Mokanda ya mibale ya Ntango

33 Manase+ azalaki na mbula 12 ntango akómaki mokonzi, mpe ayangelaki mbula 55 na Yerusaleme.+

2 Manase asalaki makambo oyo ezali mabe na miso ya Yehova; alandaki mimeseno eyinamá ya bikólo oyo Yehova abenganaki liboso ya bato ya Yisraele.+ 3 Atongaki lisusu bisika oyo etombwaná, oyo tata na ye Ezekiasi akweisaki,+ asalaki bitumbelo mpo na Babaala mpe atɛlɛmisaki banzete ya losambo.* Agumbamelaki limpinga nyonso ya likoló* mpe asalelaki yango.+ 4 Atongaki mpe bitumbelo mpo na banzambe ya lokuta na ndako ya Yehova,+ oyo mpo na yango Yehova alobaki ete: “Nkombo na ngai ekozala na Yerusaleme mpo na libela.”+ 5 Lisusu, atongaki bitumbelo mpo na limpinga nyonso ya likoló na mapango mibale ya ndako ya Yehova.+ 6 Alekisaki* bana na ye moko mbeka na mɔtɔ+ na Lobwaku ya mwana ya Hinome.+ Asalaki misala ya maji,+ asalaki misala ya kosakola makambo oyo ebombaná, asalaki misala ya bondɔki mpe atyaki bato oyo basololaka na bilimo ná bato oyo basakolaka makambo ekoya.+ Asalaki mabe mingi mpenza na miso ya Yehova, mpo na kosilikisa ye.

7 Asalaki ekeko* mpe atyaki yango na ndako ya Nzambe ya solo,+ oyo mpo na yango Nzambe alobaki na Davidi mpe na mwana na ye Salomo ete: “Na ndako oyo mpe na Yerusaleme, engumba oyo naponi kati na teritware nyonso ya mabota ya Yisraele, nakotya nkombo na ngai mpo na libela.+ 8 Mpe nakolongola lisusu te Bayisraele na mokili oyo napesaki bankɔkɔ na bango, soki batosi malamumalamu mitindo nyonso oyo napesaki bango, Mobeko nyonso, malako ná bikateli ya lisambisi oyo epesamaki na nzela ya Moize.” 9 Manase akobaki kobungisa Yuda mpe bato ya Yerusaleme nzela, bongo asalisaki bango makambo mabe mingi koleka bikólo oyo Yehova asilisaki ntango Bayisraele bazwaki mokili yango.+

10 Yehova azalaki se koloba na Manase mpe na bato ya ekólo na ye, kasi bazalaki koyoka te.+ 11 Na yango, Yehova atindelaki bango bakonzi ya limpinga ya mokonzi ya Asiri, bazwaki Manase na bibende oyo ezali lokola ndɔbɔ,* bakangaki ye na bikangeli mibale ya kwivre mpe bamemaki ye na Babilone. 12 Na kati ya mpasi na ye, alelelaki* Yehova Nzambe na ye mpe akobaki komikitisa mingi liboso ya Nzambe ya bankɔkɔ na ye. 13 Manase akobaki kobondela, mpe Nzambe akitisaki motema mpo na libondeli na ye mpe ayokaki kosɛnga na ye mpo na kondimama, bongo azongisaki ye na Yerusaleme na bokonzi na ye.+ Bongo Manase ayebaki ete Yehova azali Nzambe ya solo.+

14 Na nsima, atongaki efelo moko libándá mpo na Sité ya Davidi,+ na wɛsti ya Gihone,+ oyo ezali na lobwaku.* Efelo yango ekendaki tii na Porte ya Mbisi,+ mpe alekisaki yango tii na Ofɛlɛ;+ amatisaki yango molai mpenza. Lisusu, atyaki bakonzi ya limpinga ya basoda na bingumba nyonso ya Yuda oyo ebatelami makasi. 15 Na nsima, alongolaki banzambe ya bapaya mpe ekeko oyo ezalaki na ndako ya Yehova+ mpe bitumbelo nyonso oyo atongaki na ngomba ya ndako ya Yehova+ mpe na Yerusaleme, mpe abwakaki yango libándá ya engumba. 16 Abongisaki mpe etumbelo ya Yehova+ mpe abandaki kopesa likoló na yango bambeka ya kimya+ mpe bambeka ya kozongisa matɔndi+ mpe ayebisaki bato ya Yuda ete básalela Yehova Nzambe ya Yisraele. 17 Nzokande, bato bazalaki se kopesa bambeka na bisika oyo etombwaná, atako bazalaki kopesa yango kaka epai ya Yehova Nzambe na bango.

18 Makambo mosusu ya lisolo ya Manase, libondeli oyo asalaki epai ya Nzambe na ye mpe maloba ya bamoni-bimonaneli oyo bazalaki koloba na ye na nkombo ya Yehova Nzambe ya Yisraele, ekomami na buku ya masolo ya bakonzi ya Yisraele. 19 Lisusu, libondeli na ye+ ná ndenge Nzambe ayokaki kolela na ye, ezala mpe masumu na ye nyonso mpe kozanga bosembo na ye,+ bipai nyonso oyo atongaki bisika oyo etombwaná mpe atyaki banzete ya losambo*+ ná bikeko liboso ete amikitisa, nyonso wana ekomami na kati ya buku ya maloba ya bamoni-bimonaneli na ye. 20 Na nsima, Manase akufaki,* mpe bakundaki ye pene na ndako na ye. Mpe mwana na ye Amone akómaki mokonzi na esika na ye.+

21 Amone+ azalaki na mbula 22 ntango akómaki mokonzi, mpe ayangelaki mbula mibale na Yerusaleme.+ 22 Mpe akobaki kosala makambo oyo ezali mabe na miso ya Yehova, kaka ndenge tata na ye Manase asalaki.+ Apesaki mbeka na bikeko nyonso oyo tata na ye Manase asalaki,+ mpe azalaki kosalela yango. 23 Kasi amikitisaki te liboso ya Yehova,+ ndenge tata na ye Manase amikitisaki.+ Amone abakisaki kutu ngambo mingi koleka. 24 Nsukansuka, basaleli na ye basalelaki ye likita+ mpe babomaki ye na ndako na ye moko. 25 Kasi bato ya ekólo babomaki bato nyonso oyo basalelaki Mokonzi Amone likita,+ mpe bakómisaki mwana na ye Yosiya+ mokonzi na esika na ye.