Epai ya Bafilipi
3 Bandeko na ngai, mpo na kosukisa, bókoba kosepela lokola bayekoli ya Nkolo.+ Kozongela kokomela bino makambo oyo nakomaki ezali kotungisa ngai te, kasi ezali nde mpo na bolamu na bino.*
2 Bókeba na bambwa; bókeba na baoyo bamipesi na kosala mabe, bókeba na baoyo bakataka nzoto.*+ 3 Mpo biso nde bato oyo tokatami ngenga ya solosolo,+ biso nde tozali kosala mosala mosantu na lisalisi ya elimo ya Nzambe mpe tomikumisaka na Kristo Yesu+ mpe totyelaka nzoto motema te, 4 atako, koleka bato nyonso, ngai nazali na bantina ya kotyela nzoto motema.
Soki ezali na moto mosusu oyo akanisi ete azali na ntina ya kotyela nzoto motema, ngai nazali na yango koleka: 5 nakatamaki ngenga na mokolo ya mwambe,+ nazali moto ya ekólo ya Yisraele, na libota ya Benyamina. Nazali Moebre mwana ya Baebre;+ na oyo etali mibeko, nazalaki Mofarisai;+ 6 na oyo etali molende, nanyokolaki lisangá;+ na oyo etali kozala sembo na kolanda mibeko, nazalaki na mbeba te. 7 Atako bongo, biloko oyo ezalaki kopesa ngai matomba, mpo na Kristo nakómá kotalela yango lokola biloko oyo ebungá.*+ 8 Ya solo nazali kotalela biloko nyonso ete ebungá, soki nakokanisi yango na motuya monene ya boyebi ya Kristo Yesu Nkolo na ngai. Mpo na ye nandimá kobungisa eloko nyonso* mpe natalelaka yango lokola bosɔtɔ, mpo nazwa Kristo 9 mpe namonana ete nazali na bomoko na ye. Bosembo* na ngai ezali te mpo nasali eloko oyo ebongi na kotalela Mibeko. Esimbami nde na kondima+ oyo nazali na yango epai ya Kristo.+ Bosembo na ngai euti epai ya Nzambe mpe esimbami na kondima.+ 10 Mposa na ngai ezali ete nayeba Kristo mpe nguya ya lisekwa na ye+ mpe namona bampasi oyo ye amonaki.+ Nazali kutu pene ya kokufa lokola ye,+ 11 mpo namona soki nakozala na kati ya bato oyo bakosekwa liboso.+
12 Elingi koloba te ete nasili kozwa libonza to nakómi moto ya kokoka, kasi nazali kokoba kosala nyonso+ mpo na komona soki ngai mpe nakoki kosimba eloko oyo Kristo Yesu aponaki ngai mpo na yango.*+ 13 Bandeko, nazali kokanisa te ete nasili kozwa libonza. Kasi likambo oyo ezali solo yango oyo: Nabosani biloko oyo ezali na nsima+ mpe nazali kosala nyonso mpo nazwa biloko oyo ezali na liboso.+ 14 Nazali kokoba kopota mbangu na mokano ya kozwa libonza+ ya kokende na likoló+ ndenge Nzambe abengi ngai na nzela ya Kristo Yesu. 15 Yango wana, biso nyonso oyo tokɔmɛli,+ tózala na makanisi wana, mpe soki moko na bino azali na makanisi oyo ekeseni, Nzambe akomonisa bino makanisi oyo ebongi. 16 Ata soki tokei liboso tii wapi, tókoba kaka kotambola na molɔngɔ na nzela moko wana.
17 Bandeko, bino nyonso bómekola ngai,+ mpe bótalaka baoyo bazali kotambola na ndenge oyo eyokani na ndakisa oyo bozwi epai na biso. 18 Mpo ezali na bato mingi, oyo kala nazalaki kotánga bango mbala na mbala, kasi sikoyo nazali kotánga bango na kolela; mpamba te bazali komitambwisa lokola banguna ya nzete ya mpasi* ya Kristo. 19 Nsuka na bango ezali libebi mpe nzambe na bango nde libumu na bango, bazali na lolendo mpo na makambo ya nsɔni oyo bazali kosala mpe makanisi na bango nyonso ezali kaka na makambo ya mabele.+ 20 Kasi biso, tozali bana-mboka+ ya likoló,+ mpe tozali kozela na mposa makasi mobikisi oyo akouta na likoló, Nkolo Yesu Kristo,+ 21 oyo akobongola nzoto na biso oyo ekitisamá mpo ekóma na nkembo lokola nzoto na ye,+ na nzela ya nguya na ye monene oyo esalisaka ye atya biloko nyonso na nse ya bokonzi na ye.+