Epai ya Bafilipi

4 Yango wana, bandeko na ngai ya bolingo oyo nazali na mposa makasi ya komona, bozali esengo na ngai mpe motole* mpo na ngai.+ Bótikala sembo+ epai ya* Nkolo, bandeko na ngai ya bolingo.

2 Nazali kolendisa Evodi mpe nazali kolendisa Sɛntishe bázala likanisi moko na kati ya Nkolo.+ 3 Ɛɛ, nazali kosɛnga mpe yo, moninga na ngai ya solosolo ya mosala, kobá kosalisa basi wana oyo basalaki mosala makasi elongo na ngai mpo na kopalangisa nsango malamu esika moko na Klema mpe baninga na ngai mosusu ya mosala, oyo bankombo na bango ezali na buku ya bomoi.+

4 Bósepelaka ntango nyonso na kati ya Nkolo. Nakoloba lisusu ete: Bósepelaka!+ 5 Bato nyonso báyeba ete bozalaka makambo makasimakasi te.+ Nkolo akómi pene. 6 Bómitungisaka ata na likambo moko te.+ Kasi na likambo nyonso, na libondeli, na lilɔmbo mpe matɔndi, bósɛngaka Nzambe lisalisi;+ 7 soki bosali bongo, kimya+ ya Nzambe oyo eleki makanisi na biso ekobatela mitema na bino+ mpe makanisi na bino na nzela ya Kristo Yesu.

8 Bandeko, mpo na kosukisa, bótya makanisi na bino na makambo* oyo ezali solo, ya lokumu, ya sembo, ya pɛto, na makambo oyo ekoki kolingama, oyo elobelami malamu, na makambo oyo ezali malamu mpe oyo ebongi kokumisama.+ 9 Bólanda malamumalamu makambo oyo boyekolaki, bondimaki, boyokaki mpe bomonaki epai na ngai,+ mpe Nzambe ya kimya akozala na bino.

10 Nazali kosepela mingi mpenza mpe kopesa Nkolo matɔndi na ndenge bomonisi lisusu ete botyelaka ngai likebi.+ Atako bozalaki ntango nyonso komitungisa mpo na ngai kasi bozalaki na libaku te ya komonisa yango. 11 Soki nazali koloba boye ezali te mpo nazali kokelela, mpo ezala ata na makambo ya ndenge nini, nayekoli kosepela na oyo nazali na yango.+ 12 Nayebi ndenge ya kozanga biloko,+ mpe nayebi ndenge ya kozala na biloko mingi. Na makambo nyonso, nayekoli sekele ya kotonda mpe ya kozala na nzala; ya kozala na biloko mingi mpe ya kokelela. 13 Na makambo nyonso, nazwaka makasi na lisalisi ya Nzambe, moto oyo apesaka ngai nguya.+

14 Atako bongo, bosalaki malamu ndenge bosalisaki ngai na mikakatano* na ngai. 15 Ya solo, bino Bafilipi, boyebi ete nsima ya kolongwa na ngai na Masedonia, ntango boyokaki nsango malamu mpo na mbala ya liboso, kaka lisangá na bino nde esalisaki ngai;+ 16 ntango nazalaki na Tesaloniki, botindelaki ngai biloko oyo nazalaki na mposa na yango, kaka mbala moko te kasi mbala mibale. 17 Nazali koluka makabo te. Nalingi nde bózwa mbano* oyo eutaka na kopesa. 18 Nzokande, nazali na nyonso oyo nasengeli na yango mpe ata kutu koleka. Natondi ndenge nazwi epai ya Epafrodite+ biloko oyo botindeli ngai. Likabo na bino ezali malasi ya nsolo kitoko,+ mbeka oyo ezali kosepelisa Nzambe. 19 Nzambe na ngai mpe akokokisa bamposa na bino nyonso+ na kolanda nkembo ya bomɛngo na ye na nzela ya Kristo Yesu. 20 Sikoyo Nzambe na biso mpe Tata azwa nkembo libela na libela. Amen.

21 Bópesa mbote na basantu nyonso oyo bazali na bomoko na Kristo Yesu. Bandeko oyo bazali elongo na ngai batindeli bino mbote. 22 Basantu nyonso, kasi mingimingi mpenza baoyo ya ndako ya Kaisala,+ batindeli bino mbote.

23 Boboto monene ya Nkolo Yesu Kristo ezala na elimo oyo bozali komonisa.