Basambisi

1 Nsima ya liwa ya Yosua,+ Bayisraele* batunaki Yehova ete:+ “Nani kati na biso akomata liboso mpo na kobundisa Bakanana?” 2 Yehova ayanolaki: “Yuda nde ekomata liboso.+ Talá! Nakopesa* mokili yango na lobɔkɔ na ye.” 3 Bongo libota ya Yuda elobaki na libota ya Simeone, bandeko na bango ete: “Bóya tókende na teritware* oyo bapesaki biso+ mpo tóbundisa Bakanana. Na nsima, biso mpe tokokende na bino na teritware oyo bapesaki bino.” Na yango libota ya Simeone ekendaki elongo na bango.

4 Ntango libota ya Yuda ekendaki etumba, Yehova apesaki Bakanana ná Baperizi na mabɔkɔ na bango,+ mpe balongaki mibali 10 000 na Bezeke. 5 Bakutaki Adoni-bezeke na Bezeke mpe babundisaki ye kuna; balongaki Bakanana+ ná Baperizi.+ 6 Ntango Adoni-bezeke akimaki, balandaki ye, bakangaki ye mpe bakataki ye misapi minene ya mabɔkɔ mpe ya makolo. 7 Na nsima Adoni-bezeke alobaki: “Ezali na bakonzi 70 oyo nakataki misapi minene ya mabɔkɔ mpe ya makolo, mpe balɔkɔtaka bilei na nse ya mesa na ngai. Kaka ndenge nasalaki bango, Nzambe asali ngai mpe bongo.” Nsima na yango, bamemaki ye na Yerusaleme+ mpe akufaki kuna.

8 Lisusu, mibali ya Yuda babundisaki Yerusaleme+ mpe bazwaki yango; babomaki bato na mopanga mpe batumbaki engumba yango. 9 Nsima na yango, mibali ya Yuda bakitaki mpo na kobundisa Bakanana oyo bazalaki kofanda na etúká ya ngombangomba, na Negebe mpe na Shefela.+ 10 Bongo libota ya Yuda ekendaki kobunda na Bakanana oyo bazalaki kofanda na Hebrone (nkombo ya Hebrone ezalaki liboso Kiriate-arba), mpe balongaki Sheshai, Ahimane mpe Talamai.+

11 Balongwaki wana mpe bakendaki kobundisa bato oyo bafandi na Debire.+ (Nkombo ya Debire ezalaki liboso Kiriate-sefere.)+ 12 Bongo Kalebe+ alobaki boye: “Moto nyonso oyo akokweisa Kiriate-sefere mpe akozwa yango, nakopesa ye Akasa, mwana na ngai ya mwasi, mpo akóma mwasi na ye.”+ 13 Mpe Otiniele+ mwana ya Kenaze,+ leki ya Kalebe, azwaki engumba yango. Bongo Kalebe apesaki ye Akasa, mwana na ye, mpe akómaki mwasi na ye. 14 Ntango Akasa azalaki kokende na ndako na ye, atyaki mobali na ye mbamba mpo asɛnga tata na ye Kalebe elanga. Na nsima, Akasa akitaki na mpunda na ye.* Mpe Kalebe atunaki ye: “Olingi nini?” 15 Alobaki na ye: “Nabondeli yo, pesá ngai lipamboli, mpo opesi ngai kaka eteni ya mabele na sudi;* pesá ngai mpe Gulote-maime.”* Bongo Kalebe apesaki ye Gulote ya Likoló mpe Gulote ya Nse.

16 Mpe bakitani ya Mokeni,+ tata-bokilo ya Moize,+ bautaki na engumba ya banzete ya mbila+ mpe bamataki elongo na bato ya libota ya Yuda tii na esobe ya Yuda, na sudi ya Arade.+ Bakendaki kuna mpe bafandaki elongo na bango.+ 17 Kasi libota ya Yuda ekendaki elongo na libota ya Simeone, bandeko na bango; babundisaki Bakanana oyo bazalaki kofanda na Zefate mpe babebisaki yango.+ Mpe bapesaki engumba yango nkombo Horoma.*+ 18 Na nsima, Yuda azwaki Gaza+ ná teritware na yango, Ashekelone+ ná teritware na yango, mpe Ekrone+ ná teritware na yango. 19 Yehova azalaki elongo na bato ya libota ya Yuda, mpe bazwaki etúká ya ngombangomba, kasi bakokaki te kobengana bato oyo bafandi na mokili patatalu, mpo bazalaki na makalo ya bitumba oyo ezalaki na makwangola na bapine na yango ya ebende.*+ 20 Bapesaki Kalebe engumba Hebrone, kaka ndenge Moize alakaki yango,+ mpe abenganaki bana misato ya Anake oyo bazalaki kuna.+

21 Kasi Babenyamina babenganaki te Bayebusi oyo bazalaki kofanda na Yerusaleme; yango wana Bayebusi bazali kokoba kofanda elongo na Babenyamina na Yerusaleme tii na mokolo ya lelo.+

22 Na ntango yango, bakitani ya Yozefe+ bamataki mpo na kobundisa Betele, mpe Yehova azalaki elongo na bango.+ 23 Bakitani ya Yozefe bazalaki konɔnga Betele (kutu, nkombo ya engumba yango ezalaki liboso Luze).+ 24 Banɔngi yango bamonaki mobali moko azali kobima na engumba. Bongo balobaki na ye: “Tobondeli yo, lakisá biso nzela ya kokɔta na engumba, mpe tokomonisela yo boboto.”* 25 Na yango, mobali yango alakisaki bango nzela ya kokɔta na engumba, mpe babɛtaki engumba yango na mopanga, kasi batikaki mobali yango ná libota na ye mobimba bákende.+ 26 Mobali yango akendaki na mokili ya Bahiti mpe atongaki engumba moko mpe apesaki yango nkombo Luze. Wana nde nkombo ya engumba yango tii na mokolo ya lelo.

27 Libota ya Manase ezwaki te Bete-sheane ná basité oyo esimbami na yango,* Taanake+ ná basité oyo esimbami na yango, Dore ná basité oyo esimbami na yango, Ibleame ná basité oyo esimbami na yango, mpe Megido ná basité oyo esimbami na yango.+ Bakanana bakobaki kaka kofanda na mokili yango. 28 Ntango Bayisraele bakómaki makasi mingi, bakómaki kosalisa Bakanana misala ya makasi,+ kasi babenganaki bango nyonso te.+

29 Libota ya Efraime mpe ebenganaki te Bakanana oyo bazalaki kofanda na Gezere. Bakanana bakobaki kofanda na kati na bango na Gezere.+

30 Libota ya Zebulone ebenganaki te bato oyo bafandi na Kitrone ná baoyo bafandi na Nahalole.+ Bakanana bakobaki kofanda na kati na bango mpe Bazebulone bakómaki kosalisa bango misala ya makasi.+

31 Libota ya Ashere ebenganaki te bato oyo bafandi na Ako, Sidone,+ Ahalabe, Akazibe,+ Helba, Afike+ ná Rehobe.+ 32 Na yango, libota ya Ashere ekobaki kofanda na kati ya Bakanana oyo bazalaki kofanda na mokili yango, mpo babenganaki bango te.

33 Libota ya Nafatali ebenganaki te bafandi ya Bete-shemeshe mpe bafandi ya Bete-anate,+ kasi bakobaki kofanda na kati ya Bakanana yango oyo bazalaki na mokili wana.+ Bafandi ya Bete-shemeshe mpe ya Bete-anate bakómaki kosalela bango misala ya makasi.

34 Baamore bapesaki bakitani ya Dani nzela te bákita tii na mokili patatalu; yango wana bakitani ya Dani bazalaki kofanda na etúká ya ngombangomba.+ 35 Bongo Baamore bakobaki kaka kofanda na Ngomba Herese, Aiyalone,+ mpe Shaalbime.+ Kasi ntango bakitani ya Yozefe bakómaki na nguya mingi,* bakómaki kosalisa Baamore misala ya makasi. 36 Teritware ya Baamore ezalaki banda na nzela ya komata ya Akrabime,+ banda na Sela tii likoló.