Mokanda ya liboso ya Ntango

28 Bongo Davidi ayanganisaki bankumu nyonso ya Yisraele na Yerusaleme: bankumu ya mabota, bakonzi ya bituluku+ oyo ezalaki kosalela mokonzi, bakonzi ya bato nkóto mpe bakonzi ya bato nkama,+ bakonzi ya biloko mpe banyama nyonso ya mokonzi+ ná bana+ na ye, elongo na basali minene ya ndako ya mokonzi mpe mibali nyonso ya nguya mpe ya mpiko.+ 2 Bongo Mokonzi Davidi atɛlɛmaki mpe alobaki boye:

“Bandeko na ngai mpe bato na ngai, bóyoka ngai. Na motema na ngai, nazalaki na mposa ya kotonga ndako mpo ezala esika ya* sanduku ya kondimana ya Yehova mpe ezala ebonga mpo na makolo ya Nzambe na biso,+ mpe nabongisaki biloko mpo na kotonga yango.+ 3 Kasi Nzambe ya solo alobaki na ngai boye: ‘Yo te moto okotonga ndako mpo na nkombo na ngai,+ mpo ozali moto ya bitumba, mpe osopá makila.’+ 4 Nzokande, Yehova Nzambe ya Yisraele aponaki ngai na libota mobimba ya tata na ngai, mpo nakóma mokonzi ya Yisraele mpo na libela,+ mpo aponaki Yuda azala mokambi,+ mpe na libota ya Yuda aponaki ndako ya tata na ngai,+ mpe na bana ya tata na ngai, andimaki nde ngai mpo akómisa ngai mokonzi na Yisraele mobimba.+ 5 Mpe na bana na ngai nyonso (mpo Yehova apesi ngai bana ebele),+ aponaki mwana na ngai Salomo+ mpo afanda na kiti ya bokonzi ya Yehova mpo na koyangela Yisraele.+

6 “Alobaki na ngai boye: ‘Mwana na yo Salomo nde akotonga ndako na ngai mpe mapango na ngai, mpo naponi ye azala mwana na ngai, mpe ngai nakokóma tata na ye.+ 7 Nakopika makasi bokonzi na ye mpo na libela+ soki atiki te kotosa mibeko na ngai mpe bikateli na ngai ya lisambisi,+ ndenge azali kosala sikoyo.’ 8 Yango wana nalobi na miso ya Yisraele mobimba, lisangá ya Yehova, mpe liboso ya Nzambe na biso oyo azali koyoka biso: Bóluka koyeba mibeko nyonso ya Yehova Nzambe na bino mpe bótosa yango malamumalamu, mpo bózwa mokili malamu+ mpo na libela mpe bótikela yango bana na bino lokola libula nsima na bino.

9 “Mpe yo, mwana na ngai Salomo, yebá Nzambe ya tata na yo mpe salelá ye na motema mobimba+ mpe na molimo* ya esengo;* mpo Yehova atalatalaka na kati ya mitema nyonso,+ mpe asosolaka mposa mpe makanisi nyonso.+ Soki oluki ye, akosala ete omona ye,+ kasi soki otiki ye, akobwaka yo mpo na libela.+ 10 Sikoyo talá, Yehova aponi yo mpo otonga ndako oyo ekozala esika mosantu. Zalá na mpiko mpe bandá mosala.”

11 Bongo Davidi apesaki mwana na ye Salomo plan ya botongi+ mpo na ndako ya kokɔtela+ mpe biteni na yango,* bisika ya kobomba biloko, bashambrɛ ya likoló, bashambrɛ ya kati, mpe ndako ya ezipeli ya kozipa masumu.*+ 12 Apesaki ye plan ya botongi mpo na eloko nyonso oyo elimo ya Nzambe eyebisaki ye, mpo na mapango+ ya ndako ya Yehova, mpo na bisika ya kolya pembenipembeni na yango, mpo na bisika ya kobomba biloko ya motuya ya ndako ya Nzambe ya solo, mpe bisika ya kobomba biloko ya motuya oyo esantisami.*+ 13 Apesaki ye mpe malako mpo na bituluku ya banganga-nzambe+ mpe ya Balevi, mpo na misala nyonso ya kosala na ndako ya Yehova, mpe mpo na bisaleli nyonso ya mosala ya ndako ya Yehova. 14 Ayebisaki mpe kilo boni ya wolo esengeli mpo na kosala bisaleli nyonso ya misala ndenge na ndenge, kilo ya bisaleli nyonso ya palata, mpe mpo na bisaleli nyonso ya misala ndenge na ndenge. 15 Alobelaki mpe kilo ya bitɛlɛmiselo ya miinda ya wolo+ ná miinda na yango ya wolo, kilo ya bitɛlɛmiselo ndenge na ndenge ya miinda ná miinda na yango, mpe kilo ya bitɛlɛmiselo ya miinda ya palata, mpo na etɛlɛmiselo mokomoko ya mwinda ná miinda na yango, na kolanda ndenge oyo bakosalela yango. 16 Alobelaki mpe kilo ya wolo mpo na bamesa ya mampa ya kotanda,*+ mpo na mesa mokomoko, mpe palata mpo na bamesa ya palata; 17 mpe kilo ya wolo mpo na nkanya, mabakuli, bilokó ya wolo ya pɛto, mpe kilo ya mabakuli ya mike ya wolo,+ mpo na kibakuli mokomoko ya moke, mpe kilo ya mabakuli ya mike ya palata, mpo na kibakuli mokomoko ya moke. 18 Apesaki mpe kilo ya wolo oyo epɛtolami mpo na kosala etumbelo ya mpaka ya malasi+ mpe mpo na bililingi ya likalo,+ elingi koloba, bakeruba+ ya wolo oyo mapapu na yango esembolami mpe ezipi sanduku ya kondimana ya Yehova. 19 Davidi alobaki: “Yehova atambwisaki ngai* mpe apesaki ngai mayele ya kososola mpo nakoma makambo nyonso ya plan ya botongi.”+

20 Na nsima Davidi alobaki na mwana na ye Salomo ete: “Zalá na mpiko mpe na makasi mpe bandá mosala. Kobanga te mpe kozala na nsɔmɔ te, mpo Yehova Nzambe, Nzambe na ngai, azali na yo.+ Akotika yo te mpe akosundola yo te;+ kasi akozala na yo tii ntango mosala nyonso mpo na ndako ya Yehova ekosila. 21 Mpe talá bituluku ya banganga-nzambe+ mpe ya Balevi+ oyo bakosala misala nyonso ya ndako ya Nzambe ya solo. Ozali mpe na basali oyo bamipesi bango moko, oyo bayebi misala ya ndenge nyonso,+ mpe lisusu bankumu+ mpe bato nyonso oyo bakotosa malako na yo nyonso.”