Toli mpo na kopona baninga ya malamu

LISOLO ya zulunalo moko (Reader’s Digest) elobi ete na makambo ya molato mpe ya miziki, bilenge batunaka baninga na bango toli na esika bátuna baboti na bango. Yango wana, ezali na ntina mingi ete baboti báyeba baninga ya bana na bango mpe bisika nini bakutanaka na bango.

Esmé van Rensburg, profesere ya pisikoloji na iniversite moko ya Afrika ya Sudi, alobi ete: “Baboti, bozali na mokumba ya koluka koyeba.” Abakisi ete: “Ekoki mpenza kozala ete bana na bino bakosepela te kasi, na nsima bakokitisa mitema.” Na nsima apesi baboti makanisi oyo elandi. Mibeko esengeli kozala ya kolongobana mpe emonisa mitinda ya sikisiki; bóyoka mwana na bino; bósilika te; kasi bózala kimya; mpe bóyeba makambo oyo bolingi koloba. Soki mwana na bino azali kotambola na moninga moko ya mabe, bólobela nde etamboli mabe oyo boninga yango ebimisi na esika ya kosuka se na kopekisa ye kotambola na moninga yango.

Banda kala, Biblia, Liloba ya Nzambe ezali kopesa baboti toli ya malamu. Na ndakisa, elobi ete: ‘Bóyokaka noki; bówelaka koloba te; bóyoka nkanda noki te.’ (Yakobo 1:19, NW) Lisusu, Biblia epesi toli ya malamu mpo na kopona baninga. Elobi ete: “Ye oyo akotambola na bato na mayele akozala na mayele, nde motamboli elongo na bazoba akobukana.” (Masese 13:20) Bandakisa oyo emonisi mayele oyo bato oyo batángaka Biblia mpe bandimaka makambo na yango, mpe basalelaka makambo yango na bomoi ya mokolo na mokolo bakozwa.