Mokanda ya mibale ya Ntango
1 Salomo mwana ya Davidi akómisaki bokonzi na ye makasi mingi, mpe Yehova Nzambe na ye azalaki na ye mpe akómisaki ye moto monene mingi mpenza.+
2 Salomo abengisaki Yisraele mobimba: bakonzi ya bato nkóto, bakonzi ya bato nkama, basambisi mpe bankumu nyonso ya Yisraele mobimba, bankumu ya mabota ya batata. 3 Na nsima, Salomo ná lisangá mobimba bakendaki na esika oyo etombwaná na Gibeone,+ mpo hema ya kokutana ya Nzambe ya solo, oyo Moize mosaleli ya Yehova asalaki na esobe, ezalaki kuna. 4 Nzokande Davidi alongolaki Sanduku ya Nzambe ya solo na Kiriate-yearime+ mpe amemaki yango na esika oyo abongiselaki yango; atɛlɛmiselaki yango hema na Yerusaleme.+ 5 Mpe etumbelo ya kwivre+ oyo Bezalele+ mwana ya Uri mwana ya Hure asalaki, etyamaki liboso ya tabernakle ya Yehova; mpe Salomo ná lisangá mobimba bazalaki kobondela liboso ya etumbelo yango.* 6 Bongo Salomo apesaki makabo kuna, liboso ya Yehova. Apesaki makabo ya kotumba 1 000 likoló ya etumbelo ya kwivre+ ya hema ya kokutana.
7 Na butu yango, Nzambe abimelaki Salomo, mpe alobaki na ye boye: “Sɛngá eloko oyo olingi napesa yo?”+ 8 Na yango Salomo alobaki na Nzambe boye: “Omoniseli tata na ngai Davidi+ bolingo ya sembo monene, mpe okómisi ngai mokonzi na esika na ye.+ 9 Sikoyo, Ee Yehova Nzambe, tiká ete elaka oyo opesaki tata na ngai Davidi ekokisama,+ mpo okómisi ngai mokonzi ya bato oyo bazali ebele lokola bambuma ya zɛlo ya mabele.+ 10 Yango wana, pesá ngai bwanya mpe boyebi+ mpo na kokamba* bato oyo, mpo nani akokoka kosambisa ebele ya bato na yo oyo?”+
11 Bongo Nzambe alobaki na Salomo boye: “Lokola mposa ya motema na yo ezali bongo, mpe lokola osɛngi bozwi te, to bomɛngo, to lokumu, to liwa* ya baoyo bayinaka yo, mpe osɛngi bomoi ya molai* te, kasi osɛngi nde bwanya ná boyebi mpo na kosambisa bato na ngai oyo natye yo ozala mokonzi na bango,+ 12 nakopesa yo bwanya mpe boyebi; kasi nakopesa yo mpe bozwi, bomɛngo, ná lokumu oyo mokonzi moko te liboso na yo azalaki na yango, mpe mokonzi moko te nsima na yo akozala na yango.”+
13 Bongo Salomo alongwaki na esika oyo etombwaná na Gibeone,+ epai hema ya kokutana ezalaki, azongaki na Yerusaleme mpe ayangelaki Yisraele. 14 Salomo azalaki se kobakisa makalo mpe bampunda;* akómaki na makalo 1 400 ná bampunda* 12 000.+ Atyaki mosusu na bingumba ya kobomba makalo+ mpe atikaki mosusu pene na ye, na Yerusaleme.+ 15 Mokonzi asalaki ete na Yerusaleme palata ná wolo ekóma mingi lokola mabanga,+ mpe mabaya ya sɛdrɛ ekóma mingi lokola banzete ya sikomore ya Shefela.+ 16 Bampunda ya Salomo ezalaki kouta na Ezipito,+ mpe bato ya mombongo ya mokonzi bazalaki kosomba bitonga ya bampunda* na ntalo oyo eyebani.+ 17 Likalo mokomoko oyo euti na Ezipito ezalaki na ntalo ya shekele ya palata 600, mpe mpunda moko na ntalo ya shekele ya palata 150. Na nsima, bazalaki kotɛkɛla yango bakonzi nyonso ya Bahiti mpe bakonzi ya Siri.