Nzembo

103 Tiká nasanzola* Yehova,

Nyonso oyo ezali kati na ngai esanzola nkombo na ye mosantu.

 2 Tiká nasanzola Yehova;

Nabosana ata moke te misala na ye nyonso,+

 3 Alimbisi mabunga na yo nyonso+

Mpe asilisi maladi na yo nyonso;+

 4 Asikoli bomoi na yo na libulu*+

Mpe alatisi yo motole ya bolingo ya sembo mpe ya motema mawa na ye.+

 5 Atondisi bomoi na yo mobimba na makambo ya malamu,+

Mpo bolenge na yo ekóma lisusu ya sika lokola oyo ya mpongo.+

 6 Yehova asalaka makambo na boyengebene+ mpe na bosembo

Mpo na baoyo nyonso banyokwami.+

 7 Ayebisaki Moize banzela na ye,+

Mpe misala na ye na bana ya Yisraele.+

 8 Yehova azali na motema mawa mpe na ngɔlu,+

Ayokaka nkanda noki te mpe atondi na bolingo ya sembo.*+

 9 Alandelaka ntango nyonso mabunga na biso te,+

Akangaka mpe nkanda te mpo na libela.+

10 Asaleli biso te makambo na kolanda masumu na biso,+

Apesi biso etumbu te oyo tosengeli kozwa na kolanda mabunga na biso.+

11 Mpo kaka ndenge likoló etombwamá koleka mabele,

Ndenge moko mpe bolingo na ye ya sembo eleki monene epai ya baoyo babangaka ye.+

12 Kaka ndenge epai moi ebimaka ezali mosika mpenza na epai elalaka,

Ndenge yango nde atye mosika na biso ebele ya misala na biso ya kobuka mibeko.+

13 Kaka ndenge tata ayokelaka bana na ye mawa,

Yehova ayokelaka baoyo babangaka ye mawa.+

14 Mpo ayebi malamu ndenge oyo tosalemá,+

Azali kobosana te ete tozali putulu.+

15 Moto, mowei mpamba, mikolo na ye ezali lokola oyo ya matiti;+

Azali kokola lokola fololo ya esobe.+

16 Kasi ntango mopɛpɛ ebɛtaka, ezalaka lisusu te,

Lokola nde ezalaki wana te.*

17 Kasi bolingo ya sembo ya Yehova ezali mpo na seko*

Epai ya baoyo babangaka ye,+

Mpe bosembo na ye epai ya bana ya bana na bango,+

18 Epai ya baoyo bazali kobatela kondimana na ye+

Mpe epai ya baoyo basalaka makasi bátosa mitindo na ye.

19 Yehova apiki makasi kiti na ye ya bokonzi na likoló;+

Mpe bokonzi na ye eyangeli eloko nyonso.+

20 Bósanzola Yehova, bino nyonso baanzelu na ye,+ oyo bozali na nguya makasi mpenza,

Oyo bozali kokokisa liloba na ye+ mpe kotosa mongongo na ye.*

21 Bósanzola Yehova, mampinga na ye nyonso,+

Basaleli na ye, oyo bosalaka mokano na ye.+

22 Bósanzola Yehova bino misala na ye nyonso,

Na bisika nyonso oyo azali koyangela.*