Mokanda ya liboso ya Ntango

5 Talá bana ya Rubene,+ mwana ya liboso ya Yisraele. Azalaki mwana ya liboso, kasi lokola akómisaki mbeto ya tata na ye mbindo,*+ lotomo na ye ya mwana ya liboso epesamaki na bana ya Yozefe,+ mwana ya Yisraele. Mpo na yango, na molɔngɔ ya bankɔkɔ, Rubene akomamaki nkombo lokola mwana ya liboso te. 2 Yuda+ alekaki bandeko na ye mpe ezali na libota na ye nde moto oyo aponamaki mpo na kozala mokambi abimaki.+ Atako bongo, Yozefe moto azalaki na lotomo ya mwana ya liboso. 3 Bana mibali ya Rubene mwana ya liboso ya Yisraele ezalaki Hanoke, Palu, Hezerone, mpe Karami.+ 4 Bana ya Yoele ezalaki: mwana na ye Shemaya, mwana na ye Goge, mwana na ye Shimei, 5 mwana na ye Mika, mwana na ye Reaya, mwana na ye Baala, 6 mpe mwana na ye Beera, oyo Tilgate-pilinesere+ mokonzi ya Asiri amemaki na mboka mopaya; azalaki nkumu ya Barubene. 7 Bandeko na ye na kolanda mabota na bango, ndenge bakomamaki nkombo na kolanda molɔngɔ ya bankɔkɔ na bango, ezalaki nkumu Yeyele, Zekaria, 8 mpe Bela mwana ya Azaze mwana ya Shema mwana ya Yoele, oyo azalaki kofanda na etúká oyo ezalaki banda na engumba Aroere+ tii na Nebo mpe Baala-meone.+ 9 Na ɛsti bazalaki kofanda na ebandeli ya esobe tii na Ebale Efrate,+ mpo bibwɛlɛ na bango ekómaki ebele na mokili ya Gileade.+ 10 Na mikolo ya Saulo, babundisaki Bahagri mpe balongaki bango; na yango, bafandaki na bahema na bango na teritware mobimba ya ɛsti ya Gileade.

11 Bakitani ya Gade bazalaki kofanda penepene na bango, na mokili ya Bashane tii na Saleka.+ 12 Na Bashane, Yoele azalaki nkumu, mpe Shafame moto ya mibale; ezalaki mpe na Yanai ná Shafate. 13 Mpe talá bandeko na bango oyo bazalaki bato ya mabota ya batata na bango: Mikaele, Meshulame, Sheba, Yorai, Yakane, Zia, ná Ebere. Bazalaki nsambo. 14 Bango nde bazalaki bana ya Abihaile mwana ya Huri, mwana ya Yaroa, mwana ya Gileade, mwana ya Mikaele, mwana ya Yeshishai, mwana ya Yahado, mwana ya Buze. 15 Ahi mwana ya Abadiele, mwana ya Guni, azalaki nkumu ya libota ya batata na bango. 16 Bazalaki kofanda na Gileade,+ na Bashane+ mpe na basité oyo esimbami na yango,* mpe na bisika nyonso ya koleisa bibwɛlɛ matiti na Sharone tii na bansuka na yango. 17 Bango nyonso bakomamaki nkombo na kolanda molɔngɔ ya bankɔkɔ na bango na mikolo ya Yotame+ mokonzi ya Yuda mpe na mikolo ya Yeroboame*+ mokonzi ya Yisraele.

18 Barubene, Bagade, mpe ndambo ya libota ya Manase bazalaki na bilombe ya etumba 44 760 na limpinga na bango ya basoda oyo bazalaki komema nguba ná mopanga mpe oyo bazalaki kobunda na matimbo* mpe bamesaná na etumba. 19 Babundaki na Bahagri,+ bakitani ya Yeture, bakitani ya Nafishi,+ mpe bakitani ya Nodabe. 20 Ntango bazalaki kobunda na bango, Nzambe asalisaki bango bálonga Bahagri mpe baoyo nyonso bazalaki elongo na bango. Nzambe asalaki bongo mpo babelelaki ye mpo na kosɛnga ete asalisa bango na etumba yango. Ayokaki libondeli na bango mpo batyelaki ye motema.+ 21 Bakangaki bibwɛlɛ na bango: bakamela 50 000, bampate 250 000, mpe bampunda 2 000. Bakangaki mpe bato* 100 000. 22 Babomaki banguna na bango ebele, mpo Nzambe ya solo azalaki kobundela bango.+ Mpe bafandaki na mokili yango na esika ya banguna na bango tii ntango bamemamaki na mboka mopaya.+

23 Bakitani ya ndambo ya libota ya Manase+ bafandaki na mokili yango banda na Bashane tii na Baala-heremone, Senire mpe na Ngomba Heremone.+ Bazalaki ebele. 24 Mpe bankumu ya mabota ya batata na bango ezalaki: Efere, Yishi, Eliele, Aziriele, Yirimia, Hodavia ná Yadiele; bazalaki bilombe ya etumba, mibali ya lokumu, mpe bankumu ya mabota ya batata na bango. 25 Kasi bazalaki sembo te epai ya Nzambe ya bankɔkɔ na bango mpe basalaki bondumba na banzambe ya bato ya bikólo ya mokili yango,+ oyo Nzambe asilisaki liboso na bango. 26 Bongo, Nzambe ya Yisraele asalaki ete* Pulu mokonzi ya Asiri+ (elingi koloba Tilgate-pilinesere+ mokonzi ya Asiri) azwa Barubene, Bagade, mpe ndambo ya libota ya Manase mpe amema bango na mboka mopaya. Pulu amemaki bango na Hala, na Habore, na Hara mpe na ebale Gozane,+ esika bazali tii na mokolo ya lelo.