Mokanda ya liboso ya Ntango

22 Bongo Davidi alobaki boye: “Awa nde ndako ya Yehova Nzambe ya solo ekozala, mpe oyo nde etumbelo, esika Yisraele ekopesa makabo ya kotumba.”+

2 Na nsima Davidi apesaki mitindo ete báyanganisa bapaya+ oyo bazalaki kofanda na mokili ya Yisraele, mpe atyaki bango bakati-mabanga, mpo bákataka mpe bábongisaka mabanga ya kotonga na yango ndako ya Nzambe ya solo.+ 3 Davidi abongisaki mpe ebele ya bibende mpo na kosala bansɛtɛ ya bizipeli ya baporte mpe mpo na kosala bikangeli. Abongisaki mpe kwivre ebele oyo bakokaki komeka kilo na yango te,+ 4 mpe mabaya ya banzete ya sɛdrɛ+ oyo motángo na yango eyebani te, mpo Basidone+ ná bato ya Tire+ bamemelaki Davidi mabaya ya banzete ya sɛdrɛ ebele mpenza. 5 Mpe Davidi alobaki: “Mwana na ngai Salomo azali elenge mpe ayebi naino makambo mingi te,*+ mpe ndako oyo bakotongela Yehova esengeli kozala na nkembo mingi,+ mpo lokumu mpe kitoko na yango+ ekende nsango na mikili nyonso.+ Yango wana nakobongisela ye makambo nyonso.” Na yango, liboso akufa, Davidi abongisaki biloko mingi mpo na mosala.

6 Lisusu, abengisaki mwana na ye Salomo mpe apesaki ye mitindo atonga ndako mpo na Yehova Nzambe ya Yisraele. 7 Davidi alobaki na mwana na ye Salomo boye: “Ngai moko nazalaki na mposa ya kotonga ndako mpo na kokumisa nkombo ya Yehova Nzambe na ngai.+ 8 Kasi Yehova alobaki na ngai: ‘Yo osopá makila mingi, mpe obundá bitumba minene. Okotonga ndako mpo na nkombo na ngai te,+ mpo osopá makila mingi na mabele na miso na ngai. 9 Talá! Okobota mwana mobali+ oyo akozala moto ya kimya,* mpe nakopesa ye bopemi mpe banguna na ye nyonso ya zingazinga bakotungisa ye te.+ Yango wana nkombo na ye ekozala Salomo*+ mpe nakopesa Yisraele kimya mpe bopemi na boyangeli na ye.+ 10 Ye moto akotonga ndako mpo na nkombo na ngai.+ Akozala mwana na ngai, mpe ngai nakozala tata na ye.+ Nakopika makasi kiti ya bokonzi na ye na Yisraele mpo na libela.’+

11 “Sikoyo mwana na ngai, tiká Yehova azala na yo, mpe tiká olonga na mosala ya kotonga ndako ya Yehova Nzambe na yo, kaka ndenge alobaki yango mpo na yo.+ 12 Ntango Yehova akopesa yo bokonzi ya Yisraele, tiká ete apesa yo bokɛngi mpe mayele+ mpo otosa mobeko ya Yehova Nzambe na yo.+ 13 Bongo okolonga soki olandi malamu malako+ mpe bikateli oyo Yehova atindaki Moize apesa Yisraele.+ Zalá na mpiko mpe na makasi. Kobanga te mpe kozala na nsɔmɔ te.+ 14 Namoni mpasi mingi mpo na kobongisa mpo na ndako ya Yehova talanta* 100 000 ya wolo mpe talanta 1 000 000 ya palata, ná ebele ya kwivre mpe ebende+ oyo bakoki komeka kilo na yango te. Nabongisi mpe mabaya ná mabanga,+ kasi okobakisa mosusu. 15 Bato ebele oyo bakosala misala bazali elongo na yo: bakati-mabanga, bamasɔ, basali-mabaya,+ mpe bato oyo bayebi misala ya ndenge nyonso.+ 16 Wolo, palata, kwivre, ná ebende ezali ebele mpe motángo na yango eyebani te.+ Sikoyo bandá mosala, mpe tiká Yehova azala na yo.”+

17 Na nsima Davidi apesaki bankumu nyonso ya Yisraele mitindo ete básalisa mwana na ye Salomo; alobaki: 18 “Yehova Nzambe na bino azali nde na bino te, mpe apesi bino bopemi bipai nyonso te? Mpo apesaki bafandi ya mokili oyo na lobɔkɔ na ngai, mpe mokili yango ekómi na nse ya bokonzi ya Yehova mpe ya bato na ye. 19 Sikoyo, bózala na ekateli ya koluka Yehova Nzambe na bino na motema na bino mobimba mpe na molimo* na bino mobimba,+ mpe bóbanda kotonga esika mosantu ya Yehova Nzambe ya solo,+ mpo bámema sanduku ya kondimana ya Yehova mpe bisaleli mosantu ya Nzambe ya solo+ na ndako oyo ekotongama mpo na nkombo ya Yehova.”+