• Nzembo 74:maloba ya ebandeli ya loyembo-23
    Biblia Libongoli ya Mokili ya Sika

    • Maskile. Ya Asafe.+

      74 Ee Nzambe, mpo na nini obwaki mpo na seko?+

      Mpo na nini nkanda na yo ezali kaka kopelela etonga ya esika na yo ya koleisa bibwɛlɛ matiti?+

       2 Kanisá liyangani na yo oyo ozwaki banda kala,+

      Libota oyo osikolaki mpo ezala libula na yo,+

      Ngomba Siona epai ofandaki.+

       3 Kende na bisika ya libebi oyo ezali koumela ntango molai.+

      Monguna abebisi eloko nyonso na esika mosantu.+

       4 Baoyo bazali banguna na yo bagangi na katikati ya esika na yo ya kokutana.+

      Batɛlɛmisi bilembo+ na bango moko.

       5 Ayebani ete azali lokola moto oyo atombolaka basóka mpo na kokata mwa banzete ya zamba.

       6 Mpe sikoyo, na basóka ya mike mpe na mabaya oyo batyá bibende na nsɔngɛ, bazali kutu kobuka mayemi nyonso ya esika mosantu.+

       7 Babwaki esika na yo mosantu na mɔtɔ.+

      Bakómisi tabernakle ya nkombo na yo eloko mpamba tii na mabele.+

       8 Bango, ɛɛ bana na bango, balobi bango nyonso na motema na bango ete:

      “Na mokili, bakotumba bisika nyonso ya kokutana ya Nzambe.”+

       9 Tomoni bilembo na biso te; mosakoli ata moko azali lisusu te,+

      Mpe moto ata moko te kati na biso ayebi soki ezali ntango boni.

      10 Ee Nzambe, kino ntango nini monguna akokoba kosambwisa?+

      Monguna akozanga limemya na nkombo na yo mpo na seko?+

      11 Mpo na nini ozali kaka kolongola lobɔkɔ na yo, ɛɛ lobɔkɔ na yo ya mobali+

      Na katikati ya ntolo na yo mpo na kosukisa biso?

      12 Mpe ata bongo, Nzambe azali Mokonzi na ngai banda kalakala,+

      Ye oyo apesaka lobiko monene na katikati ya mabele.+

      13 Yo moko oningisaki mbu na makasi na yo;+

      Obukaki mitó ya banyama ya nsɔmɔ ya mbu na kati ya mai.+

      14 Yo moko ozalaki kobukabuka mitó ya Leviatana.+

      Opesaki yango ezala bilei ya bato, ya baoyo bafandaka na bitúká oyo ezangá mai.+

      15 Yo nde okabolaki liziba mpe mokɛli;+

      Yo moko nde okaukisaki bibale oyo mai etíyolaka ntango nyonso.+

      16 Moi ezali ya yo; mpe, butu ezali ya yo.+

      Yo moko obongisaki engɛngiseli, ɛɛ moi.+

      17 Yo nde otyaki bandelo nyonso ya mabele;+

      Eleko ya molunge ná eleko ya mpiɔ​—yo moko osalaki yango.+

      18 Ee Yehova, kanisá likambo oyo: Monguna asambwisi,+

      Mpe bato ya bozoba bazangi limemya na nkombo na yo.+

      19 Kopesa nyama ya zamba molimo ya epopo+ na yo te.

      Kobosana bomoi ya bato na yo ya mpasi mpo na seko te.+

      20 Talá kondimana,+

      Mpo bisika ya molili ya mabele ekomi bisika oyo mobulu etondi.+

      21 Ee moto oyo atutami, asambwa te.+

      Moto ya mpasi mpe mobola básanzola nkombo na yo.+

      22 Ee Nzambe, tɛlɛmá, talelá likambo na yo ya kosamba.+

      Kanisá kosambwisa oyo moto ya bozoba azali kosambwisa yo mokolo mobimba.+

      23 Kobosana te mongongo ya baoyo bazali banguna na yo.+

      Makɛlɛlɛ ya baoyo bazali kotɛlɛmɛla yo ezali komata ntango nyonso.+