Mokanda ya liboso ya Samwele
8 Ntango Samwele akómaki mobange, atyaki bana na ye basambisi ya Yisraele. 2 Mwana na ye ya mobali ya liboso nkombo na ye Yoele, ya mibale nkombo na ye Abiya.+ Bazalaki kosambisa na Beere-sheba. 3 Kasi bana na ye balandaki ndakisa na ye te; bazalaki koluka kozwa mbongo na ndenge oyo elongobani te,+ bazalaki kondima kanyaka,+ mpe bazalaki kokata makambo na bosembo te.+
4 Na nsima, bankulutu nyonso ya Yisraele bayanganaki mpe bakendaki epai ya Samwele na Rama. 5 Balobaki na ye: “Talá! Okómi mobange, kasi bana na yo balandi ndakisa na yo te. Sikoyo, tyelá biso mokonzi mpo asambisaka biso lokola bikólo nyonso.”+ 6 Kasi Samwele asepelaki te* ndenge balobaki ete: “Pesá biso mokonzi mpo asambisaka biso.” Bongo, Samwele abondelaki Yehova, 7 mpe Yehova alobaki na Samwele boye: “Yoká makambo nyonso oyo bato bazali koloba na yo; mpo baboyi yo te, kasi baboyi nde ngai nazala mokonzi na bango.+ 8 Bazali kosala kaka ndenge basalaki banda mokolo oyo nabimisaki bango na Ezipito tii na mokolo ya lelo; bazali se kotika ngai+ mpe kosalela banzambe mosusu;+ yango nde bazali kosala yo. 9 Sikoyo, yoká oyo balobi. Kasi osengeli kokebisa bango polele; mpe yebisá bango makambo oyo mokonzi oyo akoyangela bango akozala na lotomo ya kosɛnga bango.”
10 Bongo Samwele ayebisaki bato oyo bazalaki kosɛnga ye mokonzi maloba nyonso ya Yehova. 11 Alobaki boye: “Bóyoka makambo mokonzi oyo akoyangela bino akozala na lotomo ya kosɛnga bino:+ Akozwa bana na bino ya mibali,+ akokómisa bango batambwisi ya makalo na ye,+ mpe akokómisa bango basoda na ye oyo batambolaka na mpunda,+ mpe basusu bakokóma bato oyo bakimaka mbangu liboso ya makalo na ye. 12 Mpe akotya mpo na ye moko bakonzi ya basoda nkóto+ mpe bakonzi ya basoda ntuku mitano.+ Basusu bakosalela ye bilanga,+ bakobukela ye mbuma,+ bakosalela ye bibundeli mpe biloko ya makalo na ye.+ 13 Akozwa bana na bino ya basi mpo básalaka malasi, bálambaka, mpe bátumbaka mampa.+ 14 Akozwa bilanga na bino oyo eleki kitoko, bilanga na bino ya vinyo ná bilanga na bino ya olive,+ mpe akopesa yango basaleli na ye. 15 Akozwa moko ya bandambo zomi ya mbuma ya bilanga na bino mpe ya bilanga na bino ya vinyo, mpe akopesa yango bakapita oyo basalaka mpo na mokonzi mpe basaleli na ye. 16 Mpe akozwa basaleli na bino ya mibali mpe ya basi, bitonga na bino oyo eleki kitoko, ná bampunda na bino, mpo básalaka mosala na ye.+ 17 Akozwa moko ya bandambo zomi ya bitonga na bino ya bampate,+ mpe bokokóma basaleli na ye. 18 Ata ndɛlɛ, bokolela mpo na mokonzi oyo bino moko boponi,+ kasi na mokolo yango, Yehova akopesa bino eyano te.”
19 Atako bongo, bato baboyaki koyoka oyo Samwele azalaki koyebisa bango, mpe balobaki: “Likambo te, tolingi kaka kozala na mokonzi oyo akoyangela biso. 20 Boye, tokokóma lokola bikólo nyonso, mpe mokonzi na biso akosambisa biso, akokamba biso mpe akobunda bitumba mpo na biso.” 21 Ntango Samwele ayokaki maloba nyonso oyo bato balobaki, ayebisaki yango Yehova. 22 Yehova alobaki na Samwele boye: “Yoká oyo balobi, mpe tyelá bango mokonzi mpo ayangela bango.”+ Na yango, Samwele alobaki na mibali ya Yisraele ete: “Moto na moto azonga na engumba na ye.”