116 Nalingaka Yehova
Mpo ayokaka mongongo na ngai, libondeli na ngai mpo na kosɛnga lisalisi.+
2 Mpo atyaka litoi na ye epai na ngai,+
Mpe nakobelela ye bomoi na ngai mobimba.
3 Bansinga ya liwa ezingaki ngai;
Mpe Nkunda ekangaki ngai.+
Nazalaki kaka komona mpasi ná mawa.+
4 Kasi nabelelaki nkombo ya Yehova:+
“Ee Yehova, bikisá ngai!”
5 Yehova azali na ngɔlu mpe azali sembo;+
Nzambe na biso azali Nzambe ya motema mawa.+
6 Yehova azali kobatela baoyo bazangi mayele.+
Makasi na ngai esilaki, mpe ye abikisaki ngai.
7 Molimo na ngai epema lisusu,
Mpo Yehova asaleli ngai makambo na boboto.
8 Obikisi ngai na liwa,
Liso na ngai na mpisoli, lokolo na ngai na libaku.+
9 Nakotambola liboso ya Yehova na mokili ya bato ya bomoi.
10 Nazalaki na kondima, yango wana nalobaki;+
Nayokaki mpenza mpasi.
11 Ntango nakómaki na nsɔmɔ, nalobaki boye:
“Moto nyonso azali mobuki lokuta.”+
12 Nakofuta Yehova eloko nini
Mpo na bolamu nyonso oyo asalelá ngai?
13 Nakozwa kɔpɔ ya lobiko,
Mpe nakobelela nkombo ya Yehova.
14 Nakokokisa bilako na ngai epai ya Yehova
Liboso ya bato na ye nyonso.+
15 Liwa ya bato ya sembo
Ezali na motuya mingi na miso ya Yehova.+
16 Nabondeli yo, Ee Yehova,
Mpo nazali mosaleli na yo.
Nazali mosaleli na yo, mwana ya moombo na yo ya mwasi.
Ofungoli bansinga na ngai.+
17 Nakopesa yo mbeka ya kozongisa matɔndi;+
Nakobelela nkombo ya Yehova.
18 Nakokokisa bilako na ngai epai ya Yehova+
Liboso ya bato na ye nyonso,+
19 Na mapango ya ndako ya Yehova,+
Na kati na yo, Ee Yerusaleme.
Bósanzola Yah!+