Yirimia
51 Talá oyo Yehova alobi:
2 Nakotindela Babilone bapupoli,
Bakopupola ye mpe bakotika mokili na ye mpamba;
Bakobundisa ye bipai nyonso na mokolo ya mpasi.+
3 Moto oyo abwakaka mbanzi agumba* litimbo na ye te.
Mpe moto moko te oyo alati kazaka na ye ya bibende atɛlɛma.
Bómonisela bilenge na ye motema mawa te.+
Bóbebisa limpinga na ye nyonso.
5 Mpo na Yisraele mpe Yuda, Nzambe na bango, Yehova ya mampinga, atiki bango te lokola basi oyo mibali bakufá.+
Kasi na miso ya Mosantu ya Yisraele, mokili na bango* etondi na ngambo.
Bókufa te mpo na libunga na ye.
Mpo ntango ekoki mpo Yehova azongisa mabe.
Azali kozongisela ye mabe oyo asalaki.+
7 Babilone azalaki kɔpɔ ya wolo na lobɔkɔ ya Yehova;
Alangwisaki mabele mobimba.
8 Babilone akwei na pwasa, mpe abukani.+
Bóganga na kolela mpo na ye!+
Bózwa balsame mpo na mpasi na ye; mbala mosusu akobika.”
9 “Tomekaki kobikisa Babilone, kasi akokaki kobika te.
Bótika ye mpe moto na moto akende na mokili na ye.+
Mpo kosambisama na ye ekómi tii na likoló;
Etombwami likoló lokola mapata.+
10 Yehova amoniseli biso bosembo.+
Bóya, tóyebisa na Siona mosala ya Yehova Nzambe na biso.”+
11 “Bópelisa makula;+ bózwa banguba.*
Mpo Yehova azali kozongisa mabe, kozongisa mabe mpo na tempelo na ye.
12 Bótombola elembo+ mpo na kobundisa bifelo ya Babilone.
Bókɛngɛla makasi, bótya bakɛngɛli.
Bóbongisa bato oyo bazali kotya motambo.
Mpo Yehova nde abongisi mayele moko,
Mpe akokokisa oyo alaki mpo na bato oyo bafandi na Babilone.”+
13 “Ee mwasi oyo ofandi likoló ya mai mingi,+
Ná biloko mingi ya motuya,+
Nsuka na yo ekómi, matomba ozalaki kozwa ekómi na nsuka.+
14 Yehova ya mampinga ye moko alapi ndai ete:
‘Nakotondisa yo na bato, ebele lokola mayoyo,
Mpe bakoganga na koganga ya bolongi mpo na yo.’+
15 Azali Moto oyo asalaki mabele na nguya na ye,
Moto oyo atɛlɛmisaki mabele oyo ebotaka na bwanya na ye,+
Mpe Oyo atandaki likoló na mayele na ye.+
16 Soki ayokisi mongongo na ye,
Mai oyo ezali na likoló ekómaka na yikiyiki,
Mpe asalaka ete mapata* emata uta na nsuka nyonso ya mabele.
17 Moto nyonso asalaka makambo na bozoba mpe na kozanga mayele.
18 Yango ezali ndɔtɔ mpamba,+ mosala ya kosɛka.
Na ntango oyo Nzambe akopesa yango etumbu ekobebisama.
19 Likabo ya Yakobo ezali te lokola biloko wana,
Mpo ye azali Moto oyo asalaki eloko nyonso,
Ata lingenda ya libula na ye.+
Yehova ya mampinga nde nkombo na ye.”+
20 “Ozali lingenda monene na ngai, ebundeli ya etumba,
Nakosalela yo mpo na kobukabuka bikólo,
Nakosalela yo mpo na kobebisa makonzi.
21 Nakosalela yo mpo na kobukabuka mpunda ná motambwisi na yango.
Nakosalela yo mpo na kobukabuka likalo ya etumba ná motambwisi na yango.
22 Nakosalela yo mpo na kobukabuka mobali mpe mwasi.
Nakosalela yo mpo na kobukabuka mobange mpe elenge.
Nakosalela yo mpo na kobukabuka elenge mobali ná elenge mwasi.
23 Nakosalela yo mpo na kobukabuka mobateli ya mpate ná etonga na ye.
Nakosalela yo mpo na kobukabuka moloni-bilanga ná banyama na ye oyo ekangani mibalemibale.
Nakosalela yo mpo na kobukabuka baguvɛrnɛrɛ ná bayangeli-basungi.
24 Mpe nakozongisela Babilone ná bato nyonso oyo bafandi na Kaladea
Mabe na bango nyonso oyo basali na Siona liboso na miso na bino,”+ Yehova alobi bongo.
25 “Talá nazali koyela yo,+ Ee ngomba oyo ebebisaka,” Yehova alobi bongo,
“Yo mobebisi ya mabele mobimba.+
Nakosembolela yo lobɔkɔ na ngai mpe nakobalolabalola yo na mabanga
Mpe nakokómisa yo ngomba oyo eziki.”
26 “Epai na yo bato bakozwa te libanga ya ntina mingi* to libanga ya moboko,
Mpo okokóma esika oyo etikalá mpamba mpo na libela,”+ Yehova alobi bongo.
27 “Bótombola elembo na mokili.+
Bóyula liseke na kati na bikólo.
Bóbongisa* bikólo mpo na kobundisa Babilone.
Bóbengisa makonzi ya Ararate,+ Mini ná Ashekenaze mpo na kobundisa ye.+
Bózwela ye mosali oyo akomaka basoda ya sika.
Bómatisa bampunda lokola ebele ya mayoyo ya mikemike.
28 Bóbongisa* bikólo mpo na kobundisa ye,
Bakonzi ya Media,+ baguvɛrnɛrɛ na yango mpe bayangeli-basungi na yango nyonso
Mpe mikili nyonso oyo bazali koyangela.
29 Mabele ekoningana mpe ekolɛnga,
Mpo Yehova akokokisa makambo oyo akani kosala Babilone:
Mokili ya Babilone ekokóma eloko ya nsɔmɔ, moto moko te akofanda kuna.+
30 Babundi-bitumba ya Babilone bakimi kobunda.
Bafandi na bisika na bango ya makasi.
Makasi na bango esili.+
Bakómi lokola basi.+
Bandako na ye etyami mɔtɔ.
Bikangiseli ya baporte na ye ebukani.+
31 Motindami moko azali kopota mbangu mpo na kokutana na motindami mosusu,
Mpe momemi-nsango moko mpo na kokutana na momemi-nsango mosusu,
Mpo na kopesa mokonzi ya Babilone nsango ete engumba na ye ezwami esika nyonso,+
32 Ete bisika oyo bakatisaka mai na makolo ezwami,+
Ete batumbi bamasuwa ya papirisi na mɔtɔ,
Mpe ete mibali ya etumba babangi makasi.”
33 Mpo talá oyo Yehova ya mampinga, Nzambe ya Yisraele, alobi:
“Mwana mwasi ya Babilone azali lokola esika ya kotutatuta mbuma.
Ezali ntango ya konyatanyata ye makasi.
Mosika te mpenza ntango ya kobuka mbuma ekoya mpo na ye.”
Atiki ngai ndenge batikaka mbɛki oyo ezali na eloko te na kati.
Amɛli ngai lokola nyoka moko monene;+
Atondisi libumu na ye na biloko na ngai ya kitoko.
Abwaki ngai.*
35 ‘Babilone afuta mpo na bampota oyo azokisi ngai mpe nzoto na ngai!’ Mwana mwasi ya Siona alobi bongo.+
‘Mpe ngambo ya makila na ngai eya likoló ya bafandi ya Kaladea!’ Yerusaleme alobi bongo.”
36 Na yango, talá oyo Yehova alobi:
Mpe nakokaukisa mbu na ye mpe mabulu na ye ya mai.+
37 Mpe Babilone ekokóma mabondo ya mabanga,+
Esika bambwa ya zamba* efandaka,+
Eloko ya nsɔmɔ mpe ya kobɛtɛla piololo,
Moto akofanda kuna te.+
38 Bango nyonso elongo bakoganga lokola bana-nkɔsi.*
Bakonguluma lokola bana-nkɔsi.”
39 “Ntango bakokóma na mposa makasi, nakobongisela bango fɛti mpe nakolangwisa bango,
Mpo básepela;+
Bongo bakolala mpɔngi ya libela,
Oyo bakolamuka te,”+ Yehova alobi bongo.
40 “Nakomema bango lokola bana-mpate mpo na kobomama,
Lokola bampate-mibali ná bantaba.”
Talá ndenge Babilone akómi eloko ya nsɔmɔ kati na bikólo!
42 Mbu emati likoló ya Babilone.
Ezipami na ebele ya bambonge na yango.
43 Bingumba na ye ekómi eloko ya nsɔmɔ, mokili oyo ezangá mai mpe mokili ekauká.
Mokili oyo moto akofanda te, mpe moto akoleka kuna te.+
Bikólo ekosopana epai na ye lisusu te,
Mpe efelo ya Babilone ekokwea.+
45 Bóbima kati na ye, bato na ngai,+
Bóbikisa bomoi na bino*+ na nkanda ya kongala ya Yehova!+
46 Motema na bino elɛmba te mpe ebanga te mpo na nsango oyo ekoyokana na mokili.
Na mbula moko bokoyoka nsango,
Mpe na mbula oyo ekolanda bokoyoka nsango mosusu,
Bokoyoka nsango ya mobulu na mokili mpe moyangeli moko akobunda na moyangeli mosusu.
47 Bongo, talá! mikolo ezali koya
Ntango nakotya likebi na ngai na bikeko ya Babilone.
Mokili na ye mobimba ekoyokisama nsɔni,
Bato na ye nyonso bakokwea bibembe na kati na ye.+
48 Likoló mpe mabele ná biloko nyonso oyo ezali na kati
Ekoganga na esengo mpo na Babilone,+
Mpo babebisi bakoyela ye uta na nɔrdi,”+ Yehova alobi bongo.
49 “Ezali te kaka mpo Babilone asalaki ete bato ya Yisraele bákwea bibembe+
Kasi lisusu na Babilone, bato ya mabele mobimba bakweaki bibembe.
50 Bino bato oyo bobiki na mopanga, bókoba kokende. Bótɛlɛma te!+
Bókanisa Yehova uta na mosika,
Mpe bókanisa Yerusaleme.”+
51 “Topɔli na nsɔni, mpo toyoki makambo ya kotyola.
Kosambwa ezipi bilongi na biso,
Mpo bapaya babundisi bisika mosantu ya ndako ya Yehova.”+
53 “Ata soki Babilone amati na likoló,+
Ata soki akómisi makasi bisika na ye ya libateli oyo etombwaná makasi,
Bato oyo bakobebisa ye bakouta epai na ngai,”+ Yehova alobi bongo.
54 “Bóyoka! Koganga euti na Babilone,+
Lokito ya likama moko monene euti na mokili ya Bakaladea,+
55 Mpo Yehova azali kobebisa Babilone,
Mpe akosukisa mongongo na ye monene,
Mpe mbonge na bango ekotomboka lokola mai mingi.
Makɛlɛlɛ ya mongongo na bango ekoyokana.
56 Mpo mobebisi akoyela Babilone;+
Babundi-bitumba na ye bakozwama,+
Matimbo na bango ekobukana,
Mpo Yehova azali Nzambe oyo apesaka moto na moto etumbu oyo ebongi na ye.+
Akopesa mpenza etumbu.+
57 Nakolangwisa bankumu na ye, bato na ye ya bwanya,+
Baguvɛrnɛrɛ na ye, bayangeli-basungi na ye mpe babundi-bitumba na ye,
Mpe bakolala mpɔngi ya libela,
Oyo bakolamuka te,”+ Mokonzi oyo nkombo na ye ezali Yehova ya mampinga nde alobi bongo.
58 Talá oyo Yehova ya mampinga alobi:
“Efelo ya Babilone, atako ezali monene, ekobebisama mpenza,+
Mpe baporte na ye, atako ezali molai, ekotumbama na mɔtɔ.
Bato ya bikólo bakoboma nzoto kaka mpamba;
Bato ya bikólo bakolɛmba kaka mpo na koboma mɔtɔ.”+
59 Talá mitindo oyo mosakoli Yirimia apesaki Seraya mwana ya Neria+ mwana ya Mahaseya ntango akendaki elongo na Zidikiya mokonzi ya Yuda na Babilone na mbula ya minei ya boyangeli na ye; Seraya azalaki mokonzi ya basoda oyo atalelaka biloko. 60 Yirimia akomaki na buku moko mpasi nyonso oyo esengelaki kokómela Babilone, maloba nyonso oyo ekomamaki mpo na Babilone. 61 Lisusu, Yirimia alobaki na Seraya ete: “Soki okómi na Babilone mpe omoni yango, osengeli kotánga na mongongo makasi maloba oyo nyonso. 62 Bongo okoloba boye: ‘Ee Yehova, olobaki mpo na esika oyo ete, ekobebisama mpe moto moko te akofanda lisusu kuna, ezala moto to nyama, mpe ekotikala esika oyo ebebisamá mpo na libela.’+ 63 Mpe soki osilisi kotánga buku oyo: kangisá yango na libanga, mpe bwaká yango na katikati ya Efrate. 64 Na nsima okoloba boye: ‘Ndenge wana nde Babilone akozinda mpe akotɛlɛma lisusu te+ mpo na mpasi oyo nazali komemela ye; mpe bakolɛmba.’”+
Maloba ya Yirimia esuki awa.