Yobo

 3 Mpo na nini tótalelama lokola banyama+

Mpe tómonana lokola bazoba* na miso na bino?

 4 Ata soki omisali mabe mpo na nkanda,

Mabele ekosundolama nde mpo na yo,

To libanga ekolongwa nde na esika na yango?

 5 Ya solo, pole ya moto mabe ekokufa

Mpe lolemo ya mɔtɔ na ye ekongɛnga te.+

 6 Na hema na ye pole ekokóma mpenza molili,

Mpe mwinda likoló na ye ekokufa.

 7 Azali lisusu na makasi ya kotambola te.

Mpe toli na ye moko ekokweisa ye.+

 8 Mpo makolo na ye ekomema ye na kati ya monyama,

Mpe akoyengayenga na madusu ya monyama yango.

 9 Motambo ekokanga ye na litindi;

Motambo ekokanga ye mpenza.+

10 Nsinga ebombami na mabele mpo na ye,

Mpe motambo ezali kozela ye na nzela na ye.

11 Makambo ya nsɔmɔ ezali kobangisa ye bisika nyonso,+

Mpe ezali kolanda ye na makolo na ye.

12 Makasi na ye esili,

Mpe likama+ ekotɛngumisa ye.

13 Loposo na ye elyami;

Maladi oyo ebomaka mingi koleka* ebebisi mabɔkɔ ná makolo na ye.

14 Balongoli ye na libateli ya hema na ye+

Mpe bamemi ye na liwa moko ya nsɔmɔ.*

15 Bato oyo ayebi te bakofanda* na kati ya hema na ye;

Sufulu ekopanzana na ndako na ye.+

16 Misisa na ye ekokauka na nse na ye,

Mpe bitape na ye ekokufa likoló na ye.

17 Bakokanisa ye lisusu ata moke te na mabele,

Mpe na balabala nkombo na ye ekoyebana te.*

18 Bakolongola ye na pole mpo akɔta na molili,

Mpe bakobengana ye na mabele oyo ebotaka.

19 Akozala na libota te mpe na bana te na kati ya bato na ye,

Mpe moto moko te akotikala na bomoi na esika oyo ye afandi.*

20 Na mokolo ya libebi na ye, bato ya Wɛsti bakoyoka nsɔmɔ,

Mpe bato ya Ɛsti bakolɛnga na kobanga.

21 Yango nde ekómelaka bahema ya mosali mabe,

Mpe esika ya moto oyo ayebi Nzambe te.”