Basambisi

17 Ezalaki na mobali moko ya etúká ya ngombangomba ya Efraime,+ nkombo na ye Mika. 2 Mokolo moko alobaki na mama na ye boye: “Shekele ya palata 1 100 oyo bayibaki yo mpe oyo nayokaki ozali kolakela moto mabe mpo na yango, talá! palata yango ezali epai na ngai. Ngai nde nazwaki yango.” Bongo mama na ye alobaki: “Tiká Yehova apambola yo mwana na ngai.” 3 Bongo azongiselaki mama na ye shekele yango ya palata 1 100, kasi mama na ye alobaki: “Nakosantisela mpenza Yehova palata na ngai. Nalingi osalela yango mpo na kosala ekeko oyo eyemami mpe ekeko ya ebende.*+ Na yango nazongiseli yo palata yango.”

4 Nsima ya kozongisela mama na ye palata yango, mama na ye azwaki shekele ya palata 200 mpe apesaki yango moto oyo asalaka biloko ya palata. Moto yango asalaki ekeko oyo eyemami mpe ekeko ya ebende;* mpe batyaki bikeko yango na ndako ya Mika. 5 Mika azalaki na ndako moko ya banzambe ya bikeko; asalaki efode+ ná bikeko ya banzambe ya libota,*+ mpe atyaki* mwana na ye moko ya mobali azala nganga-nzambe na ye.+ 6 Na mikolo wana, ezalaki na mokonzi te na Yisraele.+ Moto na moto azalaki kosala oyo ezali malamu na miso na ye moko.*+

7 Nzokande ezalaki na elenge mobali moko ya Beteleme+ na Yuda, oyo azalaki na libota ya Yuda.* Azalaki Molevi+ mpe afandaki kuna eleki mwa ntango. 8 Mobali yango alongwaki na engumba ya Beteleme na Yuda mpo na koluka esika ya kofanda. Wana azalaki kosala mobembo, akómaki na etúká ya ngombangomba ya Efraime, na ndako ya Mika.+ 9 Bongo Mika atunaki ye: “Outi wapi?” Mobali yango azongisaki: “Nazali Molevi, nauti na Beteleme ya Yuda, mpe nazali koluka esika ya kofanda.” 10 Na yango Mika alobaki na ye ete: “Fandá epai na ngai mpe kómá tata* mpe nganga-nzambe na ngai. Na mbula moko, nakopesa yo shekele ya palata zomi, mpe bilamba ná bilei oyo ekoki na yo.” Bongo Molevi yango akɔtaki na ndako. 11 Na yango, Molevi yango andimaki kofanda epai ya Mika, mpe elenge mobali yango akómaki lokola moko ya bana na ye. 12 Lisusu, Mika atyaki Molevi yango nganga-nzambe na ye,*+ mpe Molevi yango afandaki na ndako ya Mika. 13 Bongo Mika alobaki: “Sikoyo nayebi ete Yehova akosalela ngai bolamu, mpo Molevi akómi nganga-nzambe na ngai.”