Mokanda ya mibale ya Ntango
15 Bongo elimo ya Nzambe eyelaki Azaria mwana ya Odede. 2 Na yango akendaki kokutana na Asa mpe alobaki na ye boye: “Bóyoka ngai, Ee Asa mpe bino nyonso bato ya Yuda mpe ya Benyamina! Yehova azali elongo na bino ntango nyonso oyo botikali epai na ye;+ mpe soki boluki ye, akotika ete bómona ye,+ kasi soki bosundoli ye, ye mpe akosundola bino.+ 3 Mpo na ntango molai,* Yisraele ezalaki na Nzambe ya solo te, ezangaki nganga-nzambe mpo na koteya mpe ezangaki mobeko.+ 4 Kasi na kati ya mpasi na bango, ntango bazongelaki Yehova Nzambe ya Yisraele mpe balukaki ye, atikaki ete bámona ye.+ 5 Na ntango wana moto moko te akokaki kosala mobembo na kimya,* mpo mobulu ezalaki mingi kati na bato nyonso oyo bazalaki kofanda na bitúká ya mokili yango. 6 Ekólo moko ezalaki kobebisa ekólo mosusu mpe engumba moko ezalaki kobebisa engumba mosusu, mpo Nzambe atikaki bango na mobulungano na bampasi ya ndenge nyonso.+ 7 Kasi bino, bózala makasi mpe bólɛmba nzoto te,*+ mpo mosala na bino ezali na mbano.”
8 Ntango kaka Asa ayokaki maloba yango mpe esakweli ya mosakoli Odede, azwaki mpiko mpe alongolaki bikeko ya bosɔtɔ na mokili mobimba ya Yuda+ mpe ya Benyamina mpe na bingumba oyo azwaki na etúká ya ngombangomba ya Efraime, mpe abongisaki etumbelo ya Yehova oyo ezalaki liboso ya ndako ya kokɔtela ya Yehova.+ 9 Mpe ayanganisaki Yuda mobimba mpe Benyamina ná bato oyo bafandi bapaya oyo bazalaki elongo na bango, bato ya Efraime, ya Manase mpe ya Simeone,+ ebele ya bato oyo bakimaki Yisraele, mpe bayaki epai ya Asa ntango bamonaki ete Yehova Nzambe na ye azalaki elongo na ye. 10 Bongo bayanganaki na Yerusaleme na sanza ya misato ya mbula ya 15 ya boyangeli ya Asa. 11 Na mokolo yango, bapesaki Yehova mbeka ya ngɔmbɛ 700 mpe mpate 7 000 oyo eutaki na biloko oyo bapunzaki. 12 Lisusu, basalaki kondimana ete bakoluka Yehova Nzambe ya bankɔkɔ na bango na motema na bango mobimba mpe na molimo* na bango mobimba.+ 13 Moto nyonso oyo akoluka Yehova Nzambe ya Yisraele te asengeli kobomama, azala elenge to mokóló,* mobali to mwasi.+ 14 Bongo balapaki ndai epai ya Yehova na mongongo makasi, na koganga ya esengo, na bakelelo mpe na maseke. 15 Mpe bato nyonso ya Yuda basepelaki mpo na ndai oyo balapaki, mpo balapaki ndai yango na motema na bango mobimba, mpe bamipesaki mobimba na koluka Nzambe mpe ye atikaki ete bámona ye;+ mpe Yehova akobaki kopesa bango bopemi bipai nyonso.+
16 Mokonzi Asa alongolaki ata nkɔkɔ na ye Maaka,+ na ebonga na ye ya mama-mokonzi,* mpo asalaki ekeko moko ya mbindo mpo na losambo oyo ezalaki kosalema na nzete ya losambo.*+ Asa abukaki ekeko yango ya mbindo, apanzaki yango mikemike mpe atumbaki yango na Lobwaku ya Kidrone.+ 17 Kasi bisika oyo etombwaná elongwaki te+ na Yisraele.+ Atako bongo motema ya Asa ezalaki mobimba* epai ya Nzambe bomoi na ye mobimba.*+ 18 Mpe Asa akɔtisaki na ndako ya Nzambe ya solo biloko oyo ye ná tata na ye basantisaki: palata, wolo mpe bisaleli ndenge na ndenge.+ 19 Etumba ezalaki te tii na mbula ya 35 ya boyangeli ya Asa.+