Mokanda ya liboso ya Samwele

7 Bongo mibali ya Kiriate-yearime bayaki mpe bazwaki Sanduku ya Yehova, bakendaki na yango na ndako ya Abinadabe+ na ngomba moke, mpe baponaki* Eleazare mwana na ye ya mobali mpo abatela Sanduku ya Yehova.

2 Mbula 20 elekaki banda mokolo oyo Sanduku eyaki na Kiriate-yearime. Na ntango yango, ndako mobimba ya Yisraele ekómaki koluka* Yehova.+ 3 Na nsima, Samwele alobaki na bato* ya Yisraele ete: “Soki bolingi kozongela Yehova na motema na bino mobimba,+ bólongola banzambe ya bapaya+ mpe bikeko ya Ashitorete+ oyo ezali epai na bino, mpe bómipesa mobimba na Yehova mpe bósalela kaka ye.+ Na bongo akobikisa bino na lobɔkɔ ya Bafilistia.”+ 4 Na yango, Bayisraele balongolaki bikeko ya Babaala mpe ya Ashitorete, mpe basalelaki kaka Yehova.+

5 Na nsima, Samwele alobaki: “Bóyanganisa Yisraele mobimba na Mizipa,+ mpe nakobondela Yehova mpo na bino.”+ 6 Bongo bayanganaki na Mizipa, batokaki mai, basopaki yango liboso ya Yehova, mpe bakilaki bilei na mokolo yango.+ Kuna, balobaki ete: “Tosaleli Yehova lisumu.”+ Mpe Samwele akómaki mosambisi+ ya Bayisraele na Mizipa.

7 Ntango Bafilistia bayokaki ete Bayisraele bayangani na Mizipa, bankolo ya Bafilistia+ bamataki mpo na kobundisa Yisraele. Mpe ntango Bayisraele bayokaki yango, bakómaki kobanga mpo na Bafilistia. 8 Na yango, Bayisraele balobaki na Samwele: “Kotika te kobelela Yehova Nzambe na biso, mpo asalisa biso+ mpe abikisa biso na lobɔkɔ ya Bafilistia.” 9 Bongo Samwele azwaki mwana-mpate oyo ezali naino komɛla mabɛlɛ mpe apesaki yango mobimba epai ya Yehova lokola likabo ya kotumba;+ mpe Samwele abelelaki Yehova mpo na kosɛngela Yisraele lisalisi, mpe Yehova ayanolaki ye.+ 10 Ntango Samwele azalaki kopesa likabo yango ya kotumba, Bafilistia bapusanaki mpo na kobundisa Yisraele. Yehova asalaki ete bankake ebɛta makasi+ epai ya Bafilistia, mpe atyaki bango na mobulungano.+ Na bongo, Yisraele elongaki bango.+ 11 Na yango, mibali ya Yisraele babimaki na Mizipa, balandaki Bafilistia mpe bazalaki koboma bango nzelanzela tii na sudi ya Bete-kare. 12 Na nsima, Samwele azwaki libanga moko+ mpe atyaki yango na katikati ya Mizipa ná Yeshana mpe apesaki yango nkombo Ebenezere,* mpo alobaki: “Tii sikoyo, Yehova asalisi biso.”+ 13 Ndenge wana nde Bayisraele balongaki Bafilistia; mpe bakɔtaki lisusu na teritware ya Yisraele te.+ Mpe lobɔkɔ ya Yehova ekobaki kotɛmɛla Bafilistia mikolo nyonso ya Samwele.+ 14 Lisusu, Bayisraele bazwaki bingumba oyo Bafilistia babɔtɔlaki bango banda na Ekrone tii na Gate. Mpe bazwaki lisusu bateritware na bango na lobɔkɔ ya Bafilistia.

Lisusu, kimya ezalaki kati na Bayisraele ná Baamore.+

15 Samwele akobaki kosambisa Yisraele bomoi na ye mobimba.+ 16 Mbula na mbula, azalaki kokende na Betele,+ na Gilgale+ mpe na Mizipa,+ mpe azalaki kosambisa Yisraele na bisika wana nyonso. 17 Kasi azalaki kozonga na Rama,+ mpo ndako na ye ezalaki kuna. Azalaki mpe kosambisa Yisraele kuna. Atongelaki Yehova etumbelo moko kuna.+