Yirimia
13 Talá oyo Yehova alobi na ngai: “Kende, mpe sombá mokaba ya lini mpe latá yango na loketo na yo, kasi kopɔlisa yango na mai te.” 2 Bongo nasombaki mokaba yango na kolanda liloba ya Yehova mpe nalataki yango na loketo na ngai. 3 Mpe Yehova alobaki na ngai mpo na mbala ya mibale ete: 4 “Zwá mokaba oyo osombaki, oyo olati na loketo na yo, mpe tɛlɛmá, kende na Efrate, mpe bombá yango kuna na lidusu ya libanga.” 5 Bongo nakendeki mpe nabombaki yango pembeni ya Efrate, kaka ndenge Yehova apesaki ngai mitindo.
6 Kasi nsima ya mikolo mingi Yehova alobaki na ngai ete: “Tɛlɛmá, kende na Efrate mpe zwá mokaba oyo napesaki yo mitindo ete obomba yango kuna.” 7 Bongo nakendeki na Efrate, natimolaki mpe nazwaki mokaba yango na esika oyo nabombaki, mpe namonaki ete mokaba yango ebebaki; ezalaki lisusu na ntina te.
8 Bongo Yehova alobaki na ngai ete: 9 “Talá oyo Yehova alobi: ‘Ndenge wana nde nakobebisa lolendo ya bato ya Yuda mpe lolendo mingi ya bato ya Yerusaleme.+ 10 Bato mabe oyo bazali koboya kotosa maloba na ngai,+ baoyo na motó makasi na bango nyonso bazali koyokela motema na bango moko+ mpe baoyo bazali kosambela banzambe mosusu, basaleli mpe bagumbameli bango, bakokóma kaka lokola mokaba oyo ezali mpenza lisusu na ntina te.’ 11 ‘Mpo kaka ndenge mokaba ekangamaka na loketo ya moto, ndenge wana nde nasalaki ete ekólo* mobimba ya Yisraele mpe ekólo mobimba ya Yuda ekangama na ngai,’ Yehova alobi bongo, ‘mpo ekóma epai na ngai ekólo,+ nkombo,+ lisanzoli, mpe eloko moko ya kitoko. Kasi etosaki te.’+
12 “Mpe osengeli koyebisa bango boye: ‘Talá oyo Yehova Nzambe ya Yisraele alobi: “Elokó nyonso ya monene esengeli kotondisama na vinyo.”’ Mpe bakoyanola yo ete: ‘Biso toyebi nde te ete elokó nyonso ya monene esengeli kotondisama na vinyo?’ 13 Okoloba na bango boye: ‘Talá oyo Yehova alobi: “Nazali kotondisa mpe kolangwisa bato nyonso oyo bafandi na mokili oyo,+ bakonzi oyo bafandi na kiti ya bokonzi ya Davidi, banganga-nzambe, basakoli, mpe bato nyonso oyo bafandi na Yerusaleme. 14 Mpe nakotutanisa bango na bango, batata ná bana,” Yehova alobi bongo.+ “Nakomonisa motema mawa te, nakoyoka mpasi na motema ata moke te, nakoyokela bango mawa ata moke te, eloko moko te ekopekisa ngai naboma bango.”’+
15 Bóyoka mpe bótya likebi.
Bózala na lolendo te, mpo Yehova alobi.
16 Bópesa Yehova Nzambe na bino nkembo
Liboso ete ayeisa molili
Mpe liboso ete makolo na bino ebɛta libaku likoló ya bangomba na ebandeli ya molili.
Bokozala na elikya ya komona pole,
Kasi akosala ete molili makasi ekɔta;
Akobongola yango molili makasi mpenza.+
Nakolela mingi mpe miso na ngai ekotonda na mai ya miso,+
Mpo etonga ya Yehova+ ememami lokola mokangami.
18 Lobá na mokonzi mpe mama-mokonzi* ete:+ ‘Bófanda na esika ya nse,
Mpo motole* na bino ya kitoko ekokwea, longwa na mitó na bino.’
19 Bingumba ya sudi ekangami,* moto akofungola yango azali te.
Bamemi bato nyonso ya Yuda na mboka mopaya. Bamemi bango nyonso mpenza.+
20 Tombolá miso na yo mpe talá baoyo bazali koya longwa na nɔrdi.+
Wapi etonga oyo bapesaki yo, etonga na yo ya kitoko?+
21 Ntango bato oyo omonaka lokola baninga na yo ya motema bakopesa yo etumbu, okoloba nini?+
Okoyoka mpasi te, lokola mpasi ya mwasi oyo alingi kobota?+
22 Mpe ntango oyo okoloba na motema na yo: ‘Mpo na nini makambo oyo ekweli ngai?’+
Ezali mpo na libunga monene oyo osali nde balongoli yo eteni ya nse ya elamba na yo,+
Mpe oyoki mpasi makasi na matindi na yo.
23 Mokushi* akoki nde kobongola loposo na ye to nkoi matɔnɔ na yango?+
Soki boye, bino mpe bokoki kosala malamu,
Bino baoyo boteyamá kosala mabe.
24 Boye nakopalanganisa bango ndenge mopɛpɛ ya mokili ekauká ememaka matiti ya blé.+
25 Yango nde libula na yo, eteni oyo namekeli yo,” Yehova alobi bongo,
26 Na yango nakotombola bilamba na yo tii na elongi na yo,
Mpe nsɔni na yo ekomonana,+
Mpe mposa makasi na yo ya kosangisa nzoto,
Bondumba na yo ya nsɔni.
Namoni makambo na yo ya bosɔtɔ likoló ya mwa bangomba na kati ya esobe.+
Mawa na yo, Ee Yerusaleme!
Tii ntango nini okokoba kozala mbindo?”+