Mokanda ya mibale ya Ntango

5 Bongo Salomo asilisaki mosala nyonso oyo asengelaki kosala mpo na ndako ya Yehova.+ Na nsima, Salomo amemaki biloko oyo tata na ye Davidi asantisaki,+ mpe atyaki palata, wolo, mpe biloko nyonso mosusu na bisika ya kobomba biloko ya motuya ya ndako ya Nzambe ya solo.+ 2 Na ntango yango, Salomo ayanganisaki bankulutu ya Yisraele, elingi koloba bankumu nyonso ya mabota mpe bankumu ya batata ya mabota ya Yisraele. Bayaki na Yerusaleme mpo na kozwa sanduku ya kondimana ya Yehova na Sité ya Davidi,+ elingi koloba na Siona.+ 3 Mibali nyonso ya Yisraele bayanganaki liboso ya mokonzi na fɛti* oyo esalemaka na sanza ya nsambo.+

4 Bongo bankulutu nyonso ya Yisraele bayaki, mpe Balevi batombolaki Sanduku+ yango. 5 Bamemaki Sanduku, hema ya kokutana,+ mpe bisaleli mosantu nyonso oyo ezalaki na kati ya hema yango. Banganga-nzambe ná Balevi* nde bamemaki yango. 6 Mokonzi Salomo ná liyangani mobimba ya Yisraele oyo abengisaki bazalaki wana liboso ya Sanduku. Bapesaki mbeka ya bampate ná bangɔmbɛ ebele mpenza+ oyo ekokaki kotángama te. 7 Na nsima, banganga-nzambe bakɔtisaki sanduku ya kondimana ya Yehova na esika oyo ebongisami mpo na yango, na shambrɛ ya kati mpenza ya ndako, na Esika Eleki Mosantu, na nse ya mapapu ya bakeruba.+ 8 Na yango, mapapu ya bakeruba esembolamaki likoló ya esika oyo Sanduku ezalaki, bongo bakeruba yango bazipaki Sanduku ná banzete ya komemela yango,+ na likoló. 9 Banzete yango ezalaki milai, mpe bansɔngɛ na yango ezalaki komonana na Esika Mosantu, oyo ezali liboso ya Esika Eleki Mosantu,* kasi na libándá ezalaki komonana te. Mpe ezali kuna tii na mokolo ya lelo. 10 Eloko moko te ezalaki na kati ya Sanduku, kaka bitanda mibale oyo Moize atyaki na kati, na Horebe,+ ntango Yehova asalaki kondimana+ na bato ya Yisraele ntango babimaki na Ezipito.+

11 Ntango banganga-nzambe babimaki na esika mosantu (mpo banganga-nzambe nyonso oyo bazalaki wana, ezala ya etuluku nini,+ bamisantisaki),+ 12 Balevi nyonso oyo bazalaki bayembi,+ oyo bazalaki kokambama na Asafe,+ na Hemane,+ na Yedutune,+ mpe na bana na bango ná bandeko na bango, balataki bilamba ya kitoko, basimbi basɛmbalɛ, bibɛtɛlo ya bansinga ná banzɛnzɛ. Batɛlɛmaki na ɛsti ya etumbelo, mpe elongo na bango, banganga-nzambe 120 oyo bazalaki kobɛta kelelo.+ 13 Ntango bato oyo babɛtaka kelelo ná bayembi basangisaki mingongo mpo na kosanzola Yehova mpe kopesa ye matɔndi, mpe ntango lokito ya bakelelo, basɛmbalɛ, mpe bibɛtɛlo mosusu ya miziki eyokanaki ntango bazalaki kosanzola Yehova, “mpo azali malamu; bolingo na ye ya sembo ezali seko na seko,”+ tempelo, ndako ya Yehova, etondaki na lipata.+ 14 Banganga-nzambe bakokaki lisusu te kosala mosala na bango mpo na lipata yango, mpo nkembo ya Yehova etondaki na ndako ya Nzambe ya solo.+