Mokanda ya mibale ya Ntango
14 Na nsima Abiya akufaki* mpe bakundaki ye na Sité ya Davidi;+ mpe mwana na ye Asa akómaki mokonzi na esika na ye. Na boyangeli na ye, ekólo ezalaki na kimya mbula zomi.
2 Asa asalaki makambo oyo ezali malamu mpe sembo na miso ya Yehova Nzambe na ye. 3 Alongolaki bitumbelo+ ya bapaya mpe bisika oyo etombwaná, abebisaki makonzí ya losambo+ mpe akataki banzete ya losambo.*+ 4 Lisusu, ayebisaki bato ya Yuda báluka Yehova Nzambe ya bankɔkɔ na bango mpe bátosa Mobeko mpe mitindo na ye nyonso. 5 Bongo alongolaki na bingumba nyonso ya Yuda bisika oyo etombwaná mpe bitumbelo ya mpaka ya malasi;+ mpe na nse ya boyangeli na ye, bokonzi ya Yuda ezalaki na kimya. 6 Atongaki bingumba ya makasi na Yuda,+ mpo ekólo ezalaki na kimya; mpe etumba ata moko te ebimelaki ye na bambula yango, mpo Yehova apesaki ye bopemi.+ 7 Alobaki na bato ya Yuda boye: “Tótonga bingumba oyo mpe tózinga yango na bifelo, manɔ́ngi,+ baporte* mpe bikangiseli. Ekólo ezali naino na mabɔkɔ na biso, mpo toluki Yehova Nzambe na biso, toluki ye mpe apesi biso bopemi epai na epai.” Bongo balongaki kotonga yango nyonso.+
8 Asa azalaki na limpinga ya basoda 300 000 na Yuda oyo bazalaki na banguba minene mpe makɔnga. Mpe na libota ya Benyamina, azalaki na bilombe ya etumba 280 000 oyo bazalaki komema banguba mike* mpe kobunda na matimbo.*+
9 Na nsima, Zera moto ya Etiopi ayaki na limpinga ya basoda 1 000 000 mpe makalo 300 mpo na kobunda na bango.+ Ntango akómaki na Maresha,+ 10 Asa abimaki kobunda na ye. Batandamaki na molɔngɔ mpo na kobunda na Lobwaku ya Zefata, na Maresha. 11 Bongo Asa abelelaki Yehova Nzambe+ na ye mpe alobaki: “Ee Yehova, yo osalisaka kaka, ezala bato oyo ozali kosalisa bazali na makasi* to bazali na makasi te.+ Ee Yehova Nzambe na biso, salisá biso mpo totyeli yo motema,*+ mpe toyei kobunda na ebele ya bato oyo na nkombo na yo.+ Ee Yehova, ozali Nzambe na biso. Kotika te ete moto, mowei mpamba, alonga yo.”+
12 Bongo Yehova asalaki ete Asa mpe bato ya Yuda bálonga bato ya Etiopi, mpe bato ya Etiopi bakimaki.+ 13 Asa ná bato na ye balandaki bango tii na Gerare,+ mpe babomaki bato ya Etiopi tii ata moko te atikalaki na bomoi; mpo Yehova ná limpinga na ye basilisaki bango nyonso. Nsima na yango, bato ya Yuda bamemaki ebele ya biloko oyo bapunzaki. 14 Lisusu, babundisaki bingumba nyonso oyo ezalaki zingazinga ya Gerare, mpo bafandi ya bingumba yango bayokaki nsɔmɔ mpo na Yehova, bapunzaki bingumba nyonso, mpo biloko ya kopunza ezalaki mingi na bingumba yango. 15 Babebisaki mpe bahema ya babateli ya bibwɛlɛ, mpe bakangaki bitonga ebele ya bampate mpe ya bakamela. Nsima na yango, bazongaki na Yerusaleme.