Mokanda ya mibale ya Ntango
30 Ezekiasi atindaki maloba na Yisraele mobimba+ mpe na Yuda; akomaki kutu mikanda mpo na kobengisa bato ya Efraime mpe ya Manase+ ete báya na ndako ya Yehova na Yerusaleme kosala fɛti ya Elekeli mpo na Yehova Nzambe ya Yisraele.+ 2 Nzokande, mokonzi ná bankumu ya ekólo mpe lisangá mobimba na Yerusaleme bayokanaki ete básala fɛti ya Elekeli na sanza ya mibale,+ 3 mpo balongaki te kosala yango na mokolo oyo esengelaki,+ mpo banganga-nzambe oyo bamisantisaki bazalaki mingi te,+ mpe bato bayanganaki na Yerusaleme te. 4 Mokonzi mpe lisangá mobimba bamonaki ete ebongiseli yango ezali malamu. 5 Bongo bayokanaki ete báyebisa na Yisraele mobimba, banda na Beere-sheba tii na Dani,+ ete bato basengeli koya na Yerusaleme mpo na kosala fɛti ya Elekeli mpo na Yehova Nzambe ya Yisraele, mpo basalaki yango elongo te ndenge Mobeko esɛngaki.+
6 Na nsima, kaka ndenge mokonzi apesaki mitindo, bamemi-nsango* bakendaki na Yisraele mobimba mpe na Yuda, na mikanda oyo eutaki epai ya mokonzi mpe bankumu ya ekólo, balobi: “Bato ya Yisraele, bózongela Yehova Nzambe ya Abrahama, ya Yisaka mpe ya Yisraele, mpo ye mpe azongela bato na biso oyo batikali, oyo babikaki na lobɔkɔ ya bakonzi ya Asiri.+ 7 Bózala te lokola bankɔkɔ na bino mpe lokola bandeko na bino oyo bazangaki bosembo epai ya Yehova Nzambe ya bankɔkɔ na bango, bongo akómisaki bango eloko ya kokamwa, ndenge bozali komona.+ 8 Sikoyo, bózala mitó makasi te lokola bankɔkɔ na bino.+ Bómikitisa liboso ya Yehova mpe bóya na esika na ye mosantu+ oyo asantisi mpo na libela, mpe bósalela Yehova Nzambe na bino, mpo nkanda na ye ya kongala elongwa epai na bino.+ 9 Mpo soki bozongeli Yehova, baoyo bakangaki bandeko na bino mpe bana na bino bakoyokela bango mawa,+ mpe bakopesa bango nzela ya kozonga na mokili oyo,+ mpo Yehova Nzambe na bino azali Nzambe oyo azali na ngɔlu* mpe azali na motema mawa,+ mpe akopesa bino mokɔngɔ te soki bozongeli ye.”+
10 Bongo bamemi-nsango* balekaki engumba na engumba na ekólo mobimba ya Efraime mpe ya Manase,+ ata tii na Zebulone, kasi bato bazalaki kosɛka bango mpe kotyola bango.+ 11 Nzokande bato mosusu na Ashere, na Manase mpe na Zebulone bamikitisaki, mpe bayaki na Yerusaleme.+ 12 Lobɔkɔ ya Nzambe ya solo esalisaki mpe bato ya Yuda bázala na bomoko,* mpo na kokokisa mitindo oyo mokonzi mpe bankumu bapesaki bango na kolanda liloba ya Yehova.
13 Ebele ya bato bayanganaki na Yerusaleme mpo na kosala fɛti ya Mampa ezangá levire+ na sanza ya mibale;+ ezalaki lisangá ya bato ebele mpenza. 14 Babandaki mosala mpe balongolaki bitumbelo nyonso oyo ezalaki na Yerusaleme,+ mpe bitumbelo nyonso ya mpaka ya malasi,+ mpe babwakaki yango na Lobwaku ya Kidrone. 15 Na nsima, na mokolo ya 14 ya sanza ya mibale, babomaki banyama mpo na fɛti ya Elekeli. Banganga-nzambe ná Balevi bayokaki nsɔni, na yango bamisantisaki mpe bamemaki makabo ya kotumba na ndako ya Yehova. 16 Batɛlɛmaki na bisika na bango, na kolanda Mobeko ya Moize moto ya Nzambe ya solo. Na nsima Balevi bazalaki kopesa banganga-nzambe makila+ ya banyama mpe bango bazalaki komwangisa yango likoló ya etumbelo. 17 Lokola bato mingi na kati ya lisangá bamisantisaki te, Balevi bazwaki mokumba ya koboma banyama ya fɛti ya Elekeli mpo na baoyo nyonso bazalaki pɛto te,+ mpo básantisa bango mpo na Yehova. 18 Mpo bato ebele, mingimingi ya Efraime, ya Manase,+ ya Isakare mpe ya Zebulone, bamipɛtolaki te, atako bongo balyaki bilei ya Elekeli, balandaki te ndenge ekomamaki na Mobeko. Kasi Ezekiasi abondelaki mpo na bango, alobi: “Tiká Yehova, oyo azali malamu,+ alimbisa 19 moto nyonso oyo abongisi motema na ye mpo na koluka Nzambe ya solo,+ Yehova, Nzambe ya bankɔkɔ na ye, atako amipɛtoli te na kolanda mibeko ya bosantu.”+ 20 Yehova ayokaki Ezekiasi mpe alimbisaki* bato.
21 Bongo Bayisraele oyo bazalaki na Yerusaleme basalaki fɛti ya Mampa oyo ezangá levire+ mikolo nsambo, bazalaki kosepela+ mpenza. Mpe Balevi ná banganga-nzambe bazalaki kosanzola Yehova mokolo na mokolo, bazalaki kobɛta makasi bibɛtɛlo na bango ya miziki mpo na Yehova.+ 22 Lisusu, Ezekiasi alobaki maloba oyo elendisaki* Balevi nyonso oyo bazalaki kosalela Yehova na bososoli. Mpe bato balyaki mikolo nyonso nsambo ya fɛti yango;+ bazalaki kopesa bambeka ya kimya*+ mpe kopesa Yehova Nzambe ya bankɔkɔ na bango matɔndi.
23 Bongo lisangá mobimba eyokanaki ete básala lisusu fɛti yango mikolo nsambo; na yango basalaki yango mikolo mosusu nsambo, na esengo.+ 24 Mpe Ezekiasi mokonzi ya Yuda apesaki likabo mpo na lisangá: bangɔmbɛ-mibali 1 000 mpe bampate 7 000; bankumu mpe bapesaki likabo mpo na lisangá: bangɔmbɛ-mibali 1 000 mpe bampate 10 000;+ mpe banganga-nzambe ebele bazalaki se komisantisa.+ 25 Bato nyonso ya Yuda oyo bayanganaki, banganga-nzambe ná Balevi, bato nyonso oyo bautaki na Yisraele+ ná bato oyo bafandi bapaya,+ oyo bautaki na ekólo Yisraele mpe baoyo bafandi na Yuda bakobaki kosepela. 26 Mpe esengo ezalaki makasi na Yerusaleme, mpe banda na mikolo ya Salomo mwana ya Davidi mokonzi ya Yisraele, likambo ya ndenge wana esalemaki te na Yerusaleme.+ 27 Nsukansuka, banganga-nzambe Balevi batɛlɛmaki mpe bapambolaki bato.+ Nzambe ayokaki mongongo na bango, mpe libondeli na bango ekómaki tii na likoló, esika mosantu oyo ye afandaka.