Mokanda ya mibale ya

25 Na mbula ya libwa ya boyangeli ya Zidikiya, na sanza ya zomi, na mokolo ya zomi ya sanza yango, Nebukadenezare+ mokonzi ya Babilone ayaki ná limpinga mobimba ya basoda na ye mpo na kobundisa Yerusaleme.+ Atyaki kaa mpo na kobundisa yango mpe atongaki efelo ya kozinga yango epai na epai.+ 2 Bazingaki engumba yango tii na mbula ya 11 ya boyangeli ya Mokonzi Zidikiya. 3 Na mokolo ya libwa ya sanza ya minei nzala ezalaki makasi+ na engumba, mpe bato ya mokili yango bazalaki lisusu na biloko ya kolya te.+ 4 Batɔbɔlaki efelo ya engumba,+ mpe basoda nyonso bakimaki butubutu, baleki na porte oyo ezalaki kati na bifelo mibale pene na elanga ya mokonzi, wana Bakaladea bazalaki kozinga engumba. Mokonzi akendaki na nzela ya Araba.+ 5 Kasi basoda ya Bakaladea balandaki mokonzi mpe bakangaki ye na mokili patatalu oyo ekauká ya Yeriko, mpe basoda na ye nyonso bapanzanaki, batiki ye. 6 Na nsima bakangaki mokonzi Zidikiya,+ bamemaki ye epai ya mokonzi ya Babilone na Ribla, mpe bakatelaki ye etumbu. 7 Babomaki bana ya Zidikiya na miso na ye. Na nsima, Nebukadenezare atɔbɔlaki Zidikiya miso, akangaki ye na bikangeli ya kwivre, mpe amemaki ye na Babilone.+

8 Na sanza ya mitano, na mokolo ya nsambo ya sanza yango, elingi koloba na mbula ya 19 ya boyangeli ya Nebukadenezare mokonzi ya Babilone, Nebuzaradane+ oyo azalaki mokonzi ya basoda oyo bakɛngɛlaka mokonzi mpe mosaleli ya mokonzi ya Babilone, ayaki na Yerusaleme.+ 9 Atumbaki ndako ya Yehova,+ ndako ya mokonzi,*+ mpe bandako nyonso ya Yerusaleme.+ Atumbaki mpe bandako ya bato nyonso ya lokumu.+ 10 Mpe limpinga mobimba ya basoda ya Bakaladea oyo bazalaki elongo na mokonzi ya basoda oyo bakɛngɛlaka mokonzi babukaki bifelo oyo ezingaki Yerusaleme.+ 11 Nebuzaradane mokonzi ya basoda oyo bakɛngɛlaka mokonzi amemaki na Babilone bato mosusu oyo bazalaki naino na engumba, bato oyo bakimaki epai ya mokonzi ya Babilone, mpe bato mosusu oyo batikalaki.+ 12 Kasi mokonzi ya basoda oyo bakɛngɛlaka mokonzi atikaki bato mosusu ya ekólo oyo bazalaki mpenza babola mpo bázala basali-bilanga ya vinyo mpe bato oyo bazali kotindama na mosala makasi.+ 13 Mpe Bakaladea babukabukaki makonzí ya kwivre+ oyo ezalaki na tempelo* ya Yehova, ná bashario,+ mpe ebombelo monene ya mai+ oyo ebengami Mbu ya kwivre oyo ezalaki na tempelo* ya Yehova, mpe bamemaki kwivre yango na Babilone.+ 14 Bazwaki mpe bambɛki, bapau, biloko ya koboma mɔtɔ, bakɔpɔ, ná bisaleli nyonso ya kwivre oyo bazalaki kosalela na mosala ya tempelo. 15 Mokonzi ya basoda oyo bakɛngɛlaka mokonzi azwaki mpe biloko ya kotya mɔtɔ mpe mabakuli oyo ezalaki ya wolo+ mpe palata ya solosolo.+ 16 Mpo na makonzí mibale, Ebombelo monene ya mai,* mpe bashario oyo Salomo asalaki mpo na ndako ya Yehova, bakokaki te koyeba kilo ya kwivre oyo basalelaki biloko yango.+ 17 Likonzí mokomoko ezalaki na bolai ya mapeko* 18,+ mpe motó oyo ezalaki likoló na yango ezalaki ya kwivre; bolai ya motó yango ezalaki mapeko misato, mpe eloko oyo basalá lokola monyama mpe bambuma ya nzete ya grenade oyo ezingaki motó yango esalemaki na kwivre.+ Likonzí ya mibale ná eloko na yango oyo basalá lokola monyama ezalaki mpe bongo.

18 Mokonzi ya basoda oyo bakɛngɛlaka mokonzi akangaki mpe Seraya+ nganga-nzambe mokonzi, Sefania+ nganga-nzambe ya mibale mpe bakɛngɛli misato ya baporte.+ 19 Lisusu na engumba, akangaki mpe kapita moko ya ndako ya mokonzi oyo azalaki kotalela makambo ya basoda, bapesi-toli mitano ya mokonzi oyo bazalaki na engumba, mpe sɛkrɛtɛrɛ ya mokonzi ya basoda, oyo azalaki koyanganisa basoda ya ekólo, mpe mibali 60 kati na bana-mboka oyo bazalaki naino na engumba. 20 Nebuzaradane+ mokonzi ya basoda oyo bakɛngɛlaka mokonzi azwaki bango mpe amemaki bango epai ya mokonzi ya Babilone na Ribla.+ 21 Mokonzi ya Babilone abomaki bango na Ribla, na mokili ya Hamate.+ Ndenge wana nde balongolaki bato ya Yuda na mokili na bango mpe bamemaki bango na mboka mopaya.+

22 Nebukadenezare mokonzi ya Babilone atyaki Gedalia+ mwana ya Ahikame+ mwana ya Shafane+ mokambi ya bato oyo atikaki na mokili ya Yuda.+ 23 Ntango bakonzi nyonso ya basoda ná basoda na bango bayokaki ete mokonzi ya Babilone atyaki Gedalia mokambi, na mbala moko bayaki epai ya Gedalia, na Mizipa. Ezalaki Yishimaele mwana ya Netania, Yohanane mwana ya Karea, Seraya mwana ya Tanumete moto ya mboka Netofa, mpe Yaazania mwana ya Momaakate, bango ná basoda na bango.+ 24 Gedalia alapelaki bango mpe basoda na bango ndai ete: “Bóbanga te kozala basaleli ya Bakaladea. Bófanda na mboka oyo mpe bósalela mokonzi ya Babilone, mpe makambo na bino ekotambola malamu.”+

25 Mpe na sanza ya nsambo, Yishimaele+ mwana ya Netania mwana ya Elishama, oyo azalaki moto ya libota ya mokonzi* ayaki elongo na bato mosusu zomi mpe babomaki Gedalia ná Bayuda mpe Bakaladea oyo bazalaki elongo na ye na Mizipa.+ 26 Nsima na yango, bato nyonso, banda na mwana moke tii na mokóló, ata mpe bakonzi ya basoda, basimbaki nzela bakei na Ezipito+ mpo bazalaki kobanga Bakaladea.+

27 Na mbula ya 37 ya komemama ya Yehoyakine+ mokonzi ya Yuda na mboka mopaya, na sanza ya 12, na mokolo ya 27 ya sanza yango, Evile-merodake mokonzi ya Babilone, na mbula oyo akómaki mokonzi, abimisaki* Yehoyakine mokonzi ya Yuda na bolɔkɔ.+ 28 Alobaki na Yehoyakine na boboto mpe apesaki ye esika ya lokumu koleka* bakonzi mosusu oyo bazalaki mpe bakangami na Babilone. 29 Bongo Yehoyakine alongolaki bilamba ya bolɔkɔ, mpe akómaki kolya na mesa ya mokonzi tii na nsuka ya bomoi na ye. 30 Mokolo na mokolo, mokonzi azalaki kopesa ye biloko ya kolya. Asalaki bongo mikolo nyonso ya bomoi ya Yehoyakine.