118 Bópesa Yehova matɔndi, mpo azali malamu;+
Bolingo na ye ya sembo ezali seko na seko.
2 Yisraele aloba sikoyo:
“Bolingo na ye ya sembo ezali seko na seko.”
3 Bato ya ndako ya Arona báloba sikoyo:
“Bolingo na ye ya sembo ezali seko na seko.”
4 Baoyo bazali kobanga Yehova báloba sikoyo:
“Bolingo na ye ya sembo ezali seko na seko.”
5 Ntango nazalaki na mpasi nabelelaki Yah;
Yah ayanolaki ngai mpe amemaki ngai na esika moko ya libateli.+
6 Yehova azali pene na ngai; nakobanga te.+
Moto akoki kosala ngai nini?+
7 Yehova azali pene na ngai, azali mosungi na ngai;+
Nakomona kokwea ya baoyo bazali koyina ngai.+
8 Kokima epai ya Yehova ezali malamu
Koleka kotyela bato motema.+
9 Kokima epai ya Yehova ezali malamu
Koleka kotyela bankumu motema.+
10 Bikólo nyonso bazingaki ngai,
Kasi na nkombo ya Yehova,
Nabenganaki bango.+
11 Bazingaki ngai, ɛɛ, bazingaki ngai mpenza.
Kasi na nkombo ya Yehova,
Nabenganaki bango.
12 Bazingaki ngai lokola nzoi,
Bakufaki nokinoki lokola mɔtɔ ya banzete ya nzubɛ.
Na nkombo ya Yehova,
Nabenganaki bango.+
13 Batindikaki ngai makasi mpo nakwea,
Kasi Yehova asalisaki ngai.
14 Yah azali esika na ngai ya komibatela mpe makasi na ngai,
Mpe akómi lobiko na ngai.+
15 Mongongo ya esengo mpe lobiko
Ezali na bahema ya bato ya sembo.
Lobɔkɔ ya mobali ya Yehova ezali komonisa nguya na yango.+
16 Lobɔkɔ ya mobali ya Yehova etombwani;
Lobɔkɔ ya mobali ya Yehova ezali komonisa nguya na yango.+
17 Nakokufa te, te, nakotikala na bomoi,
Mpo nasakola misala ya Yah.+
18 Yah asembolaki ngai makasi,+
Kasi akabaki ngai na liwa te.+
19 Bófungolela ngai baporte ya bosembo;+
Nakokɔta kuna mpe nakosanzola Yah.
20 Porte ya Yehova yango oyo.
Bato ya sembo bakokɔta kuna.+
21 Nakosanzola yo, mpo oyanolaki ngai+
Mpe okómaki lobiko na ngai.
22 Libanga oyo batongi-ndako babwakaki
Ekómi libanga monene ya ntina mingi ya ndako.+
23 Yango euti epai ya Yehova;+
Ezali likambo ya kokamwa na miso na biso.+
24 Oyo nde mokolo oyo Yehova asali;
Tokozala na esengo mingi mpe tokosepela na yango.
25 Yehova, bikisá biso, tobondeli yo!
Yehova, salá ete tólonga, tobondeli yo!
26 Ye oyo azali koya na nkombo ya Yehova apambwama;+
Topamboli bino uta na ndako ya Yehova.
27 Yehova azali Nzambe;
Apesaka biso pole.+
Ná bitape na mabɔkɔ, bólanda molɔngɔ ya bato oyo bazali kokende na fɛti,+
Tii na maseke ya etumbelo.+
28 Yo ozali Nzambe na ngai, mpe nakosanzola yo;
Nzambe na ngai, nakotombola yo.+
29 Bópesa Yehova matɔndi,+ mpo azali malamu;
Bolingo na ye ya sembo ezali seko na seko.+