Mokanda ya mibale ya Ntango

6 Na ntango yango, Salomo alobaki: “Ee Yehova, olobaki ete okofanda na molili makasi.+ 2 Sikoyo natongeli yo ndako moko ya lokumu, mpo ezala esika na yo ya kofanda libela na libela.”+

3 Na nsima, mokonzi abalukaki mpe abandaki kopambola lisangá mobimba ya Yisraele, wana lisangá mobimba ya Yisraele etɛlɛmaki.+ 4 Alobaki: “Tiká Yehova Nzambe ya Yisraele asanzolama, ye oyo na monɔkɔ na ye moko apesaki tata na ngai Davidi elaka, mpe na mabɔkɔ na ye moko akokisi yango, alobaki: 5 ‘Banda mokolo oyo nabimisaki bato na ngai na mokili ya Ezipito, naponaki ata engumba moko te na kati ya teritware nyonso ya mabota ya Yisraele mpo na kotonga ndako moko mpo nkombo na ngai efanda wana,+ mpe naponá ata moto moko te mpo akóma mokambi ya bato na ngai Yisraele. 6 Kasi sikoyo naponi Yerusaleme+ mpo nkombo na ngai efanda wana, mpe naponi Davidi mpo azala mokonzi ya bato na ngai Yisraele.’+ 7 Mpe tata na ngai Davidi azalaki na mposa makasi na motema na ye, ya kotonga ndako mpo na nkombo ya Yehova Nzambe ya Yisraele.+ 8 Kasi Yehova alobaki na tata na ngai Davidi boye: ‘Ozali na mposa ya kotonga ndako mpo na nkombo na ngai, mpe osali malamu ndenge ozali na mposa yango na motema na yo. 9 Atako bongo, yo okotonga ndako yango te, mwana na yo oyo okobota* nde akotonga ndako mpo na nkombo na ngai.’+ 10 Yehova akokisi elaka oyo apesaki, mpo nazwi esika ya tata na ngai Davidi mpe nafandi na kiti ya bokonzi ya Yisraele,+ kaka ndenge Yehova alakaki.+ Lisusu, natongi mpe ndako mpo na nkombo ya Yehova Nzambe ya Yisraele, 11 mpe kuna nde natye Sanduku oyo ezali na bitanda ya kondimana+ oyo Yehova asalaki ná bato ya Yisraele.”

12 Na nsima, Salomo atɛlɛmaki liboso ya etumbelo ya Yehova, liboso ya lisangá mobimba ya Yisraele, mpe atombolaki mabɔkɔ na ye.+ 13 (Mpo Salomo asalaki estrade ya kwivre mpe atyaki yango na katikati ya lopango.+ Ezalaki mapeko* mitano na bolai, mapeko mitano na bonene, mpe mapeko misato banda na nse tii likoló; mpe atɛlɛmaki likoló na yango.) Bongo afukamaki liboso ya lisangá mobimba ya Yisraele mpe atombolaki mabɔkɔ na ye na likoló,+ 14 mpe alobaki: “Ee Yehova Nzambe ya Yisraele, Nzambe mosusu lokola yo azali te ezala kuna na likoló to awa na mabele. Obatelaka kondimana mpe omonisaka bolingo ya sembo epai ya basaleli na yo oyo bazali kotambola liboso na yo* na motema na bango mobimba.+ 15 Okokisi elaka oyo opesaki tata na ngai Davidi mosaleli na yo.+ Opesaki elaka yango na monɔkɔ na yo moko, mpe lelo oyo okokisi yango na lobɔkɔ na yo moko.+ 16 Sikoyo, Ee Yehova Nzambe ya Yisraele, kokisá elaka oyo opesaki mosaleli na yo tata na ngai Davidi ntango olobaki: ‘Ekozala ntango nyonso na moko ya bakitani na yo liboso na ngai mpo na kofanda na kiti ya bokonzi ya Yisraele, kaka soki bana na yo bakebi na nzela bango mpe batamboli na mobeko na ngai,+ kaka ndenge yo otambolaki liboso na ngai.’+ 17 Mpe sikoyo, Ee Yehova Nzambe ya Yisraele, tiká ete elaka oyo opesaki mosaleli na yo Davidi ekokisama.

18 “Kasi yo, Ee Nzambe, okofanda mpenza awa na mabele esika moko na bato?+ Talá! Likoló, na bonene na yango nyonso,* ezali kokoka yo te;+ bongo ndako oyo natongi nde ekokoka yo?+ 19 Sikoyo, Ee Yehova Nzambe na ngai, tyá likebi na libondeli na ngai mosaleli na yo mpe kosɛnga na ngai mpo na koluka kondimama, mpe yoká kolela na ngai mpo na kosɛnga lisalisi mpe libondeli oyo nazali kosala liboso na yo. 20 Tiká ete miso na yo etala ndako oyo butu moi, esika oyo olobaki ete okotya nkombo na yo,+ mpo na koyoka libondeli oyo mosaleli na yo azali kosala, wana atali na ngámbo ya esika oyo. 21 Mpe yoká libondeli ya mosaleli na yo mpo na kosɛnga lisalisi mpe ya bato na yo Yisraele ntango bakobondela yo, wana batali na ngámbo ya esika oyo,+ tiká ete oyoka kuna na likoló esika ofandaka;+ ɛɛ, tiká ete oyoka mpe olimbisa.+

22 “Soki moto moko asaleli moninga na ye lisumu mpe basɛngi ye alapa ndai,* mpe bandimisi ye mokumba ya ndai yango, soki moto yango ayei liboso ya etumbelo na yo na ndako oyo,+ 23 boye, tiká ete oyoka kuna na likoló, osala mpe osambisa basaleli na yo. Futá moto mabe mabe na ye mpe tyá mabe na ye na motó na ye moko.+ Tángá moto oyo asali likambo te* moto ya sembo mpe pesá ye mbano na kolanda bosembo na ye.+

24 “Mpe soki monguna alongi bato na yo Yisraele mpo bakobaki kosalela yo masumu,+ mpe soki bazongeli yo, bakumisi nkombo na yo,+ babondeli yo+ mpe basɛngi ete bándimama liboso na yo na ndako oyo,+ 25 tiká ete oyoka kuna na likoló,+ mpe olimbisa lisumu ya bato na yo Yisraele, mpe ozongisa bango na mokili oyo opesaki bango mpe bankɔkɔ na bango.+

26 “Soki likoló ekangami mpe mbula ezali konɔka lisusu te+ mpo bato na yo bakobaki kosalela yo masumu,+ mpe soki babondeli yo, wana batali na ngámbo ya esika oyo, bakumisi nkombo na yo, mpe batiki lisumu na bango mpo okitisi bango,*+ 27 tiká ete oyoka kuna na likoló, mpe olimbisa lisumu ya basaleli na yo, ya bato na yo Yisraele. Mpo okoteya bango nzela ya malamu oyo basengeli kolanda;+ mpe nɔkisá mbula+ na mokili na yo oyo opesaki bato na yo lokola libula.

28 “Soki nzala, to maladi moko mabe+ ebimi na ekólo,+ soki mopɛpɛ ya molunge makasi ekaukisi milona, soki koguga,+ mayoyo oyo epumbwaka, to mayoyo ya lokoso ebimi;+ to soki banguna na bango bazingi moko ya bingumba* ya ekólo na bango,+ to soki mpasi to maladi ya ndenge nini ebimi,+ 29 ezala libondeli nini,+ to lilɔmbɔ nini+ oyo moto moko to bato nyonso ya ekólo na yo Yisraele bakosala (mpo moto na moto ayebi bwale mpe mpasi na ye),+ ntango bakotombola mabɔkɔ na bango mpe batali na ngámbo ya ndako oyo,+ 30 tiká ete oyoka kuna na likoló, esika oyo ofandaka,+ mpe olimbisa;+ mpe futá moto na moto na kolanda banzela na ye nyonso, mpo oyebi motema ya moto na moto (kaka yo moko nde oyebi malamu motema ya moto);+ 31 mpo bato na yo bábanga yo mpe bátambola na banzela na yo mikolo nyonso oyo bakofanda na mokili oyo opesaki bankɔkɔ na biso.

32 “Mpe soki mopaya, oyo azali te moto ya ekólo na yo Yisraele, auti na mboka moko mosika mpo na nkombo na yo monene,+ ya lobɔkɔ na yo ya nguya mpe ya lobɔkɔ na yo oyo esembolami, mpe soki ayei mpe abondeli yo, wana atali na ngámbo ya ndako oyo,+ 33 tiká ete oyoka kuna na likoló, esika ofandaka, mpe osala nyonso oyo mopaya yango akosɛnga yo; na bongo bato ya bikólo nyonso ya mabele bakoyeba nkombo na yo+ mpe bakobanga yo ndenge bato na yo Yisraele babangaka yo, mpe bakoyeba ete ndako oyo natongi ebengami na nkombo na yo.

34 “Soki bato na yo bakei kobunda etumba na banguna na bango na esika nyonso oyo okotinda bango,+ mpe soki babondeli yo,+ wana batali na ngámbo ya engumba oyo oponá mpe na ngámbo ya ndako oyo natongi mpo na nkombo na yo,+ 35 boye oyoka kuna na likoló libondeli na bango mpe kosɛnga na bango mpo na kondimama, mpe okata likambo mpo na bolamu na bango.+

36 “Soki bato na yo basaleli yo lisumu (mpo ezali ata na moto moko te oyo asalaka lisumu te),+ mpe soki osilikeli bango mpe osundoli bango na mabɔkɔ ya banguna, mpe banguna na bango bamemi bango bakangami na mokili moko, ezala mosika to pene,+ 37 mpe soki bato na yo bakómi na makanisi malamu na mokili oyo bamemaki bango bakangami, mpe soki bazongeli yo mpe baleleli yo kuna na mokili yango, mpe balobi: ‘Tosali lisumu mpe tosali mabe; tosali makambo ya mabe mpenza,’+ 38 mpe soki kuna na mokili oyo bazali bakangami+ bazongeli yo na motema na bango mobimba+ mpe na molimo* na bango mobimba, mpe babondeli wana batali na ngámbo ya mokili na bango oyo opesaki bankɔkɔ na bango, ya engumba oyo oponá+ mpe ya ndako oyo natongi mpo na nkombo na yo, 39 tiká ete kuna na likoló, esika oyo ofandaka, oyoka libondeli na bango mpe kolela na bango, mpe okata likambo mpo na bolamu na bango+ mpe olimbisa bato na yo oyo basaleli yo lisumu.

40 “Sikoyo, Ee Nzambe na ngai, nabondeli yo, tiká ete miso na yo efungwama mpe matoi na yo eyoka libondeli oyo esalemi na* esika oyo.+ 41 Mpe sikoyo, Ee Yehova Nzambe, kɔtá na esika na yo ya kopema,+ yo ná Sanduku ya makasi na yo. Ee Yehova Nzambe, tiká ete banganga-nzambe na yo bálata lobiko lokola elamba, mpe tiká ete bato na yo ya sembo básepela na bolamu na yo.+ 42 Ee Yehova Nzambe, koboya te* moto na yo oyo atyami mafuta.+ Kanisá bolingo ya sembo oyo omoniselaki mosaleli na yo Davidi.”+