Kobimisama ya makomi na nsuka ya la mer Morte
NA SEPTEMBRE euti koleka, ezalela ya mobulungano oyo bato ya mayele bazalaki kati na yango uta bambula mingi, ekómaki na nsuka na yango. Koswana makasi oyo ezalaki kati na baoyo bazalaki koyekola makomi ya la mer Morte emonani lokola ere ekómaki na nsuka na yango, atako matáta mosusu mabimaki.
Makomi yango mazwamaki na mibenga mizali pene na la mer Morte na mobu 1947 mpe bambula oyo elandaki. Ezali na motuya moko monene, mpamba te epesi nzela na komonisa bosolo ya Makomami na Liebele mpe engɛngisi pole likoló na ezalela ya elimo na Palestine na ntango na Yesu. (Yisaya 40:8) Wana makomi mosusu mabimisamaki nokinoki, na mobu 1991, pene na makomi 400 mabimisamaki naino te mpe balukiluki mingi bazalaki na makoki te mpo na komona yango. Mingi kati na bango bazalaki na mayoki lokola oyo ya molakisi Ben Zion Wacholder, oyo azalaki kooka “mawa wana ezalaki ye kokanisa ete soko [makomi] makolanda kobimisama bongo, biso nyonso tokokufa na ntango makomi nyonso ya la mer Morte makozwama na mokili mobimba.”
Kasi ezalela wana ebongwani uta Septembre oyo euti koleka. Libosoliboso, molakisi Wacholder mpe moko na basalani na ye, Martin Abegg, bayebisaki ete basalelaki ordinateur na kobómbana mpo na kozongisa ba textes oyo ekɛngɛlamaki. Na nsima biblioleke ya Huntington na engumba San Marino, na ekólo ya Californie eyebisaki ete bazalaki na bafɔtɔ́ ya makomi ya ebandeli mpe epesaki nzela na balukiluki oyo bazali na makoki mingi ete bakenda kotala yango kozanga epekiseli. Emonani ete, bafɔtɔ́ ya makomi wana ekangisamaki mpo na kobatela mikanda yango. Bafɔtɔ́ oyo elandanaki, ebómbamaki na bisika bikeseni, mpe moko na yango ezwamaki na biblioteke ya Huntingtan.
Molimboli moko na Biblia alobelaki mbongwana ya makambo lokola ‘likambo likokani na kokwea na efelo ya Berlin.’ Bakomi ya mokanda yango oyo bayebani, batalelaki kobimisama ya makomi oyo mazongisamaki na ordinateur mpe lotómo ya kopesa nzela na kokangisa bafɔtó, ete ezali lokola ‘boyibi.’ Na ntembe te kowelana likolo na bizalelei malamu ekoumela bambula mingi. Nzokande, emonani ete ebele na bato na mayele bakotalela makomi nyonso ya la mer Morte.
[Elilingi na lokasa 32]
Kolakisama ya komantere likoló na mokanda ya Habakuku, moko na makomi ya la mer Morte