Basambisi
10 Nsima ya Abimeleke, Tola mwana ya Pua, mwana ya Dodo, mobali moko ya libota ya Isakare, atɛlɛmaki mpo na kobikisa Yisraele.+ Azalaki kofanda na Shamire, na etúká ya ngombangomba ya Efraime. 2 Asambisaki Yisraele mbula 23. Na nsima, akufaki mpe bakundaki ye na Shamire.
3 Nsima na ye, Yaire moto ya Gileade atɛlɛmaki mpe asambisaki Yisraele mbula 22. 4 Azalaki na bana mibali 30 oyo bazalaki kotambola na bampunda 30, mpe bazalaki na bingumba 30. Babengaka bingumba yango Havote-yaire+ tii na mokolo ya lelo; ezali na mokili ya Gileade. 5 Nsima na yango, Yaire akufaki mpe bakundaki ye na Kamone.
6 Bayisraele basalaki lisusu makambo oyo ezali mabe na miso ya Yehova,+ mpe bakómaki kosalela Babaala+ mpe bikeko ya Ashitorete, banzambe ya Arame,* banzambe ya Sidone, banzambe ya Moabe,+ banzambe ya Baamone,+ mpe banzambe ya Bafilistia.+ Bapesaki Yehova mokɔngɔ mpe batikaki kosalela ye. 7 Na yango nkanda ya Yehova engalelaki Yisraele, mpe akabaki bango na mabɔkɔ ya Bafilistia mpe ya Baamone.+ 8 Bongo bamonisaki Bayisraele bwale mpe banyokolaki bango makasi mpenza kobanda mbula wana. Mpe na boumeli ya mbula 18, banyokolaki Bayisraele nyonso oyo bazalaki na Gileade, na ngámbo ya Yordani oyo ezalaki liboso mokili ya Baamore. 9 Lisusu, Baamone bazalaki kokatisa Yordani mpo na kobundisa Yuda, Benyamina mpe ndako ya Efraime; mpe Yisraele emonaki bwale mpenza. 10 Bongo Bayisraele babelelaki Yehova mpo na kosɛnga lisalisi,+ balobi: “Tosaleli yo lisumu, mpo totikaki Nzambe na biso mpe tosalelaki Babaala.”+
11 Kasi Yehova alobaki na Bayisraele boye: “Ntango Baezipito,+ Baamore,+ Baamone, Bafilistia,+ 12 Basidone, Baamaleke, mpe Bamidiane, bazalaki konyokola bino, ngai nde nabikisaki bino, boye te? Ntango bobelelaki ngai, nabikisaki bino na lobɔkɔ na bango. 13 Kasi, bosundolaki ngai mpe bosalelaki banzambe mosusu.+ Yango wana, nakobikisa bino lisusu te.+ 14 Bókende epai ya banzambe oyo boponi mpe bóbelela bango mpo na kosɛnga lisalisi.+ Bábikisa bino na ntango oyo bozali na mpasi.”+ 15 Kasi Bayisraele balobaki na Yehova boye: “Tosali lisumu. Salá biso nyonso oyo ezali malamu na miso na yo. Kasi tobondeli yo, bikisá biso lelo.” 16 Na nsima balongolaki banzambe ya bapaya na kati na bango mpe basalelaki Yehova,+ bongo akokaki lisusu te kokanga motema mpo na mpasi ya Yisraele.*+
17 Na nsima, Baamone+ bayanganaki mpo na etumba mpe batyaki kaa na Gileade. Bongo Bayisraele bayanganaki mpe batyaki kaa na Mizipa. 18 Bato mpe bankumu ya Gileade balobanaki bango na bango ete: “Nani akokamba biso na etumba mpo na kobunda na Baamone?+ Tiká akóma mokonzi ya bato nyonso oyo bafandi na Gileade.”