Yirimia
16 Yehova alobaki na ngai lisusu ete: 2 “Osengeli te kobala, mpe osengeli te kozala na bana mibali mpe ya basi na esika oyo. 3 Mpo talá oyo Yehova alobi mpo na bana mibali mpe bana basi oyo bazali kobotama na esika oyo, mpe mpo na bamama na bango oyo bazali kobota bango mpe mpo na batata na bango na mokili oyo: 4 ‘Bakokufa na bamaladi oyo ebomaka,+ kasi moto moko te akolela bango to akokunda bango. Bakokóma lokola nyɛi na etando ya mabele.+ Bakokufa na mopanga mpe na nzala,+ mpe bibembe na bango ekozala mpenza bilei mpo na bandɛkɛ ya likoló mpe mpo na banyama ya mabele.’
5 Mpo talá oyo Yehova alobi:
‘Kokɔta te na ndako oyo bazali kosala fɛti ya matánga,
Mpe kokende kolela te mpe kobɔndisa bango te.’+
‘Mpo nalongoli kimya na ngai epai ya bato oyo,’ Yehova alobi bongo,
‘Nalongoli mpe bolingo ya sembo na ngai mpe motema mawa na ngai.+
6 Bato minene mpe bato mike bakokufa na mokili oyo.
Bakokundama te,
Moto moko te akolela bango,
Moto moko te akomikatakata nzoto to akokokola motó mpo na bango.*
7 Mpe moto moko te akopesa bilei mpo na baoyo bazali kolela,
Kobɔndisa bango mpo na bato oyo bakufi;
Mpe moto moko te akopesa bango kɔpɔ ya vinyo oyo ebɔndisaka
Mpo na komɛla ndenge babungisi tata to mama na bango.
8 Mpe kokɔta te na ndako ya fɛti
Mpo na kofanda elongo na bango mpo na kolya mpe komɛla.’
9 “Mpo talá oyo Yehova ya mampinga, Nzambe ya Yisraele, alobi: ‘Talá na esika oyo, na miso na bino mpe na mikolo na bino, nakosukisa koganga ya kosepela mpe ya esengo, mongongo ya mobali ya libala mpe ya mwasi ya libala.’+
10 “Ntango okoyebisa bato oyo maloba oyo nyonso, bakotuna yo: ‘Mpo na nini Yehova alobi ete mpasi monene boye ekómela biso, libunga nini mpe lisumu nini tosaleli Yehova Nzambe na biso?’+ 11 Osengeli koyanola bango ete: ‘“Mpo batata na bino basundolaki ngai,”+ Yehova alobi bongo, “mpe bakobaki kosambela banzambe mosusu, kosalela bango mpe kogumbamela bango.+ Kasi basundolaki ngai, mpe batosaki te mobeko na ngai.+ 12 Mpe bino, bosali mabe mingi koleka batata na bino,+ mpe mokomoko na bino alandi na motó makasi motema mabe na ye na esika ya kotosa ngai.+ 13 Yango wana nakolongola bino na mokili oyo, mpe nakobwaka bino na mokili oyo ezala bino to batata na bino boyebi te,+ mpe kuna bokosalela mpenza banzambe mosusu butu moi,+ mpo nakomonisela bino boboto te.”’
14 Nzokande, Yehova alobi boye: “‘Mikolo ezali koya, bakoloba lisusu te ete: “Lokola Yehova azali solo na bomoi, ye oyo abimisaki bana ya Yisraele na mokili ya Ezipito!”+ 15 Kasi bakoloba nde ete: “Lokola Yehova azali solo na bomoi, moto oyo abimisaki bato ya Yisraele na mokili ya nɔrdi mpe na mikili nyonso epai apalanganisaki bango!” Mpe nakozongisa bango na mokili na bango, oyo napesaki bankɔkɔ na bango.’+
16 ‘Talá nazali kobengisa baluki-mbisi ebele,’ Yehova alobi bongo,
‘Mpe bakoluka bango ndenge balukaka mbisi;
Na nsima nakobengisa babomi-nyama ebele,
Mpe bakoluka bango ndenge balukaka nyama na ngomba nyonso mpe na ngomba nyonso ya moke
Mpe na madusu ya mabanga.
17 Mpo miso na ngai ezali likoló ya eloko nyonso oyo basalaka.*
Babombani te liboso na ngai,
Libunga na bango mpe ebombani te na miso na ngai.
18 Libosoliboso, nakopesa bango etumbu makasi mpenza mpo na libunga na bango mpe lisumu na bango,+
Mpo bakómisi mabele na ngai eloko mpamba na bikeko na bango ya bosɔtɔ oyo ezangi bomoi
Mpe batondisi libula na ngai na biloko na bango oyo eyinamá.’”+
19 Ee Yehova, makasi na ngai mpe esika makasi ya libateli na ngai,
Esika na ngai ya kokima na mokolo ya mpasi,+
Bato ya bikólo bakoya epai na yo longwa na bansuka ya mabele
Mpe bakoloba ete: “Libula oyo bankɔkɔ na biso bazwaki ezali kaka lokuta,
Eloko ya mpamba mpe makambo oyo epesaka litomba te.”+
21 “Bongo nakosala ete báyeba,
Na ntango yango nakosala ete báyeba makasi na ngai mpe nguya na ngai,
Mpe bakoyeba mpenza ete nkombo na ngai ezali Yehova.”