Mokanda ya liboso ya Ntango

11 Na nsima, Bayisraele nyonso bayanganaki epai ya Davidi na Hebrone,+ mpe balobaki: “Talá! Biso ná yo tozali makila moko.*+ 2 Banda ntango Saulo azalaki mokonzi, yo moto ozalaki kokamba Yisraele na bitumba.*+ Mpe Yehova Nzambe na yo alobaki na yo ete: ‘Yo nde okobatela bato na ngai Yisraele, mpe okokóma mokambi ya bato na ngai Yisraele.’”+ 3 Bongo bankulutu nyonso ya Yisraele bayaki epai ya mokonzi, na Hebrone, mpe Davidi asalaki ná bango kondimana na Hebrone, liboso ya Yehova. Na nsima, batyaki Davidi mafuta mpo azala mokonzi ya Yisraele,+ ndenge Yehova alobaki yango na nzela ya Samwele.+

4 Na nsima, Davidi ná Yisraele mobimba bakendaki na Yerusaleme, elingi koloba Yebusi,+ mokili oyo Bayebusi+ bazalaki kofanda. 5 Bongo bato oyo bazalaki kofanda na Yebusi balobaki na Davidi: “Okokɔta awa soki moke te.”+ Atako bongo, Davidi abɔtɔlaki esika makasi ya libateli ya Siona,+ oyo ekómá kobengama Sité ya Davidi.+ 6 Bongo Davidi alobaki boye: “Moto ya liboso oyo akobundisa Bayebusi, akokóma mokonzi* mpe nkumu.” Mpe Yoabe+ mwana ya Zeruya azalaki moto ya liboso ya kobundisa bango, mpe akómaki mokonzi ya basoda. 7 Bongo Davidi akómaki kofanda na esika yango ya makasi ya libateli. Yango wana babengaki yango Sité ya Davidi. 8 Abandaki kotonga engumba zingazinga, banda na Mwa Ngomba* kino na bisika oyo ezalaki zingazinga na yango, mpe Yoabe abongisaki biteni mosusu ya engumba oyo etikalaki. 9 Bongo, Davidi azalaki se kokóma makasi,+ mpe Yehova ya mampinga azalaki elongo na ye.

10 Oyo ezali bakonzi ya bilombe ya etumba ya Davidi, oyo bapesaki ye mpenza mabɔkɔ na bokonzi na ye, elongo na Yisraele mobimba, mpo na kokómisa ye mokonzi, ndenge Yehova alobaki mpo na Yisraele.+ 11 Talá molɔngɔ ya bilombe ya etumba ya Davidi: Yashobeame+ mwana ya Moakamoni moko. Azalaki mokonzi ya bato misato.+ Mokolo moko abomaki bato 300 na likɔnga na ye.+ 12 Nsima na ye, ezalaki Eleazare+ mwana ya Dodo, Moahohi.+ Azalaki kati na bilombe yango misato ya etumba. 13 Ye nde azalaki elongo na Davidi na Pase-damime,+ esika Bafilistia bayanganaki mpo na kobundisa Bayisraele. Nzokande, ezalaki na elanga moko oyo etondi na ɔrje, mpe mibali ya Yisraele bakimaki Bafilistia. 14 Nzokande ye atɛlɛmaki na katikati ya elanga yango, abatelaki yango mpe akobaki koboma Bafilistia, bongo Yehova apesaki bato na ye elonga*+ moko monene.

15 Bankumu misato kati na bankumu 30 bakitaki epai ya Davidi na libanga, na mobenga ya Adulame,+ wana limpinga moko ya basoda ya Bafilistia etyaki kaa na yango na Lobwaku* ya Barefaime.+ 16 Davidi azalaki na esika makasi ya libateli, mpe etuluku moko ya basoda ya Bafilistia ezalaki na Beteleme. 17 Davidi amonisaki mposa na ye mpe alobaki: “Soki nakoki komɛla ata mai ya libulu ya kobomba mai oyo ezali pene na porte ya Beteleme!”+ 18 Na yango, bango misato bakɔtaki na makasi na kaa ya Bafilistia mpe batokaki mai na libulu ya kobomba mai oyo ezali na porte ya Beteleme mpe bamemelaki yango Davidi. Kasi Davidi aboyaki komɛla mai yango mpe asopaki yango na mabele liboso ya Yehova. 19 Alobaki: “Nakoki soki moke te kokanisa kosala likambo ya boye, mpo nabangaka Nzambe! Nasengeli nde komɛla makila ya mibali oyo batyaki bomoi* na bango na likama?+ Mpo batyaki bomoi* na bango na likama mpo na koyela ngai mai yango.” Bongo aboyaki komɛla yango. Wana nde makambo oyo bilombe na ye misato ya etumba basalaki.

20 Abishai+ ndeko ya Yoabe+ akómaki mokonzi ya etuluku mosusu ya bilombe misato ya etumba. Abomaki bato 300 na likɔnga na ye, mpe azalaki na lokumu lokola bilombe misato ya etumba.+ 21 Na bilombe yango misato, ye nde ayebanaki mingi mpe azalaki mokonzi na bango, kasi akómaki te na molɔngɔ ya bilombe minene misato ya Davidi.

22 Benaya+ mwana ya Yehoyada azalaki mobali ya mpiko* oyo asalaki makambo mingi ya minene na Kabizeele.+ Abomaki bana mibali mibale ya Ariele ya Moabe. Akitaki mpe na kati ya libulu moko ya mai mokolo moko oyo nɛjɛ ezalaki kokwea mpo na koboma nkɔsi moko.+ 23 Abomaki mpe mobali moko Moezipito oyo azalaki mbinga na ndenge ya kokamwa, molai na ye ezalaki mapeko mitano.*+ Atako Moezipito yango azalaki na likɔnga moko lokola nzete ya kolíngela nsinga oyo basali-bilamba basalelaka,+ Benaya abundisaki ye na lingenda, abɔtɔlaki Moezipito likɔnga oyo azalaki na yango na lobɔkɔ mpe abomaki ye na likɔnga na ye moko.+ 24 Wana nde makambo oyo Benaya mwana ya Yehoyada asalaki, mpe azalaki na lokumu lokola bilombe minene misato ya Davidi. 25 Atako ayebanaki mingi koleka etuluku ntuku misato, akómaki te na molɔngɔ ya bilombe minene misato ya Davidi.+ Kasi Davidi atyaki ye mokonzi ya basoda oyo bakɛngɛlaka ye.

26 Bilombe ya etumba ya limpinga ya basoda ezalaki: Asahele+ ndeko ya Yoabe, Elehanane mwana ya Dodo ya Beteleme,+ 27 Shamote Moharore, Heleze Mopelone, 28 Ira+ mwana ya Ikeshe moto ya Tekoa, Abi-ezere+ moto ya Anatote, 29 Sibekai+ Mohusha, Ilai Moahohi, 30 Maharai+ moto ya Netofa, Helede+ mwana ya Baana moto ya Netofa, 31 Itai mwana ya Ribai moto ya Gibea ya Babenyamina,+ Benaya moto ya engumba Piratone, 32 Hurai moto ya mabwaku* ya Gaashe,+ Abiele moto ya Arbate, 33 Azemavete moto ya Bahurime, Eliahaba moto ya Shaalbone, 34 bana ya Hasheme Mogizone, Yonatane mwana ya Shagee Moharari, 35 Ahiame mwana ya Sakare Moharari, Elifale mwana ya Ure, 36 Hefere Momekerate, Ahiya Mopelone, 37 Hezero moto ya Karamele, Naarai mwana ya Ezebai, 38 Yoele ndeko ya Natane, Mibahare mwana ya Hagri, 39 Zeleke Moamone, Naharai Moberote, momemi-bibundeli ya Yoabe mwana ya Zeruya, 40 Ira Moyitri, Garebe Moyitri, 41 Uriya+ Mohiti, Zabade mwana ya Ahilai, 42 Adina mwana ya Shiza Morubene, nkumu moko ya Barubene, mpe bato 30 elongo na ye; 43 Hanane mwana ya Maaka, Yoshafate Momitine, 44 Uziya Moashetarote, Shama ná Yeyele, bana ya Hotame Moaroere; 45 Yediaele mwana ya Shimiri, ná ndeko na ye Yoha Motize; 46 Eliele Momahave, Yeribai ná Yoshavia bana ya Elenaame, ná Yitima Momoabe; 47 Eliele, Obede, ná Yahasiele Momezobe.