Basambisi

19 Na mikolo wana, lokola mokonzi azalaki te na Yisraele,+ Molevi moko, oyo azalaki kofanda na nsuka mpenza ya etúká ya ngombangomba ya Efraime,+ azwaki mwasi moko* ya Beteleme+ na teritware ya Yuda mpo azala mwasi na ye. 2 Kasi mwasi yango azalaki sembo te epai na ye. Atikaki Molevi yango mpe akendaki na ndako ya tata na ye, na Beteleme, na Yuda. Afandaki kuna sanza minei. 3 Na nsima, mobali na ye alandaki ye mpo na kobondela ye azonga ndako; mobali yango akendaki elongo na mosaleli na ye mpe mpunda mibale. Bongo mwasi yango akɔtisaki ye na ndako ya tata na ye. Ntango tata ya elenge mwasi yango amonaki mobali yango, ayambaki ye na esengo mpenza. 4 Na yango, tata-bokilo na ye, elingi koloba tata ya elenge mwasi yango, atyaki ye mbamba afanda elongo na ye mikolo misato; mpe bazalaki kolya, komɛla, mpe mobali yango azalaki kolala kuna.

5 Na mokolo ya minei, ntango balamukaki ntɔngɔntɔngɔ mpo na kokende, tata ya elenge mwasi alobaki na mobali ya mwana na ye: “Lyá mwa eloko mpo epesa yo makasi,* na nsima bokoki kokende.” 6 Bongo bafandaki, balyaki mpe bamɛlaki elongo; nsima na yango, tata ya elenge mwasi alobaki na mobali yango: “Nabondeli yo, lalá lisusu awa na butu ya lelo, mpe lekisá ntango malamu.”* 7 Ntango mobali yango atɛlɛmaki mpo na kokende, tata-bokilo na ye azalaki kaka kobondela ye. Bongo mobali yango alalaki lisusu kuna.

8 Na mokolo ya mitano, ntango alamukaki ntɔngɔntɔngɔ mpo na kokende, tata ya elenge mwasi alobaki: “Nabondeli yo, lyá mwa eloko mpo epesa yo makasi.”* Bongo balekisaki ntango tii pene na mpokwa. Mpe bango nyonso mibale bazalaki se kolya. 9 Ntango mobali yango atɛlɛmaki mpo na kokende elongo na mwasi na ye mpe mosaleli na ye, tata-bokilo na ye alobaki na ye: “Talá, sikoyo! Mpokwa ebandi koya. Nabondeli bino, bólala. Talá moi elingi kolala. Bólala lisusu awa na butu ya lelo, mpe bólekisa ntango malamu. Lobi bokoki kolamuka ntɔngɔntɔngɔ mpo bósala mobembo mpe okozonga epai na yo.”* 10 Kasi mobali yango andimaki kolala lisusu kuna te. Na yango, atɛlɛmaki, abandaki mobembo na ye mpe akómaki tii na Yebusi, elingi koloba Yerusaleme.+ Azalaki na mpunda mibale oyo bakangisá kiti likoló na yango, ná mwasi na ye mpe mosaleli na ye.

11 Ntango bakómaki pene na Yebusi, molili ebandaki kokɔta. Na yango mosaleli alobaki na nkolo na ye: “Omoni boni? Tótɛlɛma na engumba oyo ya Bayebusi mpe tólala awa?” 12 Kasi nkolo na ye alobaki na ye: “Tosengeli te kotɛlɛma na engumba ya bapaya oyo bazali Bayisraele te. Tokokende tii na Gibea.”+ 13 Bongo alobaki na mosaleli na ye: “Yaká; tósala makasi mpo tókóma na Gibea to na Rama.+ Tokolala na moko ya bingumba yango.” 14 Na yango bakobaki nzela na bango, mpe moi ebandaki kolala ntango bakómaki pene na Gibea, na teritware ya Benyamina.

15 Bongo batɛlɛmaki wana mpe bakendaki mpo na kolala na Gibea. Ntango bakómaki kuna, bafandaki na esika monene ya bato nyonso ya engumba yango, kasi moto moko te ayambaki bango na ndako na ye mpo bálala kuna.+ 16 Nsukansuka, na mpokwa wana, mobange mobali moko autaki na mosala na ye ya bilanga. Mobali yango azalaki moto ya etúká ya ngombangomba ya Efraime,+ mpe azalaki kofanda na Gibea mpo na mwa ntango; kasi bafandi ya engumba yango bazalaki Babenyamina.+ 17 Ntango atalaki mpe amonaki moto ya mobembo na esika monene ya bato nyonso ya engumba, mobange yango atunaki ye: “Ozali kokende wapi, mpe outi wapi?” 18 Azongiselaki ye: “Touti na Beteleme, na Yuda, mpe tozali kokende na nsukansuka ya etúká ya ngombangomba ya Efraime. Kuna nde mboka na ngai. Nakendaki tii na Beteleme, na Yuda,+ mpe nazali kokende na ndako ya Yehova,* kasi moto moko te ayambi ngai na ndako na ye. 19 Tozali na matiti ya kokauka mpe bilei mingi mpo na bampunda na biso.+ Tozali mpe na mampa+ ná vinyo mpo na ngai, mwasi, mpe mosaleli na biso. Tozangi eloko moko te.” 20 Kasi, mobange mobali yango alobaki: “Kimya ezala na yo! Nakopesa yo nyonso oyo okozala na yango mposa. Kaka nde kolala na esika monene ya bato nyonso te.” 21 Na yango, mobange yango amemaki ye na ndako na ye mpe apesaki bampunda yango bilei. Na nsima, basukolaki makolo na bango, balyaki mpe bamɛlaki.

22 Wana bazalaki kolekisa ntango moko ya malamu, mibali mosusu ya engumba yango, bato ya mpambampamba, bazingaki ndako yango mpe bazalaki kobɛtabɛta porte, mpe bazalaki koloba na mobange mobali yango, nkolo-ndako, ete: “Bimisá mobali oyo akɔti na ndako na yo, mpo tósangisa na ye nzoto.”+ 23 Na yango, nkolo-ndako yango abimaki mpe alobaki na bango: “Te, bandeko na ngai, bósala likambo ya mabe te. Nabondeli bino, mobali oyo azali mopaya na ngai. Bósala likambo ya nsɔni boye te. 24 Mwana na ngai ya mwasi oyo ayebi naino mibali te, ná mwasi ya mobali yango, bazali awa. Nabimisa bango, bongo bokoki kosambwisa bango soki yango nde mposa na bino.*+ Kasi bosengeli te kosala mobali oyo likambo oyo ya nsɔni.”

25 Kasi mibali yango baboyaki koyokela ye. Bongo, mobali yango asimbaki mwasi na ye+ mpe abimisaki ye libándá. Basangisaki na ye nzoto na makasi mpe babebisaki ye butu mobimba tii na ntɔngɔ. Na nsima batikaki ye akende ntango ntɔngɔ ebandaki kotana. 26 Na ntɔngɔntɔngɔ, mwasi yango ayaki mpe akweaki liboso ya porte ya ndako ya mobange wana, esika mobali* na ye azalaki, mpe alalaki wana tii na ntango moi ebimaki. 27 Ntango mobali na ye alamukaki na ntɔngɔ mpe afungolaki baporte ya ndako mpo na kobima mpe kokoba mobembo na ye, amonaki mwasi na ye alali liboso ya ndako, mabɔkɔ na ye na nse ya porte. 28 Bongo alobaki na ye: “Tɛlɛmá tókende.” Kasi azalaki koyanola te. Na yango, mobali yango atyaki ye likoló ya mpunda mpe akendaki epai na ye.

29 Ntango akómaki epai na ye, azwaki mbeli ya koboma nyama, asimbaki nzoto ya mwasi na ye, mpe akataki yango eteni na eteni, na biteni 12. Na nsima, atindaki eteni moko na teritware mokomoko ya Yisraele. 30 Moto nyonso oyo amonaki yango azalaki koloba: “Likambo ya boye esalemá naino te, mpe emonaná naino te banda mokolo Bayisraele babimaki na mokili ya Ezipito tii na mokolo ya lelo. Bótalela likambo oyo,* bópesana makanisi,+ mpe bóyebisa biso oyo tosengeli kosala.”