YOFUNJEDHA 07
N’nga Yohova ngoi a-vi?
N’nga nyo munothuulela ira Yohova Nlungu ngoi a-vi? N’nga munoona ira ngodabwi-a maningi thitho uli undendai ninga mwemo mukalenle nyenyedi dhulu? Venango munoona ira ngwakopolo maningi ninga ndhari thitho kana makalelo apama aliothene? N’nga Yohova ngoi a-vi? Yohova unoonga vya makalelwee Bibilyani, thitho unothonyi-edha ira unoudhiveliwanani.
1. Mwasiwa ngwan’ni kaninaode m’mona Nlungu?
“Nlungu ngu zimu.” (Juwau 4:24) Yohova kana tutu ninga li-uli. Liye ngu zimu thitho unokala dhulu wa-anaode i-yo ona.
2. N’nga mbamakalelo a-vi ana Yohova?
Angalive ira kaninaode m’mona Yohova, liye utokalaodi thitho utokaana makalelo anoniiri-a ira nimdhiveliwengana maningi. Bibilya linoonga ira: “Yohova unodhiveliwana longomano, thitho kanodha i-yachi atwee ororomeleya.” (Salimo 37:28) Linoonga thitho ira liye “ngwaudhivela ulukulu na tangaranga,” simbwasimbwa waatu enao anorucheya. (Yakobo 5:11) Yohova uli vakwikwi naatu otweya rima, liye unovulumucha atu ovivwela tangaranga.” (Salimo 34:18, madhu a chindo) N’nga nyo mutoidhiwa ira vyoira vi-u vinokuza Yohova? Mutu asakula irana vyongo vyothakala, Yohova unosukwala thitho unovwa tangaranga. (Salimo 78:40, 41) Mbwenye mutu unoirana vyongo vyapama, unomdhiveliwi-a Nlungu.—Muleri Sanganiko 27:11.
3. N’nga Yohova unothonyi-edha a-vi ira unonidhiveliwana?
Kalelo nlukulu la Yohova nguudhivela. Thitho Bibilya linoonga ira “Nlungu ngudhivelo.” (1 Juwau 4:8) Ninoona umboni oi Yohova unonidhiveliwana naleringa Bibilya thitho naona vyongo vipanduchile liye. (Muleri Mayirelo 14:17) Ifwanafwani-o, ndi moda unipanduchile liye. Mofwanafwani-a, atonipanducha ira nionenga baleya wa mitundu yo-iyana-iyana ya vyongo, vuruwana nyumbo dhapama, thitho uvwa riya wa yodya. Vyevi vinothonyi-edha ira unofuna ira nisangalalenga na ingumi.
FUNJEDHANI VINJINJI
Sakasakani ira muidhiwe ino-indi-edha basa Yohova ira asaka-edhe vyongo vyodabwi-a. Mwamala muone moda unothonyi-edha Yohova makalelwee odabwi-a.
4. Zimu ochena—tikopolo dha Nlungu dholaba basa
Yohova uno-indi-edha basa zimu ochena ninga mwemo muno-indi-edhela i-yo basa mandhi-u. Bibilya linoonga ira zimu ochena kai mutu, mbwenye tikopolo dha Nlungu dhinolaba na liye basa. Muleri Luka 11:13 na Mayirelo 2:17, mwamala mutapanye vyofuka vyo-arelavi:
Nlungu “unova-a” zimu ochena waatu anomvepa. N’nga nyo munothuulela ira zimu ochena ngu mutu venango kopolo dha Nlungu dholaba basa? Mwasiwa ngwan’ni munoonga e-no?
Yohova uno-indi-edha basa zimu ochena vofuna saka-edha vyongo vyodabwi-a maningi. Muleri Salimo 33:6 na 2 Pedru 1:20, 21, mwamala mutapanye yofuka yo-arelai:
N’nga Yohova uno-indi-edhela basa zimwee ochena mwandhila dhinango dhiivi?
5. Yohova utokaana makalelo apama
Mose anoolabela Nlungu mororomeleya, mbwenye anoofuna m’mwidhiwa pama namapanduchuo. Voi ee-no, Mose atomvepa Yohova ira: “Ndiidhiwi-eni ndhila dhinyu ira nduuidhiweni.” (Ekisodo 33:13) Vowakula, Yohova atom’kami-a Mose idhiwa makalelwee enango. Muleri Ekisodo 34:4-6, mwamala mutapanye vyofuka vyo-arelavi:
N’nga Yohova akami-idhe Mose zindiela makalelo a-vi?
N’nga mbamakalelo a-vi a Yohova anousangalali-ani maningi?
6. Yohova unoadhiveliwana maningi atu
Aebere oi tali atu a Nlungu, tali adhaari wu Iguptu. N’nga Yohova avivwa a-vi aliwa taoni-iwanga nyarwa? Muvuruwane AUDIO thitho mu-arele, venango muleri Ekisodo 3:1-10. Mwamala mutapanye vyofuka vyo-arelavi.
N’nga mwasula unothonyi-edha ira Yohova unovwa a-vi aonanga atwee taoni-iwanga nyarwa?—Muone versu 7, na 8.
N’nga nyo munothuulela ira Yohova ngofunechecha kami-a atu? N’nga unowakami-adi? Mwasiwa ngwan’ni munoonga e-no?
7. Vyopanduchiwa vinothonyi-edha makalelo a Yohova
Yohova unothonyi-edha makalelwee dhela mu vyongo vipanduchile liye. Muonele VIDIYO. Thitho muleri Aroma 1:20, mwamala mutapanye yofuka yo-arelai.
N’nga mbamakalelo a-vi a Yohova anoonanyo dhela mu vyongo vipanduchile liye?
ATU ENANGO ANOONGA IRA: “Nlungu kai mutu, mbwenye tikopolo baa-i dhinofwanyeya valivothene.”
N’nga nyo munothuulela a-vi?
N’nga mwasiwa ngwan’ni munothuulela e-no?
MAKUNDO OGWANDELA
Yohova ngu zimu thitho kaninooda m’mona, utokaana makalelo apama thitho kalelolee nlukulu nguudhivela.
Vyofuka vyowelela
Mwasiwa ngwan’ni kaninooda m’mona Yohova?
N’nga zimu ochena chini?
Ongani makalelo enango ana Yohova?
IDHIWANI VINJINJI
Idhiwani vinjinji vyoonga Yohova nofunjedha makalelo 4 odabwi-a ana liye.
“Kodi Mulungu Ali Ndi Makhalidwe Otani?” (Nsanja ya Olonda, N.º 1 wa 2019)
Muone umboni osikimizeleya ira Yohova kanafwanyeya valivothene hora iliyothene.
“Kodi Mulungu Amangopezeka Pena Paliponse?” (Mwasa wavasaiti)
Muone mwasiwa Bibilya munofwanafwani-edhela aliwa zimu ochena na mandha a Nlungu.
Mutu unango o-oona athuulela ira Nlungu kanomdhiveliwana. Kaonani vyamkami-idhe ira achinje mathuulelwee.
“Panopa Ndimaona Kuti Ndingathe Kuthandiza Ena” (Nsanja ya Olonda, 1 wa Outubro wa 2015)