Epai ya Bafilipi
2 Yango wana, soki bozali kolendisana mpo bozali na bomoko na Kristo, soki bozali kobɔndisana na bolingo, soki moto na moto azali komibanzabanza mpo na mosusu, soki mwa bolingo ya motema mpe mawa ezali na kati na bino, 2 bósala yango mpo natonda na esengo wana bozali komonisa ete bozali na likanisi moko, na bolingo moko, mpe ete bozali mpenza na bomoko, mpe bozali kokanisa likambo moko.+ 3 Bósala eloko moko te na kowelana+ to mpo bozali komimona ete boleki bamosusu,+ kasi na komikitisa* bómona basusu ete baleki bino,+ 4 bóluka kaka matomba na bino moko te,+ kasi mpe matomba ya basusu.+
5 Bóbatela na kati na bino makanisi oyo Kristo Yesu mpe azalaki na yango,+ 6 oyo atako azalaki na lolenge ya Nzambe,+ azwaki makanisi te ya kobɔtɔla bokonzi, elingi koloba ete akokana na Nzambe.+ 7 Te, kasi amikómisaki nde mpamba mpe akómaki lokola moombo+ mpe akómaki moto.*+ 8 Longola oyo wana, ntango ayaki lokola moto, amikitisaki mpe atosaki tii na liwa,+ ɛɛ, liwa na nzete ya mpasi.*+ 9 Yango wana Nzambe atombolaki ye likoló koleka+ mpe na boboto mpenza apesaki ye nkombo oyo eleki nkombo mosusu nyonso.+ 10 Nzambe asalaki bongo mpo moto nyonso apesa nkombo ya Yesu lokumu*—baoyo bazali na likoló mpe baoyo bazali na mabele mpe baoyo bazali na nse ya mabele+— 11 mpo bango nyonso basengeli kondima ete Yesu Kristo azali Nkolo+ mpo na nkembo ya Nzambe Tata.
12 Yango wana, bandeko na ngai ya bolingo, lokola botosaka ntango nyonso, kaka te ntango nazali wana, kasi mingi lisusu sikoyo na ntango oyo ngai nazali te, nazali kolendisa bino bókoba kosala mpo na lobiko na bino moko na kobanga mpe na kolɛnga. 13 Nzambe nde moto oyo azali kopesa bino makasi, mpo bósepelisa ye mpenza, mpe azali kopesa bino mposa mpe nguya ya kosala yango. 14 Bókoba kosala makambo nyonso na koimaima te+ mpe na ntembe te,+ 15 mpo bókóma bato oyo bazali na mbeba te mpe bazali na likambo te, bana ya Nzambe+ oyo bazali na litɔnɔ te na kati ya libota oyo etɛngamá mpe egumbamá,+ epai bozali kongɛnga lokola miinda na mokili.+ 16 Bókangama makasi na liloba ya bomoi,+ bongo nakozwa likambo ya kosepela na yango na mokolo ya Kristo, wana nayebi ete napotaki mbangu mpamba te mpe mosala makasi na ngai ezalaki ya mpamba te. 17 Nzokande, atako nazali kosopama lokola likabo ya masanga+ likoló ya mbeka+ mpe mosala mosantu* epai kondima na bino ememi bino, nazali na esengo mpe nazali kosepela elongo na bino nyonso. 18 Bino mpe ndenge moko bózala na esengo mpe bósepela elongo na ngai.
19 Nazali na elikya ete Nkolo Yesu akopesa ngai nzela ya kotindela bino Timote+ nsima ya mwa ntango moke, mpo nalendisama ntango nakozwa bansango na bino. 20 Mpo nazali na moto mosusu te oyo azali na makanisi lokola ya ye, oyo azali komitungisa mpenza mpo na bolamu na bino. 21 Bamosusu nyonso bazali koluka matomba na bango moko, kasi oyo ya Yesu Kristo te. 22 Kasi boyebi ndenge amonisaki ete abongi kotyelama motema, mpo lokola mwana+ ná tata na ye asalaki mosala makasi* elongo na ngai mpo na kopalanganisa nsango malamu. 23 Yango wana, ye nde moto nazali kolikya kotinda nokinoki nsima ya koyeba ndenge makambo na ngai ekotambola. 24 Kutu, nandimi mpenza ete Nkolo akopesa ngai nzela naya nsima ya mwa ntango moke.+
25 Kasi mpo na sikoyo, namoni ete ezali na ntina natindela bino Epafrodite, ndeko na ngai, moninga na ngai ya mosala oyo mpe azali soda ya Kristo. Botindaki ye lokola momemi-nsango mpe mosaleli mpo na kosalisa ngai.+ 26 Mpo azali na mposa makasi ya komona bino nyonso mpe azali na mawa mingi mpo boyokaki ete abɛlaki. 27 Ya solo, abɛlaki mpenza pene na liwa; kasi Nzambe ayokelaki ye mawa, kutu, kaka ye moko te, kasi ná ngai mpe, mpo nabakisa mawa likoló ya mawa te. 28 Yango wana nazali kotinda ye nokinoki mpenza, mpo ntango bokomona ye bósepela lisusu mpe ngai, namitungisa mingi te mpo na bino. 29 Na yango, bóyamba ye na ndenge bomeseni koyamba bayekoli ya Nkolo na esengo nyonso; mpe bókoba kolɛngɛla bato ya ndenge wana,+ 30 mpamba te mpo na mosala ya Nkolo akómaki mpenza pene na liwa. Mpe atyaki bomoi na ye na likama mpo na ngai, mpo bino bozalaki awa te mpo na kosalisa ngai.+