Mokanda ya liboso epai ya Bakorinti
16 Sikoyo mpo na likambo ya kokɔngɔla makabo mpo na basantu,+ bosengeli kolanda malako oyo napesaki na masangá ya Galatia. 2 Mokolo nyonso ya liboso na pɔsɔ, mokomoko na bino abomba mwa eloko pembeni na kotalela biloko oyo azali na yango, boye ntango nakoya, makabo ekɔngɔlama te na ntango yango. 3 Ntango nakoya, nakotinda bato oyo bondimi na mikanda na bino,+ mpo bámema makabo na bino ya boboto na Yerusaleme. 4 Nzokande, soki emonani ete ebongi nakende mpe kuna, tokokende na bango elongo.
5 Nakoya epai na bino ntango nakosilisa kokatisa Masedonia, mpo nakoleka na Masedonia;+ 6 mpe nakoki kofanda na bino mpo na mwa ntango, mbala mosusu nakolekisa eleko ya malili makasi elongo na bino, bongo na nsima bokoki kokende kotika ngai na nzela epai nakokende. 7 Mpo nalingi namona bino kaka ntango nakoleka te, kutu nazali nde kolikya kofanda mwa moke elongo na bino,+ soki Yehova* apesi nzela. 8 Kasi nafandi na Efese+ tii na ntango ya fɛti ya Pantekote, 9 mpo libaku monene epesameli ngai ya kokokisa mosala na ngai,*+ kasi batɛmɛli bazali mingi.
10 Soki Timote+ ayei, bóyamba ye malamu mpe bósala elongo na ye mpo azala na eloko ya komitungisa te ntango azali elongo na bino, azali kosala mosala ya Yehova,*+ ndenge ngai mpe nazali kosala. 11 Na yango, moto moko te atyola ye. Bókende kotika ye na nzela na kimya, mpo akóma awa epai na ngai, mpo nazali kozela ye elongo na bandeko.
12 Sikoyo, mpo na ndeko na biso Apolosi,+ nabondelaki ye mingi ete aya epai na bino elongo na bandeko, azalaki kokanisa te koya sikoyo, kasi akoya soki azwi libaku ya malamu.
13 Bólala mpɔngi te,+ bótɛlɛma ngwi na kondima,+ bózala na mpiko,*+ mpe bózala makasi.+ 14 Bósala makambo nyonso na bolingo.+
15 Bandeko, boyebi ete bato ya ndako ya Stefanasi bazali bayekoli ya liboso* na Akaya mpe ete bamipesi na kosalela basantu. 16 Nazali kolendisa bino bókoba komikitisa liboso ya bato ya ndenge wana mpe epai ya baoyo nyonso bazali kosala mosala makasi mpe kosala elongo na bango.+ 17 Nazali na esengo ete Stefanasi,+ Fortunatusi, mpe Akaikusi bazali awa elongo na ngai. Bazali kosala na esika na bino mpo bozali awa te. 18 Balendisi biso makasi ngai ná bino. Na yango bómonisa botɔndi na bato ya ndenge wana.
19 Masangá ya Azia etindeli bino mbote. Akila ná Priska elongo na lisangá oyo ezali na ndako na bango+ bapesi bino mbote na motema mobimba na kati ya Nkolo. 20 Bandeko nyonso bapesi bino mbote. Bópesana mbote na bolingo mpenza.*
21 Ngai Paulo, natindeli bino mbote oyo nakomi na mabɔkɔ na ngai moko.
22 Soki moto alingaka Nkolo te, alakelama mabe. Ee Nkolo na biso, yaká! 23 Boboto monene ya Nkolo Yesu ezala na bino. 24 Bolingo na ngai ezala na bino nyonso na bomoko elongo na Kristo Yesu.