Yohova unonikami-a ira “nisangalalenga maningi”

1-2. (a) N’nga ndi vyongo vivi vinogumanana atu anjinji malamboano? (b) N’nga ninotapanyan’ni muyofunjedha yei?

MALAMBOANO atu anjinji anoira vyongo vyo-iyana-iyana naifunelo yoi takalenga osangalala. Mbwenye angalive ira tanodhilimbi-edha ira tasangalalenga, aliwa anokalave o-osangalala. Atu anjinji anorucheya na mathuulelo odhionanga ira mbo-okaana basa thitho anokala osukwala. Naaliwene thitho arumiwi a Yohova hora dhinango anorucheya na mathuulelo enala. Voi ninokala “malambo omari-a,” ninodedi-edhela ira hora dhinango ninongogumanana vyorucha vinairi-e ira nidhikhumbanyedhenga thitho nikalenga osukwala.—2 Ti. 3:1.

² Muyofunjedha yen’na, ninotapanya vyongo vinairi-e ira na-asangalalenga thitho vinaire i-yo ira nirome okoka sangalala. Mbwenye yoroma dhoweni nioneni ira mbaani unanikami-e ira nisangalalenga mwaimbarimbari.

N’NGA MBAANI UNANIKAMI-E IRA NISANGALALENGA MWAIMBARIMBARI?

3. N’nga vyongo vyapanduchile Yohova vinonifunji-a n’ni vyokhuza liye? (Muone thitho viruthiruthi.)

³ Hora dhothene Yohova unokala osangalala moi unofuna ira na-iyene thitho nikalenga osangalala. Ngumwasee atoopanducha vyongo vinjinji vinonikami-a ira nikalenga osangalala. Mwaifwanafwani-o, ninosangalala naona ilambwi-u yobaleila, yoi itokaana vyongo vinjinji vyo-iyana-iyana. Ninosangalala naonanga vinyama viwaredhenga thitho nadyanga vyodya vyo-iyana-iyana vinodhiveliwana i-yo. Vyevi pyoira oneelatu ira Nlungu unonidhiveliwana maningi thitho unofuna ira nisangalalenga na ingumi.

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Mwasiwa ngwan’ni Yohova unokalave osangalala angalive ira unaaona atu tagumanangana nyarwa? (b) N’nga ndi yotuva ivi yaniva-idhe Yohova? (Salimo 16:11)

⁴ Angalive ira Yohova ndi “Nlungu osangalala,” liye unoidhiwa pama vyongo vyopha na nyarwa dhinoireya vailamboi. (1 Ti. 1:11) Mbwenye Yohova kanorumela ira vyongo vyevi vim’mwiri-enga kala o-osangalala. Liye unoidhiwa ira nyarwa dhedhi ndi dha isihora yoyeva moi atoosakula dambo linofuna liye dhadhimali-a. Thitho Yohova unaavilela moleva rima vanodedi-edhela liye dambo lodhakhumi-a vyongo vyosukwali-a na vinooni-a atu nyarwa modhowa nodhowa. Yohova unovwechecha nyarwa dhinogumanana i-yo va-eeni thitho unoiravo yongo vofuna nikami-a. N’nga unonikami-a a-vi? Ndhila imbo-i inoirela liye vyevi kunikami-a ira nikalenga osangalala. (Muleri Salimo 16:11.) Dhoweni nioneni mwemo mwakami-edhele liye mwanee Yesu ira akalenga osangalala.

5-6. N’nga chini inom’kami-a Yesu ira akalenga osangalala?

⁵ Va vyaingumi vyothene vyapanduchile Yohova, Yesu ngunokala osangalala maningi kwaranya vyothene vyevi. Mwasiwa ngwan’ni ninoonga e-no? Dhoweni nione myasa minlila. (1) “Liye ndi ifwanafwani-o ya Nlungu o-ooneya.” Ngumwasee unokala osangalala maningi ninga munoirela Yohova. (Ako. 1:15; 1 Ti. 6:15.) (2) Yesu atookala vyawa vinjinji na Yohova oi ndi Nlungu osangalala.

⁶ Yesu unokala osangalala namwasa oi hora dhothene unoirana vinofuna Babee. (San. 8:30, 31; Ju. 8:29) Namwasa oi unoira vyongo mororomeleya, Yohova unosangalala maningi na liye.—Mat. 3:17.

7. N’nga chini inanikami-e ira nikalenga osangalala?

⁷ I-yo thitho ninooda kala osangalala nakala vauxamwali olimba na Yohova oi ndi Nlungu osangalala. Nakaana hora yokwakwanela yofunjedha vya Yohova, a-relanga moda unothuulela liye na moda unoirela liye vyongo, paevo vanakalenga i-yo osangalala maningi. Nairangana vinofuna Yohova thitho naidhiwa ira liye unonidhiveliwana ninokala osangalala maningi. (Sal. 33:12) N’nga vyatooroma uireelanivo ira hora inango nyo kala osangalala wa isihora yoyeva venango wahora yolapela? Akala ndi e-no, n’nga vyevyo vinothonyi-edha ira Nlungu kanoudhiveliwanani? Khabe kai e-no. Voi kanili olongomana, hora dhinango ninovwa upha, ninosukwala thitho kala okhumbanya. Mbwenye Yohova unovwechecha pama vyevi.a (Sal. 103:14) Va-eeni dhoweni nitapanyeni vyongo vinairi-e ira na-asangalalenga, thitho vinaire i-yo ira nirome okoka kala osangalala.

KAMURUMELI-E IRA YONGO ILIYOTHENE IUIMWANANI-ENI KALA OSANGALALA

8. N’nga nyarwa dhinogumanana i-yo dhinairi-e a-vi ira na-asangalalenga?

⁸ Yongo 1: Nyarwa dhinogumanana i-yo. N’nga va-eeni munaa-ara-ariwa namwasa oi muli rumiwi wa Yohova, ona nyarwa namwasa wa masoka avilengo, sauwa, marenda venango ulula? Nyarwa ninga dhedhi dhinooda iri-a ira na-asangalalenga, simbwasimbwa akala kavali inaire i-yo ira nidhimali-e. Thitho Bibilya linoonga ira “mutu kanokala osangalala akala rimanimwee munaam’pha.” (San. 15:13) Babis, oi ndi ndimuwa wa pingo, oi babee, m’mee na balee tatookwa wari mwa vyawa 4 baa-i, atoonga ira “ndadhivwa ira ndili ndekhene moi kavali mutu unaode ndikami-a. Hora dhinango ndinokala osukwala maningi namwasa oi angalive ira ndanoofuna kaana hora yokwakwanela yowaredha na balanga thitho anamabalanga ta-anakwee, mbwenye kavyali e-no namwasa oi vatookala vyongo vinjinji vyalimbanana miyo.” Mofwanafwana na balula, na-iyene thitho hora dhinango nyarwa dhi-u dhinooda iri-a ira nikalenga ochenyela maningi na okhumbanya.

9. N’nga chini inanikami-e ira nirome okoka kala osangalala? (Jeremiya 29:4-7, 10)

⁹ Vinaire i-yo ira nirome okoka kala osangalala. Ninooda roma okoka kala osangalala na-iyachi khumbanyedhanga vyongo vyoi kaninooda vichinja nosangalalanga na vyongo vina i-yo. Atu anjinji muilamboi anothuulela ira anooda kala osangalala akala vyongo vyothene vinoawendela pama vaingumiiwa. Mbwenye vyevi kai vyaimbarimbari. Mwaifwanafwani-o, Yohova atoowandela Ayuda oi tali wu dhaari wu Babulo ira tairenga vyothene vinaode aliwa yoi takalenga osangalala angalive ira tali wu dhaari muilambo yaanaifunelo nyaa. (Muleri Jeremiya 29:4-7, 10.) N’nga ninofunjedhavon’ni? Murumelenga moda uli vyongo vaingumiinyu thitho musangalalenga na vyongo vyapama vinouireelani. Muthuulelenga ira Yohova kanodha u-iyani mwekhene, liye unodha ukami-ani. (Sal. 63:7; 146:5) Mwaifwanafwani-o, Effie atoosimba maningi voona moda wam’kami-idhe Yohova. Liye atoopheya maningi namwasa wa ngovi yaireile moi atoorangala thitho kaaoda wenda. Liye atoonga ira: “Yohova, atu abanjani mwanga naabali naarongola apingoni tatoodilimbi-a thitho ndikami-a maningi. Ndinofuna ndiaoni-e ira ndinosimba namwasa wa vyongo vinondiirela aliwa. Ee-no ndinodhilimbi-edha ira ndikalenga osangalala.”

10. N’nga chini inanikami-e ira nikalengave osangalala masiki vanogumanana i-yo nyarwa?

¹⁰ Angalive ira vyongo kavinowenda pama vaingumii-u ninga munofunela i-yo, thitho akala atu abanjani mwi-u anogumanana nyarwa dhinango dhilukhulu, pyoodeya kalangave osangalala.b (Sal. 126:5) Mwasiwa ngwan’ni ninoonga e-no? Namwasa oi ira mutu akalengave osangalala, kavinonyindela moda uli vyongo vaingumiyee. Maria, oi ndi painiya, aongile ira: “Wagumanangana nyarwa mbwenye we sangalalangave kavinothapulela ira unaalokhota moda unodhivwelawe. Malomwee, vinothonyi-edha ira kudiwaanle vyalanyedhile Yohova. Babi-u unodha nikami-a ira nidhowenave kala osangalala.” Masiki ira va-eeni nigumanengana nyarwa dhilukhulu maningi, nyarwa dhi-u dhothene kadhinodha kalavo modhowa nodhowa, ninga munodindeela manyalwi-u nanyingala vausevani. Dindeyao kaunokalavo modhowa nodhowa. Vachineneeva Yohova unomali-a nyarwa dhi-u thitho kaninodha dhithuulelave.

11. N’nga ifwanafwani-o ya rumiwi Paulo inoulimbi-ani a-vi?

¹¹ Hora dhinango ninooda thuulelanga ira ninogumanana nyarwa namwasa oi Yohova uto-iya nidhiveliwana thitho niraeli-a. Naroma thuulela vyevi, nithuulelenga vyaarumiwi enango ororomeleya a Yohova aguman’nena vyorucha vilukhulu vaingumiiwa. Kathuulelani ifwanafwani-o ya rumiwi Paulo. Liye atoosakuliwa na Yesu ira amalaleele milanyu yapama “waatu amaziza enango thangani-avo mamwene na Aisraeli.” (May. 9:15) Yen’na yali ngari yavakhundu. Angalive ira vyali e-no, Paulo atoogumanana vyorucha vinjinji vaingumiyee. (2 Ak. 11:23-27) Voi Paulo atoogumanana nyarwa dhinjinji, n’nga vyevi vinothapulela ira Yohova atoo-iya m’raeli-a? Mwaimbarimbari khabe. Malomwee, Paulo atooda vilela vyorucha vyothene vyevi namwasa oi Yohova anoom’kami-a.(Aro. 5:3-5) Ee-no kathuulelani nyarwa dhinogumanana nyo. Munaadhilimbi-edha vilela thitho m’labela Yohova mororomeleya angalive ira munogumanana vyorucha vyothene vyevyo. Mofwanafwana na Paulo, nyo thitho munoona ira Yohova unaaukami-ani noudhiveliwanani.

12. N’nga vinodedi-edhela i-yo vyaimwananeya vinoiri-a a-vi ira na-asangalalenga?

¹² Yongo 2: Vinodedi-edhela i-yo vyaimwananeya. (San. 13:12) Ninodhiveliwana Yohova nosimba vinoniirela liye. Ee-no ninodhilimbi-edha kaana vifunelo vyevyo vinanikami-e ira niirengana vinjinji vom’labela. Mbwenye akala nitokaana vifunelo vyoi kaninooda vikwakwaneli-edha namwasa wa moda uli vyongo vaingumii-u, vinooda iri-a ira na-asangalalenga. (San. 17:22) Painiya mwinango dhinalee Holly atoonga ira: “Ndanoofuna volowa mu Xikola la Anamalaleela vya Umwene, laba basa lolaleela wuilambo inango venango dhowa makami-a vabasa lomanga wu Ramapo. Mbwenye vyongo vyatoochinja vaingumi yanga moi kandaode thitho kwakwaneli-edha vifunelo vyevi. Ndatoosukwala maningi. Vinopha maningi wafunechechanga irana vinjinji vom’labela Yohova mbwenye we a-vioda namwasa wa moda uli vyongo vaingumiiyaa.” Mwemu ndi munovwela anamalaba anjinji a Yohova anoimwanana kwakwaneli-edha vifunelo viwa vom’labela Yohova.

13. N’nga ndi vifunelo vivi vinakaena i-yo akala kaninooda irana vinjinji movwelana na moda uli vyongo vaingumii-u?

¹³ Vinaire i-yo ira nirome okoka kala osangalala. Nithuulelenga ira Yohova kanonivepha ira niire vyongo vyoi kaninooda viirana. Thitho liye kanoniona ira nili ofuneya maningi movwelana na vinooda i-yo irana vom’labela. Yohova unofuna ira nikale odhiyevi-a na ororomeleya. (Mik. 6:8; 1 Ak. 4:2) Yohova unosangalala aona ira vinothuulela i-yo, vinofuna i-yo na makalelwi-u ndi vyapama angalive ira ninoimwanana kwakwaneli-edha vinofuna i-yo irana vom’labela. N’nga ndi vyazelu dedi-edhela irana vinjinji kwaranya vinofuna Yohova ira niviirengana?c Mwaimbarimbari khabe. Ee-no akala kamunooda irana vyongo vinjinji vom’labela Yohova namwasa wa moda uli vyongo vaingumiinyu, mudhilimbi-edhenga irana vinaodenyo. Mwaifwanafwani-o, venango munooda dhilimbi-edha funji-a azombwe nolimbi-a atu oulula. Venango munooda ira masaka-edho oi mulimbi-e mutu mwinangwee vodhowa nyumbaniwee, vom’ligarela venango m’tumizela milanyu. Yohova unodha uraeli-ani thitho ukami-ani mwadhilimbi-edhanga kaana vifunelo vinaodenyo vikwakwaneli-edha. Thitho muthuulelenga ira vachineneeva, ninokaana ngari yom’labela Yohova muilambo ipya mundhila dhapama maningi dhoi kaninadhithuulelevo. Vyevi ndi vyam’kami-idhe Holly um’mongile i-yo mundima ivirile. Liye atoomari-a na madhu oonga ira: “Ndaroma kaana mathuulelo ofooki-a, ndinothuulela ira ‘nditokaana ngari yodhakaana ingumi yo-omala modhowa nodhowa.” Nakami-o la Yohova, ndinodha kwakwaneli-edha vifunelo vyanga muilambo ipya.

14. N’nga ndi yongo inango ivi inoiri-a thitho ira na-asangalalenga?

¹⁴ Yongo 3: Dhiveliwana vyosangalali-a. Atu enango ano-indi-edha basa mamburo owaredhela ava internetini anoiri-a atu kaana mathuulelo oi mutu unooda kala osangalala thitho okwakwanana namwasa okalelanga irana vyongo vinosangalalana liye. Ee-no ninooda roma kaana mathuulelo oi naroma irana vyongo vinosangalalana i-yo, gula vyongo vinofuna i-yo, thitho wenda maburo o-iyana-iyana, panofunadi i-yo kala osangalala. Pyaimbarimbari ira kai vyodaweya irana vyongo vinosangalalana i-yo. Yohova anipanduchile mundhila yoi niodenga sangalalana vyongo vyobaleya. Mbwenye atu anjinji tatoozindiyela ira vyongo vinothuulela aliwa ira vinooda akami-a ira tasangalalenga ndivyevyo thitho vinoairi-a ira ta-asangalalenga. Eva, oi ndi Painiya aongile ira, “Wakalelanga irana vyongo vinousangalali-a unongofuna ira udhowenganave viirana.” Hora dhothene nakalelanga irana vyongo vinonisangalali-a, vyo-arelavovyee pyoi ninokala o-osangalala na okhumbanya.

15. N’nga ninafunjedhevon’ni vavyongo vyaireele Mwene Solomu?

¹⁵ Mwene Solomu atooirana vyongo vyo-iyana-iyana ira aone akala vinom’kami-a kala osangalala. Mwaifwanafwani-o, liye anoodya vyodya vyapama vyo-iyana-iyana, anoovuruwana nyumbo dhosangalali-a nogula vyongo vyapereso yavadhulu. Mbwenye vyongo vyevi kavyam’kami-idhe ira akalenga osangalala. Liye atoonga ira: “Litho kalinochenyela noing’ana, thitho libaru kalinochenyelana uvwa.” (Nam. 1:8; 2:1-11) Mathuulelo aatu amuilamboi vamwasa wa vyongo vinairi-e mutu kaladi osangalala ali ninga kobiri yainyengo. Inooneya ninga yokami-a, mbwenye kunooda gulana yongo iliyothene.

16. N’nga kala ova-a unanikami-e a-vi ira nirome okoka kala osangalala? (Muone thitho viruthiruthi.)

¹⁶ Vyongo vinanikami-e ira nirome okoka kala osangalala. Yesu atoonifunji-a ira: “Va-a unosangalali-a maningi kwaranya wachela.” (May. 20:35) Alekos oi ndi ndimuwa wavapingoni aongile ira: “Ndinodhilimbi-edha irana vyongo ving’ono ving’ono vyoi vinooda kami-a atu enango. Ndadhilimbi-edhanga kami-a atu enango, ndino-iya thuulelanga vinofuna miyo baa-i thitho vyevi vinondikami-a ira ndikale osangalala.” N’nga ndi vyongo vinango vivi vinaire nyo ira mukami-e atu enango? Mwaifwanafwani-o, akala mutozindiyela ira mutu mwinango utosukwala, munooda dhilimbi-edha m’limbi-a. Venango kamunooda mali-a nyarwadhee, mbwenye munooda m’limbi-a akala mutom’vuruwana mwatangaranga, m’thonyi-edha ira munovwechecha moda unovwela liye thitho m’limbi-a ira arulelenga Yohova vyokhumbanyi-avyee. (Sal. 55:22; 68:19) Munooda m’kami-a thitho zindiyela ira Yohova kam’iidhe. (Sal. 37:28; Esa. 59:1) Munooda ira vyongo vinango vyothonyi-edha ira munom’thuulela ninga m’phiyela yodya venango m’dhowanee mapaxiali. Munooda m’vepha ira muwende vambo-i na liye muurumiwini, vyoi vinooda kami-a ira asangalalenga maningi. Murumelega ira Yohova au-indi-edhengani basa volimbi-a atu enango. Nalabi-edhanga basa hori-u kami-a atu enango, vinokami-a ira nisangalalengadi mwaimbarimbari.—San. 11:25.

17. N’nga kala vauxamwali olimba na Yohova unanikami-e a-vi ira nisangalalenga? (Salimo 43:4)

¹⁷ Ninooda sangalalanga mwaimbarimbari akala ninodhowanave m’mwidhiwa Yohova nodhilimbi-edha m’sangalali-anga. Bibilya linonisikimizela ira Yohova ngunonikami-a ira ‘nisangalalenga maningi.’ (Muleri Salimo 43:4.) Ee-no masiki nigumanena vyorucha vyoi a-vi vaingumii-u kaninofwanela khumbanyanga maningi venango ovanga modhowa nodhowa. Ee-no dhoweni nidhowenave kala vauxamwali olimba na Yohova oi ngunanikami-e kala osangalala mudhowa nodhowa.—Sal. 144:15.