Mokanda ya mibale ya Ntango

20 Nsima na yango, Bamoabe+ mpe Baamone,+ elongo na Baamonime* mosusu, bayaki kobundisa Yehoshafate. 2 Bongo bayebisaki Yehoshafate: “Bato ebele mpenza bazali koya mpo na kobundisa yo, bauti na etúká ya mbu,* na Edome,+ mpe bakómi na Hazazone-tamara, elingi koloba Ene-gedi.”+ 3 Na yango Yehoshafate akómaki kobanga mpe azwaki mokano* ya koluka Yehova.+ Bongo atindaki bato nyonso ya Yuda bákila bilei. 4 Na yango bato ya Yuda bayanganaki mpo na kotuna Yehova.+ Bautaki na bingumba nyonso ya Yuda, bayei mpo na kotuna Yehova.

5 Bongo Yehoshafate atɛlɛmaki liboso ya lisangá ya Yuda mpe ya Yerusaleme na ndako ya Yehova liboso ya lopango ya sika, 6 mpe alobaki:

“Ee Yehova Nzambe ya bankɔkɔ na biso, yo ozali nde Nzambe na likoló te?+ Mpe ozali nde koyangela makonzi nyonso ya bikólo te?+ Makasi mpe nguya ezali na lobɔkɔ na yo, mpe moto moko te akoki kotɛmɛla yo.+ 7 Ee Nzambe na biso, obenganaki bato oyo bafandaki na mokili oyo liboso ete bato na yo Yisraele bákóma awa mpe opesi yango libota* ya moninga na yo Abrahama+ mpo na libela. 8 Bayaki kofanda na mokili yango mpe kuna batongaki ndako mosantu mpo na nkombo na yo,+ balobi: 9 ‘Soki mpasi ekómeli biso: ezala na nzela ya mopanga, etumbu, maladi mabe to nzala, biso tokotɛlɛma liboso ya ndako oyo mpe liboso na yo (mpo nkombo na yo ezali na ndako oyo).+ Na kati ya mawa na biso, tokobelela yo mpo na kosɛnga lisalisi. Mpe yo, tiká ete oyoka mpe obikisa biso.’+ 10 Sikoyo, talá mibali ya Amone, ya Moabe mpe ya etúká ya ngombangomba ya Seire+ bazali koya, oyo opesaki Yisraele nzela te ya kokɔta epai na bango ntango babimaki na mokili ya Ezipito. Bakendaki nzela mosusu mpe basilisaki bango nyonso te.+ 11 Sikoyo bango bazali koya kobengana biso na mokili na yo oyo opesaki biso lokola libula.+ 12 Ee Nzambe na biso, okopesa bango etumbu te?+ Mpo biso tozali na makasi te liboso ya ebele wana ya bato oyo bazali koyela biso; mpe toyebi te oyo tosengeli kosala,+ kasi miso na biso ezali kotala epai na yo.”+

13 Na ntango yango, bato nyonso ya Yuda batɛlɛmaki liboso ya Yehova, elongo na basi na bango mpe bana* na bango, ata baoyo ya mike.

14 Na nsima na kati ya lisangá, elimo ya Yehova esalaki epai ya Yahaziele mwana ya Zekaria mwana ya Benaya mwana ya Yeyele mwana ya Mataniya Molevi oyo azalaki moto ya libota ya Asafe. 15 Alobaki: “Bófungola matoi, Yuda mobimba mpe bino bato oyo bofandaka na Yerusaleme ná yo Mokonzi Yehoshafate! Bóyoka oyo Yehova alobi na bino: ‘Bóbanga te mpe bózala na nsɔmɔ te mpo na ebele wana ya bato, mpo etumba ezali ya bino te kasi ya Nzambe.+ 16 Lobi bókita mpo na kokutana na bango. Bakomata na nzela ya Zize, mpe bokomona bango na nsuka ya lobwaku* oyo etalani na esobe ya Yeruele. 17 Bokozala na ntina ya kobunda te na etumba oyo. Bótɛlɛma wana, bóningana te+ mpe bótala ndenge Yehova akobikisa bino.*+ Ee Yuda mpe Yerusaleme, bóbanga te mpe bózala na nsɔmɔ te.+ Lobi, bóbima mpo na kokutana na bango, mpe Yehova akozala na bino.’”+

18 Na mbala moko Yehoshafate agumbamaki, elongi na nse, mpe Yuda mobimba ná bato oyo bafandaka na Yerusaleme bafukamaki liboso ya Yehova mpo na kosambela Yehova. 19 Na nsima, Balevi oyo bazalaki bato ya libota ya Bakohate+ mpe ya Bakora batɛlɛmaki mpo na kosanzola Yehova Nzambe ya Yisraele na mongongo makasi mpenza.+

20 Mokolo oyo elandaki, balamukaki ntɔngɔntɔngɔ mpe babimaki bakei na esobe ya Tekoa.+ Ntango bazalaki kobima, Yehoshafate atɛlɛmaki mpe alobaki: “Bóyoka ngai, Ee Yuda mpe bino bato oyo bofandaka na Yerusaleme! Bóndimela Yehova Nzambe na bino mpo bókoka kotɛlɛma ngwi.* Bóndimela basakoli na ye,+ mpe makambo na bino ekolonga.”

21 Nsima ya koyokana na bato, aponaki mibali oyo bakoleka liboso ya bato oyo bazali na bibundeli, balati bilamba mosantu; bakoyembela+ Yehova mpe bakosanzola ye na maloba oyo: “Bópesa Yehova matɔndi, mpo bolingo na ye ya sembo ezali seko na seko.”+

22 Ntango babandaki koyemba na esengo nzembo ya masanzoli, Yehova atyaki bato bábombana mpo na kobimela mibali ya Amone, ya Moabe mpe ya etúká ya ngombangomba ya Seire oyo bazalaki koya kokɔta na Yuda, mpe babandaki kobomana bango na bango.+ 23 Bongo Baamone ná Bamoabe babalukelaki bato oyo bafandaka na etúká ya ngombangomba ya Seire+ mpo na koboma bango mpe kosilisa bango nyonso; mpe ntango basilisaki koboma bato oyo bafandaka na Seire, bango na bango mpe babomanaki.+

24 Kasi ntango bato ya Yuda, bakómaki na linɔ́ngi ya mosɛnzɛli na esobe,+ mpe batalaki epai ebele yango ya bato bazalaki, bamonaki bibembe na bango elali na mabele.+ Ata moto moko te atikalaki na bomoi. 25 Na yango, Yehoshafate ná bato na ye bakendaki kopunza biloko na bango, mpe bakutaki epai na bango ebele ya biloko ndenge na ndenge, bilamba mpe biloko ya motuya; mpe bazwaki biloko tii bazalaki lisusu te na likoki ya komema.+ Ezwaki mikolo misato mpo bámema biloko nyonso oyo bapunzaki, mpo ezalaki ebele mpenza. 26 Na mokolo ya minei, bayanganaki na Lobwaku* ya Beraka, mpe kuna basanzolaki* Yehova. Yango wana bapesaki esika yango nkombo Lobwaku ya Beraka*+ tii lelo.

27 Bongo mibali nyonso ya Yuda mpe ya Yerusaleme, ná Yehoshafate liboso na bango, bazongaki na Yerusaleme na esengo, mpo Yehova apesaki bango esengo ndenge asalisaki bango bálonga banguna na bango.+ 28 Bongo, bakɔtaki na Yerusaleme na bibɛtɛlo ya bansinga, banzɛnzɛ+ ná bakelelo+ mpe bakendaki na ndako ya Yehova.+ 29 Mpe ntango bato ya makonzi nyonso ya mikili mosusu bayokaki ete Yehova abundisaki banguna ya Yisraele, bayokaki nsɔmɔ mpo na Nzambe.+ 30 Na yango, na boyangeli ya Yehoshafate mboka ezalaki na kimya, mpe Nzambe na ye akobaki kopesa ye bopemi bipai nyonso.+

31 Yehoshafate akobaki koyangela na Yuda. Azalaki na mbula 35 ntango akómaki mokonzi, mpe ayangelaki mbula 25 na Yerusaleme. Nkombo ya mama na ye ezalaki Azuba, mwana ya Shilehi.+ 32 Yehoshafate alandaki ndakisa ya tata na ye Asa.+ Atikaki te kolanda ndakisa yango, mpe asalaki makambo oyo ezali malamu na miso ya Yehova.+ 33 Kasi bisika oyo etombwaná elongwaki te na ekólo;+ mpe bato babongisaki naino mitema na bango te mpo na koluka Nzambe ya bankɔkɔ na bango.+

34 Makambo mosusu ya lisolo ya Yehoshafate, banda na ebandeli tii na nsuka, ekomami na mokanda ya maloba ya Yehu+ mwana ya Hanani,+ oyo bakɔtisaki na Buku ya Bakonzi ya Yisraele. 35 Nsima na yango, Yehoshafate mokonzi ya Yuda asalaki boyokani moko na Ahazia mokonzi ya Yisraele, oyo azalaki kosala makambo ya mabe.+ 36 Bongo basanganaki mpo na kosala bamasuwa mpo ekendaka na Tarasisi;+ basalaki bamasuwa yango na Ezione-gebere.+ 37 Nzokande Eliezere mwana ya Dodavahu ya Maresha asakolaki mpo na Yehoshafate, alobi: “Lokola osali boyokani ná Ahazia, Yehova akobebisa biloko oyo yo osali.”+ Bongo bamasuwa yango ebebaki,+ mpe ekokaki kokende na Tarasisi te.