Basambisi

8 Na nsima mibali ya Efraime balobaki na ye boye: “Likambo nini osali biso? Mpo na nini obengaki biso te ntango okendaki kobunda na Bamidiane?”+ Mpe basilikelaki ye makasi.+ 2 Kasi alobaki na bango: “Eloko nini nasali koleka bino? Mosala ya kolɔkɔta mbuma oyo Efraime+ asali eleki mosala ya kobuka mbuma ya vinyo oyo Abi-ezere+ asali, boye te? 3 Nzambe apesaki Orebe ná Zeebe,+ bankumu ya Midiane, na lobɔkɔ na bino, boye te? Sikoyo, eloko nini ngai nasali koleka bino?” Ntango alobaki bongo,* nkanda na bango ekitaki.*

4 Na nsima Gideone akómaki na Ebale Yordani mpe akatisaki yango. Ye ná mibali 300 oyo bazalaki elongo na ye balɛmbaki, kasi bakobaki kolanda banguna. 5 Bongo alobaki na mibali ya Sukote boye: “Nabondeli bino, bópesa bato oyo bazali elongo na ngai mampa, mpo balɛmbi, mpe ngai nazali kolanda Zeba ná Zalamuna, bakonzi ya Midiane.” 6 Kasi bankumu ya Sukote balobaki: “Mpo na nini tópesa limpinga na yo mampa? Osili nde kokanga Zeba ná Zalamuna na lobɔkɔ na yo?” 7 Na yango Gideone alobaki boye: “Lokola bolobi bongo, ntango Yehova akopesa Zeba ná Zalamuna na lobɔkɔ na ngai, nakobɛta bino na fimbo ya banzubɛ mpe na bansinga ya nsendensende ya esobe.”+ 8 Bongo alongwaki wana, amataki tii na Penuele, mpe asɛngaki bato ya Penuele kaka ndenge wana, kasi mibali ya Penuele bapesaki ye kaka eyano oyo mibali ya Sukote bapesaki ye. 9 Bongo alobaki mpe na mibali ya Penuele boye: “Ntango nakozonga na kimya, nakobuka linɔ́ngi oyo.”+

10 Nzokande, Zeba ná Zalamuna bazalaki na Karakore, elongo na mampinga na bango: mibali soki 15 000. Kaka bango nde batikalaki na kati ya limpinga mobimba ya bato ya Ɛsti,+ mpo mibali 120 000 oyo bazalaki na mipanga basilaki kokufa. 11 Gideone akobaki komata na nzela ya bato oyo bafandaka na bahema, na ɛsti ya Noba mpe Yogebeha,+ mpe abundisaki kaka yango, ntango oyo bato bamilɛngɛlaki te. 12 Ntango Zeba ná Zalamuna, bakonzi mibale ya Midiane, bakimaki, alandaki bango mpe akangaki bango. Mpe yango ekɔtisaki yikiyiki na kaa mobimba.

13 Na nsima, Gideone mwana ya Yoashe autaki na etumba mpe azongaki na nzela oyo ematá tii na Herese. 14 Na nzela, akangaki elenge mobali moko ya Sukote mpe atunaki ye mituna. Elenge mobali yango akomelaki ye bankombo ya mibali 77, oyo bazalaki bankumu mpe bankulutu na Sukote. 15 Bongo akendaki epai ya mibali ya Sukote mpe alobaki na bango: “Bótala Zeba ná Zalamuna, oyo botumolaki ngai mpo na bango, mpe bolobaki: ‘Mpo na nini tópesa bato na yo oyo balɛmbi mampa? Osili nde kokanga Zeba ná Zalamuna?’”+ 16 Bongo azwaki bankulutu ya engumba yango, mpe apesaki mibali yango ya Sukote liteya na fimbo ya banzubɛ ná bansinga ya nsendensende ya esobe.+ 17 Na nsima, abukaki linɔ́ngi ya Penuele,+ mpe abomaki mibali ya engumba yango.

18 Atunaki Zeba ná Zalamuna boye: “Mibali oyo bobomaki na Tabore bazalaki ndenge nini?” Bongo bango balobaki: “Bazalaki lokola yo, nzoto na bango ezalaki lokola ya bana ya mokonzi.” 19 Na yango alobaki: “Bazalaki bandeko na ngai, bana ya mama na ngai. Lokola Yehova azali solo na bomoi, nalingaki koboma bino te soki bótikaka bango na bomoi.” 20 Na nsima, alobaki na Yetere mwana na ye ya liboso ete: “Tɛlɛmá, bomá bango.” Kasi elenge mobali yango abendaki mopanga na ye te; azalaki kobanga, mpo azalaki naino elenge. 21 Bongo Zeba ná Zalamuna balobaki: “Yo moko tɛlɛmá mpe bomá biso, mpo mobali ya solosolo ayebanaka na nguya na ye.”* Na yango, Gideone atɛlɛmaki mpe abomaki Zeba ná Zalamuna,+ mpe azwaki babiju oyo ezalaki na bankingo ya bakamela na bango; babiju yango egumbamá lokola sanza oyo ebimi sika.

22 Na nsima, mibali ya Yisraele balobaki na Gideone boye: “Yangelá biso, yo ná mwana na yo, ná mwana ya mwana na yo, mpo obikisaki biso na lobɔkɔ ya Bamidiane.”+ 23 Kasi Gideone alobaki na bango: “Ngai nakoyangela bino te, mwana na ngai mpe akoyangela bino te. Yehova nde akoyangela bino.”+ 24 Gideone alobaki lisusu boye: “Nalingi kosɛnga bino eloko moko: Mokomoko na bino apesa ngai lopɛtɛ ya zolo, na biloko oyo apunzaki.” (Banguna na bango bazalaki na mpɛtɛ ya wolo na zolo, mpo bazalaki Bayishimaele.)+ 25 Balobaki: “Tokopesa yo yango.” Bongo batandaki elamba moko mpe moto na moto abwakaki likoló na yango lopɛtɛ ya zolo oyo ezalaki na kati ya biloko oyo apunzaki na etumba. 26 Kilo ya mpɛtɛ ya wolo ya zolo oyo asɛngaki ezalaki shekele 1 700;* bakisa mpe babiju oyo egumbamá lokola sanza oyo ebimi sika, bashɛnɛti, bilamba ya lɛnɛ ya mwa motane-bulé oyo bakonzi ya Midiane bazalaki kolata, mpe bansinga oyo bazalaki kolatisa bakamela na nkingo.+

27 Gideone asalaki na yango efode*+ mpe atyaki yango na engumba na ye Ofra;+ mpe Yisraele mobimba esalaki bondumba ya elimo kuna+ na ndenge esambelaki efode yango, mpe ekómelaki Gideone ná libota na ye motambo.+

28 Na ndenge yango, Bamidiane+ batyamaki na nse ya bokonzi ya Bayisraele, mpe babundisaki lisusu Bayisraele te;* mpe mokili yango ekómaki na kimya mbula 40 na mikolo ya Gideone.+

29 Bongo, Yerubaala+ mwana ya Yoashe azongaki na ndako na ye mpe afandaki kuna.

30 Gideone akómaki tata ya bana mibali 70,* mpo azalaki na basi ebele. 31 Mwasi na ye mosusu oyo azalaki na Shekeme abotelaki ye mpe mwana mobali, mpe Gideone apesaki ye nkombo Abimeleke.+ 32 Mpe Gideone mwana ya Yoashe akufaki nsima ya kozala na bomoi moko ya malamu mpe ya molai; bakundaki ye na lilita ya tata na ye Yoashe, na Ofra ya Baabi-ezere.+

33 Ntango kaka Gideone akufaki, Bayisraele basalaki lisusu bondumba ya elimo na ndenge basambelaki Babaala,*+ mpe bakómisaki Baala-berite nzambe na bango.+ 34 Bayisraele babosanaki Yehova Nzambe na bango,+ oyo abikisaki bango na lobɔkɔ ya banguna na bango nyonso ya zingazinga;+ 35 mpe bamoniselaki bato ya ndako ya Yerubaala, elingi koloba Gideone, bolingo ya sembo te mpo na bolamu nyonso oyo asalelaki Yisraele.+