Mokanda ya liboso ya Samwele

31 Bongo Bafilistia bazalaki kobundisa Yisraele.+ Basoda ya Yisraele bakimaki liboso ya Bafilistia, mpe mingi na bango babomamaki na Ngomba Gilboa.+ 2 Bafilistia bazalaki kaka kolanda Saulo ná bana na ye, mpe nsukansuka babomaki Yonatane,+ Abinadabe, mpe Malaki-shua, bana ya Saulo.+ 3 Etumba eyelaki Saulo ndongo, mpe bato oyo babwakaka makula bamonaki ye mpe bazokisaki ye makasi.+ 4 Bongo Saulo alobaki na momemi-bibundeli na ye: “Bendá mopanga na yo mpe tɔbɔlá ngai na yango, mpo bisutu+ oyo báya te kotɔbɔla ngai mpe koboma ngai lokola nyama.”* Kasi momemi-bibundeli na ye aboyaki, mpo azalaki kobanga mingi. Bongo Saulo azwaki mopanga mpe akwelaki yango.+ 5 Ntango momemi-bibundeli na ye amonaki ete Saulo akufi,+ ye mpe akwelaki mopanga na ye mpe akufaki elongo na ye. 6 Bongo Saulo, bana na ye misato, momemi-bibundeli na ye, ná baoyo nyonso bazalaki kobunda mpo na ye bakufaki bango nyonso na mokolo wana.+ 7 Ntango bato ya Yisraele oyo bazalaki na etúká ya lobwaku* mpe na etúká ya Yordani bamonaki ete mibali ya Yisraele bakimi, mpe ete Saulo ná bana na ye bakufi, basundolaki bingumba mpe bakimaki.+ Na nsima, Bafilistia bakɔtaki na bingumba yango mpe bakómaki kofanda kuna.

8 Na mokolo oyo elandaki, ntango Bafilistia bayaki kozwa biloko ya bato oyo babomamaki, bakutaki ebembe ya Saulo mpe oyo ya bana na ye misato elali na Ngomba Gilboa.+ 9 Bongo bakataki motó ya Saulo mpe balongolaki bibundeli na ye. Batindaki bato na ekólo mobimba ya Bafilistia mpo na kopanza nsango+ na batempelo* ya banzambe na bango ya bikeko+ mpe epai ya bato. 10 Na nsima, batyaki bibundeli na ye na tempelo ya bikeko ya Ashitorete, mpe bakangisaki ebembe na ye na efelo ya Bete-shane.+ 11 Ntango bato oyo bafandi na Yabeshe-gileade+ bayokaki oyo Bafilistia basalaki Saulo, 12 bilombe nyonso batɛlɛmaki, bakendaki butubutu mpe bazwaki ebembe ya Saulo ná oyo ya bana na ye na efelo ya Bete-shane. Bazongaki na Yabeshe mpe batumbaki yango kuna. 13 Na nsima, bazwaki mikuwa na bango+ mpe bakundaki yango na Yabeshe,+ na nse ya nzete ya tamarisi, mpe bakilaki bilei mikolo nsambo.