Basambisi

21 Bongo mibali ya Yisraele balapaki ndai na Mizipa+ ete: “Moko te kati na biso akopesa mwana na ye ya mwasi epai ya mobali moko ya Benyamina mpo azala mwasi na ye.”+ 2 Na yango, bato bayaki na Betele,+ bafandaki wana liboso ya Nzambe ya solo tii na mpokwa, mpe bazalaki kolela mingi mpenza. 3 Mpe bazalaki koloba: “Ee Yehova Nzambe ya Yisraele, mpo na nini likambo oyo esalami na Yisraele? Mpo na nini libota moko esengeli kozanga na Yisraele lelo oyo?” 4 Na mokolo oyo elandaki, bato balamukaki ntɔngɔntɔngɔ mpe batongaki etumbelo moko kuna mpo na kopesa makabo ya kotumba mpe makabo ya kimya.*+

5 Bongo bato ya Yisraele balobaki: “Nani kati na mabota nyonso ya Yisraele amataki te mpo na koyangana liboso ya Yehova?” mpo balapaki ndai moko monene ete moto nyonso oyo amataki te epai ya Yehova na Mizipa akobomama mpenza. 6 Na yango bato ya Yisraele bayokaki mawa mpo na likambo oyo ekómelaki ndeko na bango Benyamina. Balobaki: “Lelo oyo, libota moko elongolami na Yisraele. 7 Tosengeli kosala nini mpo na kosalisa baoyo batikali bázwa basi, awa biso tolapi ndai na nkombo ya Yehova+ ete tokopesa bango bana na biso ya basi te mpo bázala basi na bango?”+

8 Batunaki boye: “Libota nini kati na mabota ya Yisraele emataki te epai ya Yehova na Mizipa?”+ Emonanaki ete ata moto moko te ya Yabeshe-gileade ayaki na kaa epai lisangá ezalaki. 9 Ntango batángaki bato, bamonaki ete ata mobali moko te oyo afandaka na Yabeshe-gileade azalaki wana. 10 Na yango liyangani etindaki mibali 12 000 kati na mibali oyo balekaki mpenza makasi. Bapesaki bango mitindo ete: “Bókende mpe bóbɛta mpenza bato oyo bafandi na Yabeshe-gileade na mopanga, ata mpe basi ná bana.+ 11 Talá oyo bokosala: Bosengeli koboma mobali nyonso mpe mwasi nyonso oyo asangisá nzoto na mobali.” 12 Kati na bato oyo bafandi na Yabeshe-gileade, bakutaki bana basi 400 oyo bazalaki bangɔndɔ mpe basangisá naino nzoto na mibali te. Bongo bamemaki bango na kaa, na Shilo,+ oyo ezali na mokili ya Kanana.

13 Na nsima, liyangani mobimba etindaki maloba epai ya Babenyamina oyo bazalaki na libanga ya Rimone+ mpo na koyebisa bango ete balingi kozongisa kimya. 14 Bongo na ntango wana, Babenyamina bazongaki na mokili na bango. Bayisraele bapesaki bango basi oyo batikaki na bomoi kati na basi ya Yabeshe-gileade,+ kasi basi yango bakokaki te mpo na bango nyonso. 15 Mpe bato bayokaki mawa mpo na likambo oyo ekómelaki Benyamina,+ mpo Yehova atyaki bokabwani kati na mabota ya Yisraele. 16 Bankulutu ya liyangani balobaki boye: “Tosengeli kosala nini mpo na kosalisa mibali oyo batikali bázwa basi, awa basi nyonso ya Benyamina basili?” 17 Bazongisaki: “Libula esengeli kozala mpo na Babenyamina oyo babikaki, mpo libota moko elongolama te na Yisraele. 18 Kasi biso, tokoki kopesa bana na biso ya basi epai na bango te, mpo bato ya Yisraele balapaki ndai ete: ‘Moto oyo akopesa moto ya Benyamina mwasi alakelama mabe.’”+

19 Na nsima, balobaki: “Talá! Fɛti ya Yehova ezalaka mbula na mbula na Shilo,+ oyo ezali na nɔrdi ya Betele mpe na ɛsti ya balabala monene oyo ematá banda na Betele tii na Shekeme mpe na sudi ya Lebona.” 20 Na yango, bapesaki mibali ya Benyamina mitindo ete: “Bókende kobombana na bilanga ya vinyo. 21 Mpe ntango bokomona bilenge basi* ya Shilo babimi mpo na kobina mabina ya kobaluka, mokomoko na bino asengeli kobima na bilanga ya vinyo mpe kokanga mwasi moko mpo na ye kati na bilenge basi ya Shilo, mpe bosengeli kozonga na mokili ya Benyamina. 22 Mpe soki batata na bango to bandeko na bango ya mibali bayei komilela mpo na biso, tokoyebisa bango: ‘Bómonisela biso boboto mpo na bango, mpo tokokaki te kozwela mokomoko na bango mwasi na nzela ya etumba,+ mpe bokokaki te kopesa bango basi kozanga ete bómema ngambo.’”+

23 Na yango mibali ya Benyamina basalaki kaka bongo; mokomoko akangaki mwasi moko mpo na ye kati na basi oyo bazalaki kobina. Nsima na yango, bazongaki na teritware ya libula na bango mpe batongaki lisusu bingumba na bango+ mpe bafandaki kuna.

24 Mpe na ntango yango, Bayisraele bapalanganaki, moto na moto azongaki na teritware ya etuluka na ye mpe ya libota na ye. Na yango balongwaki kuna, mpe moto na moto azongaki na teritware ya libula na ye.

25 Na mikolo yango, ezalaki na mokonzi te na Yisraele.+ Moto na moto azalaki kosala oyo ezali malamu na miso na ye moko.*