Yirimia
23 Yehova alobi boye: “Mawa na babateli ya mpate oyo bazali kobebisa mpe kopalanganisa bampate ya esika na ngai ya koleisa bibwɛlɛ matiti!”+
2 Na yango, talá oyo Yehova Nzambe ya Yisraele alobi mpo na babateli ya mpate oyo bazali koleisa bato na ngai: “Bozali kopalanganisa bampate na ngai; bozali kaka kopanza yango, mpe botyeli yango likebi te.”+
“Nakopesa bino etumbu mpo na misala na bino ya mabe,” Yehova alobi bongo.
3 “Na nsima nakoyanganisa esika moko bampate na ngai oyo etikali uta na mikili nyonso epai napalanganisaki yango,+ mpe nakozongisa yango na esika na yango ya koleisa bibwɛlɛ matiti,+ ekobota mpe ekokóma mingi.+ 4 Nakotɛlɛmisela yango babateli oyo bakoleisa yango mpenza,+ ekobanga lisusu te, ekolɛnga na nsɔmɔ te, mpe moko te ekozanga,” Yehova alobi bongo.
5 “Talá! Mikolo ezali koya,” Yehova alobi bongo, “ntango nakotɛlɛmisela Davidi etape* ya boyengebene.+ Mokonzi moko akoyangela,+ akomonisa bososoli, akokata makambo na bosembo mpe na boyengebene na mokili.+ 6 Na mikolo na ye, Yuda ekobikisama,+ mpe Yisraele ekofanda na kimya.+ Bakobenga ye na nkombo oyo: Yehova azali Bosembo na biso.”+
7 Nzokande Yehova alobi boye, “mikolo ezali koya, bakoloba lisusu te ete: ‘Lokola Yehova azali solo na bomoi, ye oyo abimisaki bana ya Yisraele na mokili ya Ezipito!’+ 8 Kasi bakoloba nde ete: ‘Lokola Yehova azali solo na bomoi, moto oyo abimisaki bato ya Yisraele na mokili ya nɔrdi mpe na mikili nyonso epai napalanganisaki bango,’ mpe bakofanda mpenza na mokili na bango.”+
9 Na likambo etali basakoli:
Motema na ngai ezoki.
Mikuwa na ngai nyonso ezali kolɛnga.
Nazali lokola moto oyo alangwe
Lokola moto oyo amɛli vinyo koleka ndelo,
Mpo na Yehova mpe mpo na maloba na ye mosantu.
10 Mpo mokili etondi na bato ya ekobo;+
Mpo na elakeli mabe mokili ezali kolela+
Mpe bisika ya koleisa bibwɛlɛ matiti na esobe ekauki.+
Etamboli na bango ezali mabe, mpe basaleli nguya na bango na ndenge ya mabe.
11 “Mosakoli ná nganga-nzambe bakómi mbindo.*+
Nakuti mabe na bango ata na ndako na ngai,”+ Yehova alobi bongo.
Mpo nakomemela bango mpasi,
Na mbula oyo nakopesa bango etumbu,” Yehova alobi bongo.
13 “Mpe namoni makambo ya nsɔni epai ya basakoli ya Samaria.+
Bazali kosakola na nkombo ya Baala,
Mpe babungisi bato na ngai Yisraele nzela.
14 Mpe namoni makambo ya nsɔmɔ epai ya basakoli ya Yerusaleme.
Bazali kosala ekobo+ mpe bomoi na bango etondi na lokuta;+
Bazali kolendisa* basali-mabe,
Bazali kotika te kosala mabe.
15 Na yango, talá oyo Yehova ya mampinga alobi mpo na basakoli:
“Talá nazali koleisa bango mbondo
Mpe komɛlisa bango mai oyo ezali na pwazɔ.+
Mpo lipɛngwi euti na basakoli ya Yerusaleme epalangani na mokili mobimba.”
16 Talá oyo Yehova ya mampinga alobi:
“Bóyoka te maloba ya basakoli oyo bazali kosakwela bino.+
Bazali kokosa bino.*
17 Bazali koloba mbala na mbala na baoyo bazangi limemya epai na ngai ete,
‘Yehova alobi boye: “Bokozala na kimya.”’+
Mpe balobi na moto nyonso oyo azali kolanda motema makasi na ye ete,
‘Mpasi ata moko te ekokómela bino.’+
18 Mpo nani atɛlɛmi na etuluku ya baninga ya motema ya Yehova
Mpo amona mpe ayoka liloba na ye?
Nani atye likebi na liloba na ye mpo ayoka yango?
19 Talá! Nkanda ya Yehova ekobɛta lokola mopɛpɛ makasi;
Lokola mopɛpɛ makasi oyo ezali kobalukabaluka, ekokwea na motó ya bato mabe.+
20 Nkanda ya Yehova ekokita te
Tii akokokisa mpe akosala makambo oyo akanaki.
Na eleko ya nsuka ya mikolo bokokanga mpenza ntina na yango.
21 Natindaki basakoli te, kasi bapotaki mbangu.
Nalobaki na bango te, kasi basakolaki.+
22 Nzokande, soki batɛlɛmaki na etuluku ya baninga na ngai ya motema,
Mbɛlɛ bayokisaki bato na ngai liloba na ngai
Mpe mbɛlɛ basalisaki bango bátika etamboli na bango ya mabe mpe misala na bango ya mabe.”+
23 “Nazalaka Nzambe kaka na penepene, kasi Nzambe na mosika te?” Yehova atuni bongo.
24 “Moto akoki nde kobombana na esika oyo ngai nakoki komona ye te?”+ Yehova atuni bongo.
“Nakoki te komona eloko nyonso oyo ezali na likoló mpe na mabele?”+ Yehova atuni bongo.
25 “Nayoki basakoli oyo bazali kosakola lokuta na nkombo na ngai balobi, ‘Nalɔti ndɔtɔ! Nalɔti ndɔtɔ!’+ 26 Tii ntango nini basakoli bakokoba koloba lokuta? Bazali basakoli oyo balobaka lokuta oyo euti na motema na bango.+ 27 Bazali koluka kobosanisa bato na ngai nkombo na ngai na nzela ya bandɔtɔ na bango oyo bazali koyebisana, kaka ndenge batata na bango babosanaki nkombo na ngai mpo na Baala.+ 28 Mosakoli oyo alɔti ndɔtɔ, aloba ndɔtɔ yango; kasi moto oyo azali na liloba na ngai, asengeli koloba yango na bosembo nyonso.”
“Matiti ezali nini liboso ya mbuma?” Yehova atuni bongo.
29 “Liloba na ngai ezali te lokola mɔtɔ,+ mpe ezali te lokola marto ya kotula oyo ezali kobukabuka libanga?”+ Yehova atuni bongo.
30 “Na yango nakopesa etumbu na basakoli oyo bazali koyibana maloba na ngai bango na bango,”+ Yehova alobi bongo.
31 “Nakopesa etumbu na basakoli oyo bazali kosalela lolemo na bango mpo na koloba ete, ‘talá oyo alobi!’”+ Yehova alobi bongo.
32 “Nakopesa etumbu na basakoli oyo basakolaka bandɔtɔ ya lokuta,” Yehova alobi bongo, “baoyo bazali koyebisa yango mpe bazali kobungisa bato na ngai nzela mpo na makambo na bango ya lokuta mpe komikumisa na bango.”+
“Kasi natindaki bango te mpe napesaki bango mitindo te. Na yango, bakomemela bato oyo eloko moko te ya malonga,”+ Yehova alobi bongo.
33 “Mpe soki bato oyo to mosakoli to nganga-nzambe atuni yo ete: ‘Mokumba ya kilo* ya Yehova ezali nini?’ Osengeli koyanola bango ete: ‘“Bino nde bozali mokumba ya kilo! Nakobwaka bino,”+ Yehova alobi bongo.’ 34 Kasi soki mosakoli to nganga-nzambe to bato balobi ete, ‘Nsango ya Yehova ezali mokumba ya kilo!’ Nakopesa etumbu na moto yango mpe na bato ya ndako na ye. 35 Talá oyo moto na moto azali koloba na moninga na ye mpe na ndeko na ye: ‘Yehova apesi eyano nini? Mpe Yehova alobi nini?’ 36 Kasi bóloba lisusu te ete nsango ya Yehova ezali mokumba ya kilo, mpo moto na moto azali kosala ete liloba na ye ezala kilo, mpe bobongoli maloba ya Nzambe ya bomoi, Yehova ya mampinga, Nzambe na biso.
37 “Talá oyo okoloba na mosakoli: ‘Eyano nini Yehova apesi yo? Mpe Yehova alobi nini? 38 Mpe soki bozali kaka koloba ete: “Nsango ya Yehova ezali mokumba ya kilo!” talá oyo Yehova alobi: “Lokola bozali koloba ete: ‘Liloba oyo ezali nsango ya mokumba ya kilo ya Yehova,’ nzokande nayebisaki bino bóloba te ete: “Nsango ya Yehova ezali mokumba ya kilo!”’ 39 Talá! Nakotombola bino mpe nakobwaka bino mosika na ngai, bino mpe engumba oyo napesaki bino ná bankɔkɔ na bino. 40 Mpe nakomemela bino nsɔni mpe kosambwa ya libela, oyo bato bakobosana te.”’”+