Yirimia
30 Yehova alobaki na Yirimia ete: 2 “Talá oyo Yehova Nzambe ya Yisraele alobi: ‘Komá na buku maloba nyonso oyo nazali koloba na yo. 3 Mpo “talá! mikolo ezali koya,” Yehova alobi bongo, “nakoyanganisa bakangami ya bato na ngai, Yisraele mpe Yuda,”+ Yehova alobi bongo, “mpe nakozongisa bango na mokili oyo napesaki bankɔkɔ na bango, mpe bakozwa yango lisusu.”’”+
4 Talá maloba oyo Yehova alobi na Yisraele mpe na Yuda.
5 Talá oyo Yehova alobi:
“Toyoki lokito ya bato bazali kolɛnga;
Nsɔmɔ, mpe kimya ezali te.
6 Nabondeli bino, bótuna soki mobali akoki kobota.
Bongo mpo na nini namoni mobali nyonso ya makasi atye mabɔkɔ na libumu*
Lokola mwasi oyo azali kobota?+
Mpo na nini bilongi nyonso elɛmbilɛmbi?
7 Aa mawa! Mpo mokolo yango ezali mokolo moko ya mpasi.*+
Mosusu lokola yango ezali te,
Ntango moko ya mpasi mpo na Yakobo.
Kasi akobika na yango.”
8 “Mpe na mokolo yango,” Yehova ya mampinga alobi bongo, “nakobuka ekanganeli na nkingo ya bato na ngai, mpe nakokata bansinga na bango, mpe bapaya bakokómisa bango lisusu te baombo. 9 Bakosalela Yehova Nzambe na bango mpe Davidi mokonzi na bango, oyo nakobimisela bango.”+
10 “Mpe yo, mosaleli na ngai Yakobo, kobanga te,” Yehova alobi bongo,
“Mpe kozala na nsɔmɔ te, Ee Yisraele.+
Mpo nakobikisa yo uta na mosika
Mpe nakobikisa bana na yo uta na mokili oyo bakangamaki.+
Yakobo akozonga, akozala na kimya mpe akotungisama te,
Mpe moto ata moko te akobangisa bango.”+
11 “Mpo nazali elongo na yo mpo na kobikisa yo,” Yehova alobi bongo,
Nakosembola yo na ndenge oyo ebongi,
Mpe nakozanga te kopesa yo etumbu.”+
12 Mpo talá oyo Yehova alobi:
“Nkisi ezali te mpo na mpasi na yo.+
Mpota na yo ekosila te.
13 Moto ya kolobela likambo na yo azali te,
Ndenge ya kosilisa mpota na yo ezali te.
Nkisi ezali te mpo na yo.
14 Baoyo nyonso bazalaki kolinga yo makasi babosani yo.+
Bazali kolukaluka yo lisusu te.
Lokola ngambo na yo ezali monene mpe mpo na ebele ya masumu na yo,+
Nabɛti yo na fimbo ndenge monguna abɛtaka,+
Napesi yo etumbu ndenge moto ya nko apesaka.
15 Mpo na nini ozali kolela mpo na mpasi na yo?
Mpasi na yo ekosila te!
Lokola ngambo na yo ezali monene mpe mpo na ebele ya masumu na yo,+
Yango wana nasali yo bongo.
Baoyo bazali kopunza yo bakopunzama,
Mpe baoyo nyonso bazali kobɔtɔla yo biloko nakosala ete biloko na bango ebɔtɔlama.”+
17 “Kasi nakozongisa yo nzoto makasi, mpe nakosilisa bampota na yo,”+ Yehova alobi bongo.
“Atako bazalaki kobenga yo mwasi oyo babenganá mpe koloba ete:
‘Siona, oyo moto moko te azali koluka.’”+
18 Talá oyo Yehova alobi:
“Nazali koyanganisa bakangami ya bahema ya Yakobo,+
Mpe nakoyokela batabernakle na ye mawa.
Engumba ekotongama lisusu likoló ya ngomba na yango,+
Mpe ndako molai ya makasi ekotɛlɛma na esika na yango mpenza.
19 Mpe matɔndi ná mongongo ya baoyo bazali kosɛka ekobimela kuna.+
Nakokómisa bango mingi, mpe motángo na bango ekokita te;+
Nakokómisa bango ebele mpenza,*
Mpe bakozala eloko mpamba te.+
Nakopesa etumbu na bato nyonso oyo bazali konyokola ye.+
21 Moto ya nguya oyo akoyangela ye, akozala moko na bango,
Mpe mokonzi na ye akouta na libota na ye.
Nakosala ete apusana pene mpe akopusana penepene na ngai.”
“Mpo soki te, nani akondima* kopusana penepene na ngai?” Yehova atuni bongo.
22 “Mpe bokokóma bato na ngai,+ mpe ngai nakozala Nzambe na bino.”+
23 Talá! Nkanda ya Yehova ekobɛta lokola mopɛpɛ makasi,+
Lokola mopɛpɛ makasi oyo ezali kobalukabaluka, ekokwea na motó ya bato mabe.
Na eleko ya nsuka ya mikolo bokokanga ntina na yango.+