwanena nyo irana.” (Yob. 42:2) Yobu atoofunjedha ira kavali yongo inamwimwanani-e Yohova kwakwaneli-edha ifuneloyee. likhundo leli linooda nilimbi-a i-yo ira nivilelenga. Nifwanafwani-edhele ira m’ma mwinango unaavikhumbanyedha namwasa oi maifirimero anjinji anaaimwanana m’mwili-a marenda anobulela liye. Ee-no angagumane na ifirmero wadodoliso thitho onyindeleya, m’muo atom’mwandelamo nyarwadhee na moda munodhivwela liye. Thitho atoroma sangalala angalive ira anoidhiwa ira vanovira hora indendai ira aile. Liye unooda vilela namwasa oi va-eeni utokaana idedi-edho yoi unodha ila. Molandana na vyevi, roromela vyongo vinodedi-edhela i-yo paradaizoni unonikami-a vilela.

19. N’nga ninofwanela iran’ni ira nivilelenga?

¹⁹ Muyofunjedha yei nitoona ira Yohova unonikami-a vilela vo-indi-edha basa madhwee, malobelo, Makristau afwi-u thitho idedi-edho yi-u. Narumeli-anga ira vyongo vyevi vinikami-e, Yohova unodha nikami-a vilela nyarwa iliyothene inagumanena i-yo fiyedha vahora inamali-e liye nyarwa dhothene vailambo yavathi.—Afl. 4:13.