Mokanda ya mibale ya

14 Na mbula ya mibale ya boyangeli ya Yehoashe+ mwana ya Yehoahaze mokonzi ya Yisraele, Amazia mwana ya Yehoashe mokonzi ya Yuda akómaki mokonzi. 2 Amazia azalaki na mbula 25 ntango akómaki mokonzi, mpe ayangelaki mbula 29 na Yerusaleme. Nkombo ya mama na ye ezalaki Yehoadine, moto ya Yerusaleme.+ 3 Amazia akobaki kosala makambo oyo ezali malamu na miso ya Yehova, kasi te lokola nkɔkɔ na ye Davidi.+ Alandaki kaka lokolo ya tata na ye Yehoashe.+ 4 Kasi bisika oyo etombwaná elongwaki te na ekólo.+ Bato bazalaki se kopesa mbeka mpe kobimisa milinga ya mbeka na bisika oyo etombwaná.+ 5 Ntango kaka Amazia afandisaki bokonzi na ye makasi, abomaki basaleli na ye oyo babomaki mokonzi, tata na ye.+ 6 Kasi abomaki bana ya babomi yango te, na boyokani na mitindo ya Yehova oyo ekomami na buku ya Mobeko ya Moize: “Batata bakobomama te mpo na masumu ya bana na bango, mpe bana bakobomama te mpo na masumu ya batata na bango; kasi moto na moto akobomama mpo na lisumu na ye moko.”+ 7 Mokolo moko Amazia abomaki Baedome+ 10 000 na Lobwaku ya Mungwa.+ Na etumba yango, abɔtɔlaki engumba Sela+ mpe ekómaki kobengama Yokoteele, tii na mokolo ya lelo.

8 Na nsima Amazia atindaki bamemi-nsango epai ya Yehoashe mwana ya Yehoahaze mwana ya Yehu mokonzi ya Yisraele, alobi: “Yaká tóbunda.”*+ 9 Yehoashe mokonzi ya Yisraele atindelaki Amazia mokonzi ya Yuda maloba oyo: “Lititi ya nzubɛnzubɛ ya Liban etindelaki sɛdrɛ ya Liban maloba ete: ‘Pesá mwana na ngai ya mobali mwana na yo ya mwasi mpo abala ye.’ Nzokande, nyama moko ya zamba ya Liban elekaki wana mpe enyataki lititi yango ya nzubɛnzubɛ. 10 Ya solo olongi Edome,+ yango wana motema na yo ekómi na lolendo. Sepelá na nkembo na yo, kasi fandá na ndako na yo.* Mpo na nini olingi komilukela mpasi mpe kokwea, yo elongo na Yuda?” 11 Kasi Amazia ayokaki te.+

Na yango, Yehoashe mokonzi ya Yisraele akendaki kobunda na Amazia mokonzi ya Yuda na Bete-shemeshe,+ oyo ezali na Yuda.+ 12 Yisraele elongaki Yuda. Bongo basoda ya Yuda bakimaki moto na moto na ndako* na ye. 13 Na Bete-shemeshe, Yehoashe mokonzi ya Yisraele akangaki Amazia mokonzi ya Yuda mwana ya Yehoashe mwana ya Ahazia. Na nsima ayaki na Yerusaleme, mpe kuna abukaki ndambo ya efelo ya Yerusaleme, banda na Porte ya Efraime+ tii na Porte ya Litumu;+ esika oyo etikalaki polele ezalaki mapeko 400.* 14 Azwaki wolo nyonso mpe palata nyonso ná biloko nyonso oyo ezalaki na ndako ya Yehova mpe na bisika ya kobomba biloko ya motuya ya ndako ya mokonzi. Azwaki mpe bakangami. Na nsima, azongaki na Samaria.

15 Makambo mosusu ya lisolo ya Yehoashe, ná nyonso oyo asalaki, ná nguya na ye nyonso, ná ndenge abundaki na Amazia mokonzi ya Yuda, ekomami na buku ya masolo ya kala ya bakonzi ya Yisraele. 16 Na nsima Yehoashe akufaki* mpe bakundaki ye na Samaria+ esika moko na bakonzi ya Yisraele; mpe mwana na ye Yeroboame*+ akómaki mokonzi na esika na ye.

17 Amazia+ mwana ya Yehoashe mokonzi ya Yuda aumelaki lisusu na bomoi mbula 15 nsima ya liwa ya Yehoashe+ mwana ya Yehoahaze mokonzi ya Yisraele.+ 18 Makambo mosusu ya lisolo ya Amazia, ekomami na buku ya masolo ya kala ya bakonzi ya Yuda. 19 Na nsima basalelaki Amazia likita+ na Yerusaleme, mpe akimaki na Lakishi; kasi batindaki bato bálanda ye na Lakishi mpe babomaki ye kuna. 20 Bongo bamemaki ebembe na ye na Yerusaleme, na likalo oyo bampunda ezalaki kobenda, mpe bakundaki ye esika moko na bankɔkɔ na ye na Sité ya Davidi.+ 21 Na nsima bato nyonso ya Yuda bazwaki Azaria,*+ oyo azalaki na mbula 16,+ mpe batyaki ye mokonzi na esika ya tata na ye Amazia.+ 22 Ye atongaki lisusu engumba Elate+ mpe azongiselaki yango Yuda, wana mokonzi* asilaki kokufa.*+

23 Na mbula ya 15 ya boyangeli ya Amazia mokonzi ya Yuda mwana ya Yehoashe, Yeroboame+ mwana ya Yehoashe mokonzi ya Yisraele akómaki mokonzi na Samaria. Mpe ayangelaki mbula 41. 24 Akobaki kosala makambo oyo ezali mabe na miso ya Yehova. Atikaki te kosala masumu nyonso oyo Yeroboame mwana ya Nebate asalisaki Yisraele.+ 25 Azongisaki ndelo ya Yisraele banda na Lebo-hamate*+ tii na Mbu ya Araba,*+ ndenge kaka Yehova Nzambe ya Yisraele alobaki na nzela ya mosaleli na ye Yona+ mwana ya Amitai, mosakoli oyo azalaki moto ya Gate-efere.+ 26 Mpo Yehova amonaki mpasi makasi oyo Yisraele ekómaki na yango.+ Ezalaki ata na moto moko te mpo na kosalisa Yisraele, ezala moto oyo azangi makoki to oyo azangi ntina. 27 Kasi Yehova alakaki ete akolongola nkombo ya Yisraele te na mabele.+ Na yango, abikisaki bango na nzela ya lobɔkɔ ya Yeroboame mwana ya Yehoashe.+

28 Makambo mosusu ya lisolo ya Yeroboame, ná nyonso oyo asalaki, ná nguya na ye nyonso, ná ndenge abundaki mpe atyaki lisusu Damasi+ mpe Hamate+ na nse ya bokonzi ya Yuda na Yisraele, ekomami na buku ya masolo ya kala ya bakonzi ya Yisraele. 29 Na nsima Yeroboame akufaki* mpe bakundaki ye esika moko na bankɔkɔ na ye, bakonzi ya Yisraele. Mpe mwana na ye Zekaria+ akómaki mokonzi na esika na ye.