Nzambe azali kosenga te ete tobonzela ye bana mike

KALA, na libanda na Yelusaleme, ezalaki na esika moko ebengamaki Tofete. Kuna, Bayisraele oyo bazalaki bapengwi, kati na bango bakonzi Akaze mpe Manassé, bazalaki na momeseno ya nsomo ya kopesa bana mike mbeka. Nsima na yango, Yozia mokonzi na sembo, asukisaki ezaleli yango na Tofete na kopekisaka milulu nyonso ya losambo oyo ezalaki kosalema esika yango.​—2 Mikonzi 23:10; 2 Ntango 28:1-4; 33:1, 6.

Mpo na nini nkombo wana ya Tofete? Ebandeli ya nkombo yango etyameli ntembe, kasi tokoki kotalela na litomba nyonso makanisi ya moyuda David Kimhi (pene na 1160-1235) na ntina na esika yango. Kati na komantere moko likolo na 2 Mikonzi 23:10, esika nkombo yango Tofete emonani, akomaki boye: “Nkombo ya esika oyo bazalaki kotumba bana na bango mbeka epai na Moleke. Bazalaki kobenga esika yango Tofete mpamba te, molulu ezalaki kosalema wana esanganaki na mabina mpe mbonda [na hébreu touppim], oyo ezalaki kozipa makelele ya mwana oyo etumbami na moto, mpo ete tata na ye ayoka makelele yango te mpe na mawa nyonso, akenda kobotola mwana na ye te. Nkolo na lobwaku na Hinnom ezalaki moto moko abengami Hinnom, mpe bazalaki kobenga yango ‘Lobwaku ya Hinnom’ to ‘Lobwaku na bana na Hinnom’. . . . Yozia akitisaki lokumu ya esika yango mpe akomisaki yango esika na mbindo epai bazalaki kobwaka bakufi mpe biloko nyonso ya mabe, mpo ete moto moko azwa lisusu likanisi ya kotumba mwana na ye na esika yango te mpo na Moleke.”

Na eleko na biso, nzambe Moleke azali bobele ekeko oyo bato bakendaka kotala ye mpe atikala se na lisolo mpamba, mpe na kozanga ntembe mpenza, bato mingi bayebaka te mpo na nini baboti bazalaki koboma bana na bango mpo na ye. Nzokande, lelo lisusu, mikóló mosusu bazali pene mpo na koboma bana na bango soko bamoni ete esengeli kosala bongo. Bana mingi basili kokufa mpo na etumba. Mbula na mbula, bana mingi oyo bazali naino na kati na libumu bazali kobomama mpamba te babotami na pite to mpo kobotama na bango ekoki kobebisa bizaleli ya baboti na bango. Na yango, bana yango bapesami mbeka epai na banzambe na bonsomi ya pite mpe na banzambe ya biloko na mosuni.

Jéhovah ayinaki ezaleli yango ya kotumba bana mbeka na moto epai na Moleke. (Yilimia 7:31) Bongo na moi ya lelo azali kotalela ndenge mosusu bilenge oyo bazali kobomama na nko?

[Bililingi na lokasa 24]

Lobwaku ya Hinome na mikolo na biso, na kotalaka na est

Babonzeli mwana epai na Moleke, nzambe na lokuta, engebene elilingi ya Photo-Drame de la Création esili koleka mibu 75