Yirimia
15 Bongo Yehova alobaki na ngai ete: “Ata soki Moize ná Samwele bátɛlɛmaka liboso na ngai,+ nalingaki komonisela bato oyo boboto te.* Bimisá bango liboso na ngai, bákende. 2 Mpe soki batuni yo ete: ‘Tokokende wapi?’ Osengeli koyanola bango ete: ‘Talá oyo Yehova alobi:
“Basusu bakokufa na maladi!
Basusu bakokufa na mopanga!+
Basusu bakokufa na nzala!
Mpe basusu bakokende bakangami!”’+
3 “‘Mpe nakotindela bango mitindo minei ya mpasi,’*+ Yehova alobi bongo: ‘mopanga mpo na koboma, bambwa mpo na kobenda bibembe na bango, bandɛkɛ ya likoló mpe banyama ya mabele mpo na kolya mpe kobebisa.+ 4 Mpe nakosala ete bákóma eloko ya nsɔmɔ mpo na makonzi nyonso ya mabele,+ mpo na Manase mwana ya Ezekiasi, mokonzi ya Yuda, mpo na oyo asalaki na Yerusaleme.+
5 Nani akomonisela yo motema mawa, Ee Yerusaleme?
Nani akoya kotala yo na mpasi na yo?
Mpe nani akoya kotuna yo soki ozali malamu?’
6 ‘Osundoli ngai,’ Yehova alobi bongo.+
‘Ozali kaka kopesa ngai mokɔngɔ.*+
Na yango nakosembolela yo lobɔkɔ na ngai mpe nakoboma yo.+
Nalɛmbi koyokela yo mawa.
7 Mpe nakopupola bango na nkanya ya monene na baporte ya mokili.
Nakozangisa bango bana.+
Nakobebisa bato na ngai,
Mpo baboyi kotika etamboli na bango ya mabe.+
8 Basi na bango oyo mibali bakufá bakokóma mingi koleka mbuma ya zɛlo ya mbu.
Na midi nakotindela bango mobebisi, akobundisa bamama ná bilenge mibali.
Nakomemela bango mobulungano mpe nsɔmɔ na pwasa.
9 Mwasi oyo abotaki bana nsambo alɛmbi;
Azali kopema na mpasi.
Moi na ye elali nzokande mokolo ezali naino;
Ayoki nsɔni mpe asambwe.’
‘Mpe ndambo ya bato oyo batikali kati na bango,
Nakokaba bango na mopanga ya banguna na bango,’ Yehova alobi bongo.”+
10 Mawa na ngai, Ee mama na ngai, mpo na nini obotaki ngai?+
Bato na mabele mobimba bazali kowelana na ngai mpe kobundisa ngai.
Nadefisi te, badefisi ngai mpe te,
Kasi bango nyonso bazali kolakela ngai mabe.
11 Yehova alobi boye: “Nakosalisa yo mpenza.
Ya solo mpenza nakolobela mpo na yo na ntango ya likama,
Na ntango ya mpasi, liboso ya monguna.
12 Moto akoki nde kobukabuka ebende,
Ebende oyo euti na nɔrdi, mpe kwivre?
13 Bozwi na yo mpe biloko na yo ya motuya nakotika yango epunzama,+
Mpo na lifuti te, kasi mpo na kopesa yo etumbu mpo na masumu nyonso oyo osali na bateritware na yo nyonso.
Mpo nkanda na ngai epelisi mɔtɔ,
Mpe epeli mpo na kozikisa yo.”+
15 Oyebi, Ee Yehova,
Kanisá ngai mpe tyelá ngai likebi.
Zongiselá banyokoli na ngai mabe mpo na ngai.+
Komonisela bango te motema molai noki báboma ngai.*
Yebá ete mpo na yo nazali komema nsɔni oyo.+
16 Ntango nazwaki maloba na yo, nalyaki yango lokola bilei;+
Mpe liloba na yo ekómaki nsai epai na ngai mpe esengo na motema na ngai,
Mpo ngai nabengami na nkombo na yo, Ee Yehova Nzambe ya mampinga.
17 Nafandi te esika moko na bato oyo balingaka bisengo mpo nasepela.+
Nafandi kaka ngai moko mpo lobɔkɔ na yo ezali likoló na ngai,
18 Mpo na nini mpasi na ngai ezali kosila te mpe mpota na ngai ezali kobela te?
Eboyi kokauka.
Okokóma liziba ya mai oyo ezali kopesa mai te,
Oyo bakoki kotyela motema te?
19 Na yango, talá oyo Yehova alobi:
“Soki ozongi, nakondima yo lisusu.
Mpe okotɛlɛma liboso na ngai.
Soki okaboli eloko ya motuya na eloko oyo ezali mpamba,
Okokóma molobeli na ngai.*
Bango bakozongela yo,
Kasi yo okozongela bango te.”
20 “Nakómisi yo epai ya bato oyo efelo ya kwivre oyo ebatelami makasi;+
Bakobundisa yo mpenza,
Kasi bakolonga yo te.+
Mpo nazali elongo na yo, mpo na kobikisa yo mpe kosikola yo,” Yehova alobi bongo.
21 “Nakobikisa yo na lobɔkɔ ya bato mabe,
Mpe nakosikola yo na lobɔkɔ ya banyokoli.”