Yobo

 2 “Yango wana makanisi na ngai oyo etungisami ezali kotinda ngai nayanola

Mpo nabulungani mpenza.

 3 Nayoki mpamela moko oyo efingi ngai;

Mpe bososoli* na ngai etindi ngai nayanola.

 4 Banda kala oyebi likambo oyo malamu,

Mpo ezalaka bongo banda moto* atyamá na mabele,+

 5 Ete koganga ya esengo ya moto mabe eumelaka te

Mpe kosepela ya moto oyo ayebi Nzambe te* ezalaka ya ntango mokuse.+

 6 Ata soki nkembo na ye emati mpenza tii na likoló

Mpe motó na ye ekómi na mapata,

 7 Akolimwa mpo na libela lokola nyɛi na ye;

Bato oyo bamonaki ye bakoloba: ‘Wapi ye?’

 8 Bakobosana ye noki lokola ndɔtɔ, mpe moto moko te akomona ye lisusu;

Bakobengana ye lokola emonaneli ya butu.

 9 Liso oyo emonaki ye liboso ekomona ye lisusu te,

Mpe esika na ye ekomona ye lisusu te.+

10 Bana na ye moko bakoluka babola bámonisela bango boboto,

Mpe mabɔkɔ na ye moko ekozongisa bozwi oyo azwaki.+

11 Mikuwa na ye etondaki mɛkɛ na nguya ya bolenge,

Kasi ekolala* esika moko na ye na putulu.

12 Soki makambo ya mabe ezali elɛngi na monɔkɔ na ye,

Soki azali kobomba yango na nse ya lolemo na ye,

13 Soki ayoki yango elɛngi mpe atiki yango te

Mpe akobi kokanga yango na monɔkɔ na ye,

14 Bilei na ye ekobeba na kati na ye;

Ekokóma pwazɔ* ya kobra na kati na ye.

15 Amɛli bomɛngo, kasi akosanza yango;

Nzambe akobimisa yango nyonso na libumu na ye.

16 Akofiba ngɛngɛ ya kobra;

Mino* ya nyoka ya ngɛngɛ* ekoboma ye.

17 Akomona ata mokolo moko te mikɛli ya mai,

Bibale ya mafuta ya nzoi ná manteka.

18 Akozongisa biloko na ye kozanga ete asalela yango;*

Akosepela te na bozwi oyo euti na mombongo na ye.+

19 Mpo abukibuki mpe asundoli bato oyo bazangá;

Abɔtɔli ndako oyo atongaki te.

20 Kasi akoyoka kimya ata moke te na kati na ye;

Bozwi na ye ekobikisa ye te.

21 Ezali na eloko moko te oyo etikali mpo alya;

Yango wana bomɛngo na ye ekoumela te.

22 Ntango bozwi na ye ekómi mpenza beboo, akokóma na mitungisi mingi;

Nguya nyonso ya mpasi ekoyela ye.

23 Ntango akotondisa libumu na ye,

Nzambe* akotindela ye nkanda na ye ya makasi,

Akonɔkisela ye yango na kati ya misɔpɔ na ye.

24 Ntango akokima bibundeli ya bibende,

Makula ya kwivre ekotɔbɔla ye.

25 Abimisi likula oyo ekɔtaki na mokɔngɔ na ye,

Mpe ebundeli oyo ezali kongɛnga oyo etɔbɔlaki libale* na ye,

Nsɔmɔ ekangi ye.+

26 Molili makasi ezali kozela biloko na ye ya motuya;

Mɔtɔ oyo moto moko te apupoli ekozikisa ye;

Mpasi ezali kozela moto nyonso oyo atikali na bomoi na hema na ye.

27 Likoló ekobimisa libunga na ye polele;

Mabele ekotɛmɛla ye.

28 Mpela ekomema ndako na ye;

Mbula monene ekozala na mokolo ya nkanda ya Nzambe.*

29 Wana nde eloko oyo Nzambe abombelá moto mabe,

Libula oyo Nzambe akatá mpo na ye.”