Mokanda ya mibale ya Samwele
1 Davidi autaki koboma Baamaleke mpe afandaki na Ziklage+ mikolo mibale. Na ntango yango, Saulo asilaki kokufa. 2 Na mokolo ya misato, mobali moko autaki na kaa ya Saulo, ná bilamba epasukapasuká mpe mabele na motó na ye. Ntango akómaki pene na Davidi, akweaki na mabele mpe afukamaki elongi na nse.
3 Davidi atunaki ye: “Outi wapi?” Ayanolaki: “Nauti na kaa ya Yisraele, nakimi.” 4 Davidi atunaki ye: “Makambo eleki ndenge nini kuna? Yebisá ngai, nabondeli yo.” Bongo ye alobaki: “Bato ebele mpenza bakufi na etumba, mpe basusu bakimi. Ata mpe Saulo ná mwana na ye Yonatane bakufi.”+ 5 Bongo Davidi atunaki elenge mobali yango oyo amemelaki ye nsango ete: “Ndenge nini oyebi ete Saulo ná mwana na ye Yonatane bakufi?” 6 Elenge mobali yango ayanolaki: “Kozanga kokana, nazalaki na Ngomba Gilboa,+ mpe kuna namonaki Saulo ayekameli likɔnga na ye, mpe makalo ná batambwisi-mpunda bazalaki se kopusana penepene na ye.+ 7 Ntango abalukaki mpe amonaki ngai, abengaki ngai mpe nalobaki ete: ‘Ngai oyo!’ 8 Atunaki ngai: ‘Yo nani?’ Nayanolaki: ‘Nazali Moamaleke.’+ 9 Na nsima, alobaki boye: ‘Nabondeli yo, pusaná pene na ngai mpe bomá ngai. Nazali naino na bomoi, kasi nazali na mpasi makasi.’ 10 Bongo napusanaki pene na ye mpe nabomaki ye,+ mpo nayebaki ete lokola azokaki makasi mpe akweaki, akobika te. Na nsima, nazwaki ekɔti ya bokonzi* oyo ezalaki na motó na ye mpe eloko* oyo alataki na lobɔkɔ na ye, mpe namemi yango awa epai ya nkolo na ngai.”
11 Bongo, Davidi apasolaki bilamba na ye. Bato nyonso oyo bazalaki elongo na ye basalaki mpe bongo. 12 Bagangaki, balelaki mpe bakilaki bilei+ tii na mpokwa mpo na Saulo ná mwana na ye Yonatane, mpo na bato ya Yehova, mpe mpo na ndako ya Yisraele,+ mpamba te babomamaki na mopanga.
13 Davidi atunaki elenge mobali oyo amemelaki ye nsango ete: “Ozali moto ya wapi?” Ayanolaki boye: “Nazali mwana ya Moamaleke moko oyo afandi mopaya.” 14 Bongo Davidi alobaki na ye: “Mpo na nini obangaki te koboma moto oyo Yehova atye mafuta?”+ 15 Na yango, Davidi abengaki moko ya bilenge mibali mpe alobaki ete: “Pusaná awa mpe bomá ye.” Bongo abomaki ye na mopanga.+ 16 Davidi alobaki: “Makila na yo ezali na motó na yo moko, mpo yo moko omifundi na ndenge olobi: ‘Ngai nde nabomaki moto oyo Yehova atye mafuta.’”+
17 Na nsima, Davidi ayembelaki Saulo ná mwana na ye Yonatane+ loyembo ya mawa 18 mpe alobaki ete esengeli kolakisa bato ya Yuda loyembo yango oyo ebengami “Litimbo,” mpe ekomami na buku ya Yashare:+
Mibali ya nguya bakwei!
20 Bólobela yango na Gate+ te;
Bósakola yango na babalabala ya Ashekelone te,
Noki bana basi ya Bafilistia básepela,
Noki bana basi ya bato oyo bazali bisutu bázala na esengo mingi.
Tiká mamwɛ to mbula ekwea likoló na bino te,
Tiká bilanga na bino ebota te biloko mpo na makabo mosantu,+
Mpo kuna nde nguba ya mibali ya nguya ekómaki mbindo,
Nguba ya Saulo ekotyama lisusu mafuta te.
22 Liboso ya makila ya bato oyo babomami, liboso ya mafuta ya bilombe,
Litimbo ya Yonatane ezongaki nsima te,+
Mpe mopanga ya Saulo ezongaki te kozanga elonga.+
23 Saulo ná Yonatane,+ oyo bato bazalaki kolinga mpe kosepela na bango mingi,
Bakabwani te ata na liwa.+
24 Ee, bino bana basi ya Yisraele, bólela Saulo,
Ye oyo alatisaki bino bilamba ya motane makasi oyo etondi na biloko ya motuya,
Ye oyo atyaki babiju ya wolo likoló ya bilamba na bino.
25 Talá ndenge bilombe bakwei na etumba!
Ebembe ya Yonatane elali na bisika na bino oyo etombwaná!+
Bolingo oyo ozalaki na yango mpo na ngai ezalaki makasi koleka bolingo oyo basi bamoniselaka ngai.+
27 Talá ndenge bilombe bakwei
Talá ndenge bibundeli ya etumba ebebi!”