Mokanda ya mibale ya Ntango

21 Na nsima, Yehoshafate akufaki* mpe bakundaki ye esika moko na bankɔkɔ na ye na Sité ya Davidi; mpe mwana na ye Yehorame akómaki mokonzi na esika na ye.+ 2 Bandeko na ye ya mibali, bana ya Yehoshafate ezalaki Azaria, Yehiele, Zekaria, Azaria, Mikaele ná Shefatia. Bango nyonso bazalaki bana ya Yehoshafate mokonzi ya Yisraele. 3 Mpe tata na bango asilaki kopesa bango makabo mingi ya palata mpe ya wolo, ná biloko ya motuya, mpe bingumba oyo ebatelami makasi na Yuda;+ kasi bokonzi apesaki yango na mabɔkɔ ya Yehorame,+ mpo azalaki mwana ya liboso.

4 Ntango Yehorame akómaki koyangela na bokonzi ya tata na ye, mpo na kofandisa bokonzi na ye, abomaki bandeko na ye+ nyonso na mopanga, ezala mpe bankumu mosusu ya Yisraele. 5 Yehorame azalaki na mbula 32 ntango akómaki mokonzi, mpe ayangelaki mbula mwambe na Yerusaleme.+ 6 Alandaki ndakisa mabe* ya bakonzi ya Yisraele,+ kaka ndenge bato ya libota ya Ahaba basalaki, mpo mwana ya Ahaba akómaki mwasi na ye.+ Mpe akobaki kosala makambo oyo ezali mabe na miso ya Yehova. 7 Kasi Yehova alingaki te kobebisa molɔngɔ ya bakonzi ya libota* ya Davidi, mpo na kotosa kondimana oyo asalaki ná Davidi.+ Mpo alakaki ete akopesa ye ná bana na ye mwinda* ntango nyonso.+

8 Na mikolo ya Yehorame, Edome etombokelaki Yuda+ mpe etyaki mokonzi na yango moko.+ 9 Bongo Yehorame ná bakomanda na ye bakatisaki elongo na makalo na ye nyonso. Kuna, bato ya Edome bazingaki ye ná bakomanda ya makalo na ye. Kasi atɛlɛmaki na butu mpe alongaki bango na etumba. 10 Kasi Edome ekobaki kotombokela boyangeli ya Yuda tii na mokolo ya lelo. Na ntango yango, Libina+ mpe etombokelaki Yehorame, mpo asundolaki Yehova Nzambe ya bankɔkɔ na ye.+ 11 Asalaki mpe bisika oyo etombwaná+ na bangomba ya Yuda mpo na kotinda bato oyo bafandaka na Yerusaleme básala bondumba ya elimo, mpe abungisaki Yuda nzela.

12 Nsukansuka, Yehorame azwaki mokanda oyo eutaki epai ya mosakoli Eliya,+ oyo elobi: “Talá oyo Yehova Nzambe ya nkɔkɔ na yo Davidi alobi: ‘Olandi te ndakisa ya tata na yo Yehoshafate+ mpe ndakisa ya Asa+ mokonzi ya Yuda. 13 Olandi nde ndakisa mabe ya bakonzi ya Yisraele+ mpe otindi Yuda mpe bato oyo bafandi na Yerusaleme básala bondumba ya elimo+ lokola bondumba ya libota ya Ahaba.+ Obomi kutu bandeko na yo moko,+ bato ya ndako ya tata na yo, oyo bazalaki malamu koleka yo. 14 Yango wana Yehova azali koyeisa etumbu monene epai ya bato na yo, bana na yo, basi na yo ná biloko na yo nyonso. 15 Mpe yo moko okobɛla bamaladi ndenge na ndenge, ezala mpe maladi ya misɔpɔ, tii misɔpɔ na yo ekobima libándá mpo na maladi yango, mokolo na mokolo.’”

16 Na nsima Yehova asalaki+ ete Bafilistia*+ mpe Baarabe+ oyo bazalaki kofanda pene na bato ya Etiopi bábundisa Yehorame. 17 Bongo bayaki na Yuda, bakɔtaki na makasi mpe bamemaki biloko nyonso oyo bakutaki na ndako ya mokonzi,+ ná bana na ye ya mibali mpe basi na ye. Mwana mobali kaka moko oyo atikalaki ezalaki Yehoahaze,*+ mwana na ye ya nsuka. 18 Nsima ya nyonso wana, Yehova apesaki ye maladi ya misɔpɔ oyo ekokaki kosila te.+ 19 Mwa ntango na nsima, ntango mbula mibale mobimba eleki, misɔpɔ na ye ebimaki libándá mpo na maladi na ye, mpe akufaki na mpasi makasi ya maladi na ye. Bato ya ekólo basalelaki ye mɔtɔ te lokola mɔtɔ oyo basalelaki bankɔkɔ na ye.+ 20 Azalaki na mbula 32 ntango akómaki mokonzi, mpe ayangelaki mbula 8 na Yerusaleme. Moto moko te ayokaki mawa ntango akufaki. Bongo bakundaki ye na Sité ya Davidi,+ kasi na malita ya bakonzi te.+