Mokapo 18

Mosala na Yoane ekiti, oyo na Yesu emati

NSIMA na Pasika ya mobu 30, Yesu mpe bayekoli na ye batiki Yelusaleme. Nzokande, bazongi epai na bango na Galilai te, kasi bakei na etuka ya Yudea epai kuna bakobatisa bato. Ekoki sikawa pene na mobu moko uta Yoane Mobatisi azali kokokisa bobele mosala moko oyo, mpe azali naino na bato bazali kolanda ye lokola bayekoli na ye.

Na solo, ezali Yesu ye mpenza te moto azali kobatisa, kasi bayekoli na ye, na nse na litambwisi na ye. Batisimo oyo bazali kopesa ezali na ndimbola moko na oyo ya Yoane. Mpo na Bayuda oyo bandimi yango, ezali elembo ya kobongola motema na masumu na bango oyo basalaki na kobukaka kondimana na Mibeko na Nzambe. Nzokande, nsima na kosekwa na ye, Yesu akolakisa bayekoli na ye ete bapesa bato batisimo oyo ekozala na ndimbola mosusu. Na yango, batisimo ya boklisto lelo ezali elembo ete moto asili komipesa na Jehovah Nzambe mpo na kosalela ye.

Tozali na ebandeli na mosala na Klisto. Atako bazali kosala esika moko te, Yoane mpe Yesu bazali koteya mpe kobatisa baoyo bazali kobongola motema. Ezali na ntango wana nde bayekoli na Yoane bakomi na zuwa mpe bazali koimaima mpo na Yesu liboso na Yoane, ete: “Moteyi, . . . tala ye wana azali kobatisa mpe bato nyonso bazali kokende epai na ye.”

Na esika ete ayoka zuwa, Yoane asepeli na komona ete mosala na Yesu ezali kokola mpe alingi ete bayekoli na ye mpe basepela. Akundweli bango likambo oyo: “Bino moko boyokaki ete nalobaki: Ngai nazali Klisto te; kasi ngai motindami liboso na Ye.” Na nsima akobi na kolobaka lisese oyo kitoko: “Ye oyo azwi mwasi-na-libala azali mobali-na-libala; nde moninga na mobali, ye oyo azali kotelema mpe koyokamela ye asepeli mingi mpo na mongongo na mobali. Boye esengo oyo na ngai etondi maa.”

Yoane, ye oyo azali moninga ya Mobali-na-libala, asepelaki esili koleka soko sanza motoba ntango alakisaki bayekoli na ye epai na Yesu. Bamosusu kati na bango basili kokoma basangani ya kelasi na mwasi na Klisto na likolo, kelasi oyo esalami na baklisto bapakolami na elimo. Yoane alingi ete bayekoli na ye bakoma mpe bayekoli na Yesu. Mpamba te amikundoli ete mokumba na ye ezali ya kobongisa nzela mpo ete mosala na Yesu ezwa matomba malamu. Yoane Mobatisi alimboli ete: “Ebongi ete ye amata, mpe ngai nakita.”

Yoane, moyekoli na sika ya Yesu mpe azalaki liboso moyekoli na Yoane Mobatisi, akolobela nsima epai wapi Yesu autaki mpe mokumba na ye monene kati na lobiko na bato. Akokoma ete: “Oyo auti na likolo azali likolo na bato nyonso . . . Tata azali kolinga Mwana mpe apesi biloko nyonso na loboko na ye. Ye oyo andimi Mwana azali na bomoi na seko; ye oyo aboyi Mwana akomona bomoi te, kasi nkanda na Nzambe ekoumela na ye.”

Mwa ntango moke nsima na makambo oyo, mokonzi Herode akangisi Yoane Mobatisi. Herode akamataki mwasi ya ndeko na ye Filipe. Lokola Yoane akweisi polele misala na ye mabe, Herode akotisi ye na boloko. Ntango ayoki nsango ete Yoane akangami, Yesu atiki Yudea mpe akei na Galilai elongo na bayekoli na ye. Yoane 3:22 kino 4:3; Misala 19:4; Matai 28:19; 2 Bakolinti 11:2; Malako 1:14; 6:17-20.

▪ Batisimo oyo Yesu atindi bayekoli na ye ete babatisa bato liboso na lisekwa na ye, ezali na ndimbola nini? Bongo oyo ezali kopesama nsi-ma na lisekwa na ye ezali na ndimbola nini?

▪ Ndenge nini Yoane amonisi ete koimaima ya bayekoli na ye ezali na ntina te?

▪ Mpo na nini Yoane abwakami na boloko?