Yirimia
31 Yehova alobi boye: “Na ntango yango, nakokóma Nzambe mpo na mabota nyonso ya Yisraele, mpe bango bakokóma bato na ngai.”+
2 Talá oyo Yehova alobi:
“Bato oyo babikaki na bitumba bandimamaki na esobe
Ntango Yisraele azalaki kokende na esika na ye ya kopema.”
3 Yehova abimelaki ngai uta na mosika mpe alobaki:
“Nalingá yo na bolingo ya seko.
Yango wana nabendi yo epai na ngai na bolingo ya sembo.*+
4 Nakotonga yo lisusu mpe okotongama lisusu.+
Ee ngɔndɔ ya Yisraele, okozwa lisusu bambonda na yo ya mike ya mabɔkɔ
5 Okolona lisusu bilanga ya vinyo na bangomba ya Samaria.+
Baloni bakolona mpe bakolya mbuma na yango.+
6 Mpo ekozala na mokolo oyo bakɛngɛli na bangomba ya Efraime bakobelela ete:
‘Bótɛlɛma, tómata na Siona, epai ya Yehova Nzambe na biso.’”+
7 Mpo talá oyo Yehova alobi:
“Bóganga makasi na esengo mpo na Yakobo,
Bóganga makasi mpo bozali bato ya liboso kati na bikólo.+
Bósakola yango; bósanzola mpe bóloba ete:
‘Ee Yehova, bikisá bato na yo, batikali ya Yisraele.’+
8 Nazali kozongisa bango uta na mokili ya nɔrdi.+
Nakoyanganisa bango uta na bisika oyo eleki mosika na mabele.+
Kati na bango moto oyo akufá miso mpe motɛngumi akozala,+
Mwasi ya zemi mpe oyo azali kobota bakozala, bango nyonso elongo.
Bakozonga awa lokola lisangá moko monene.+
Nakozongisa bango awa wana bakobondela ngai mbala na mbala.
Mpamba te nazali Tata mpo na Yisraele, mpe Efraime azali mwana na ngai ya liboso.”+
“Moto oyo apanzaki Yisraele akoyanganisa ye.
Akobatela ye ndenge mobateli ya mpate abatelaka etonga na ye.+
12 Bakoya mpe bakoganga na esengo na esika etombwaná ya Siona+
Mpe bakosepela mpo na bolamu* ya Yehova,
Mpo na blé, vinyo ya sika,+ mafuta,
Bana ya bampate mpe ya bangɔmbɛ.+
13 “Na ntango yango ngɔndɔ akobina na esengo,
Bilenge mibali mpe mibange mibali, bango nyonso elongo.+
Nakobongola mawa na bango esengo,+
Nakobɔndisa bango mpe nakopesa bango esengo na esika ya mawa.+
14 Nakopesa banganga-nzambe bilei mingi,*
Mpe bato na ngai bakotonda na bolamu na ngai,”+ Yehova alobi bongo.
15 “Talá oyo Yehova alobi:
‘Mongongo moko ezali koyokana na Rama,+ komilelalela ná mongongo ya kolela ya mawa:
Rashele moto azali kolela bana na ye.+
Aboyi kobɔndisama mpo na bana na ye,
Mpo bazali lisusu te.’”+
16 Talá oyo Yehova alobi:
“‘Pekisá mongongo na yo kolela mpe miso na yo kobimisa mai ya miso,
Mpamba te mbano ezali mpo na mosala na yo,
Bakozonga longwa na mokili ya monguna,’+ Yehova alobi bongo.
17 ‘Mpe elikya ezali mpo na yo,’+ Yehova alobi bongo,
‘Bana na yo bakozonga na teritware na bango.’”+
18 “Nayoki mpenza Efraime azali komilelalela ete:
‘Osemboli ngai mpe nasembolami,
Lokola mwana-ngɔmbɛ oyo eteyami te.
Zongisá ngai, mpe nakozonga na lombangu,
Mpo ozali Yehova Nzambe na ngai.
19 Nayokaki mawa mpe nazongelaki Nzambe;+
Nsima ya kosalisa ngai nakanga ntina, nabɛtaki ebɛlɔ na ngai na mawa.
Nayokaki nsɔni mpe nasambwaki,+
Mpo namemaki nsɔni ya masumu na ngai oyo nasalaki na bolenge.’”
20 “Efraime azali te mwana ya motuya epai na ngai, mwana oyo nalingaka mingi?+
Mpo ndenge nazali koloba mabe mpo na ye, ndenge mpe nakokanisa ye lisusu.+
Yango wana nayoki motema mpasi mpo na ye.
Nakoyokela ye mpenza mawa,” Yehova alobi bongo.+
Tyá likebi na nzela ya monene, epai osengeli kokende.+
Zongá, Ee ngɔndɔ ya Yisraele. Zongá na bingumba oyo ezali ya yo.
22 Tii ntango nini okobunga nzela, Ee mwana mwasi oyo azangi bosembo?
Mpo Yehova asali likambo moko ya sika na mabele:
Mwasi akolukaluka mobali.”
23 Talá oyo Yehova ya mampinga, Nzambe ya Yisraele, alobi: “Bakoloba lisusu maloba oyo na mokili ya Yuda mpe na bingumba na yango, ntango nakoyanganisa bakangami na bango: ‘Yehova apambola yo, Ee esika ya kofanda ya bosembo,+ Ee ngomba mosantu.’+ 24 Mpe kuna bafandi ya Yuda ná ya bingumba na yango nyonso, baloni-bilanga mpe baoyo bakambaka bitonga bakofanda elongo.+ 25 Mpe nakokokisa mposa ya moto oyo alɛmbi, mpe baoyo balɛmbi mpo na nzala nakotondisa bango.”+
26 Nsima na yango nalamukaki mpe nafungolaki miso, mpe mpɔngi na ngai ekómaki elɛngi mpo na ngai.
27 Yehova alobi ete: “Talá! Mikolo ezali koya nakolona bato ya ndako ya Yisraele mpe ya Yuda na momboto* ya moto mpe na momboto ya bibwele.”+
28 “Kaka ndenge natyelaki bango likebi mpo na kopikola, kokweisa, kobuka, kobebisa mpe kosala mabe,+ ndenge wana nde nakotyela bango likebi mpo na kotonga mpe mpo na kolona,”+ Yehova alobi bongo. 29 “Na mikolo yango bakoloba lisusu te ete: ‘Batata nde balyaki mbuma ya vinyo ya mobɛsu,* kasi mino ya bana nde eyokaki ngayi.’+ 30 Kasi moto na moto akokufa mpo na libunga na ye moko. Moto nyonso oyo akolya mbuma ya vinyo ya mobɛsu,* mino na ye nde ekoyoka ngayi.”
31 Yehova alobi boye: “Talá! Mikolo ezali koya, nakosala kondimana ya sika ná bato ya Yisraele mpe ya Yuda.+ 32 Ekozala te kondimana lokola oyo nasalaki ná bankɔkɔ na bango na mokolo oyo nasimbaki lobɔkɔ na bango mpo na kobimisa bango na mokili ya Ezipito,+ ‘kondimana na ngai oyo babukaki,+ atako nazalaki nkolo* na bango,’ Yehova alobi bongo.”
33 “Mpo talá kondimana oyo nakosala ná bato ya Yisraele nsima ya mikolo yango,” Yehova alobi bongo. “Nakotya mobeko na ngai na kati na bango,+ mpe nakokoma yango na motema na bango.+ Nakokóma Nzambe na bango, mpe bango bakokóma bato na ngai.”+
34 “Mpe bakoteyana lisusu te moto na moto moninga na ye mpe moto na moto ndeko na ye ete: ‘Yebá Yehova!’+ mpo bango nyonso bakoyeba ngai, banda na oyo aleki moke tii na oyo aleki monene kati na bango,”+ Yehova alobi bongo. “Mpo nakolimbisa libunga na bango, mpe nakokanisa lisumu na bango lisusu te.”+
35 Yehova, Moto oyo asalá moi mpo epesa pole na moi,
Moto oyo atyelá sanza mpe minzoto mibeko mpo engɛngisa na butu,
Moto oyo atombokisaka mbu mpo mbonge na yango ezala na yikiyiki,
Oyo nkombo na ye ezali Yehova ya mampinga, alobi boye:+
36 “‘Soki kaka mibeko yango ezali lisusu na ntina te,
Bana ya Yisraele bakozala lisusu ekólo te liboso na ngai,’” Yehova alobi bongo.+
37 Talá oyo Yehova alobi: “‘Kaka ndenge lola kuna na likoló ekoki komekama te mpe miboko ya mabele awa na nse ekoki koyebana te, ndenge moko mpe nakoki te kobwaka bato nyonso ya libota ya Yisraele mpo na nyonso oyo basali,’ Yehova alobi bongo.”+
38 Yehova alobi boye: “Talá! Mikolo ezali koya, ntango engumba oyo ekotongama+ mpo na Yehova banda na Ndako Molai ya Hananele+ tii na Litumu ya Porte.+ 39 Mpe nsinga ya komeka molai+ ekokende alima tii na ngomba moke ya Garebe, mpe ekobaluka tii na Goa. 40 Mpe Lobwaku* mobimba ya bibembe mpe ya putulu ya mɔtɔ,* mpe mikala nyonso ya bilanga tii na Lobwaku ya Kidrone,+ tii na litumu ya Porte ya Bampunda+ na ngámbo ya ɛsti, ekozala eloko moko mosantu mpo na Yehova.+ Ekopikolama ata moke te, mpe ekokweisama lisusu te.”